Itaixpantijkauan Jehová tikintakachiuaj tekiuajyomej uan tein kiixnextia se altepet. Tikintakachiuaj akin kiixtaliaj kijtoskej juramento, kitajpaloskej bandera oso cantaroskej himno nacional.

 Sayoj ke itaixpantijkauan Jehová tikixtaliaj amo tikchiuaskej tein yejuan kichiuaj porin kiixnamiki tein Biblia tamachtia, uan tiktasojkamatij maj amo techchikaujkauikan maj tikchiuakan, ijkon kemej tejuan amo tikinchikaujkauiaj maj kineltokakan tein tejuan tikneltokaj.

Itech nejin tamachtilis tiknankiliskej nejin netajtanilmej:

•  ¿Toni kijtoua Biblia?

•  ¿Toni moneki tikchiuaskej komo se tanauatil kijtoua maj tikueyitalikan tein kiixnextia se altepet?

•  ¿Tikchiuaj itaixpantijkauan Jehová maj oksekin kinekikan kiixtaliskej okse taman tekiuajyot?

 Nejin ome tajkuilolmej itech Biblia kinextiaj keyej ijkon tikixtaliaj:

•   Sayoj Dios kinamiki maj tikueyichiuakan. Biblia kijtoua: “Xikueyichiua moDios Jehová, uan sayoj yejua xiktekitili” (Lucas 4:8). Miakpa, juramentos uan himnos nacionales kijtouaj ke aksa okachi kitasojtas ialtepeuj ke okse taman. Yejua ika, itaixpantijkauan Jehová tikitaj ke amo kuali yetok tikijtoskej juramento, tiktajpaloskej bandera uan ticantaroskej himno nacional.

   No tikitaj ke tiktajpaloskej bandera kemej yeskia tikueyichiujtoskiaj se tiotsin, teisa tein Biblia kijtoua maj amo se kichiua (1 Corintios 10:14). Seki motelmachtianij kijtouaj ke banderas, tein melauj kiixnextiaj se taneltokalis. Motelmachtijkej Carlton Hayes kijkuiloj: “Nacionalismo kemej se taneltokalis tein moixnextia ika bandera uan sayoj yejua kiueyichiuaj”. a Tajkuilojkej Daniel Mannix kijtoj nejin keman ininka tajtoj yekinika itatojtokakauan Cristo: “Itatojtokakauan Cristo amo kinekkej [...] motemakaskej kichiuaskej teisa para kipaleuiskej tekiuaj [romano], tein axkan kemej yeskia amo kinekiskiaj kitajpaloskej bandera”. b

  Maski itaixpantijkauan Jehová amo tiktajpalouaj bandera, amo no tikuejuelouaj, amo tiktatiaj nion tikchiuiliaj nion se taman tein amo kuali, amo no tikchiuaj nejin ika okseki taman tein kiixnextia se altepet.

•   Dios amo techichikotasojta (Hechos 10:34, 35). Biblia kijtoua ke “itechkopa sayoj se takat [Dios] techchijchiuak tinochin” (Hechos 17:26). Yejua ika itaixpantijkauan Jehová tikitaj ke amo kuali yetok okachi tikintakachiuaskej akin kayomej itech se altepet. Tikintakachiuaj nochin maski kampa yeski kayomej (1 Pedro 2:17).

 Itaixpantijkauan Jehová amo tikinixnamikij tekiuajyomej. Tein melauj, tikneltokaj ke Dios kikaujtok maj yetokan tekiuajyomej uan amo tikixnamikij tein kiixtalij (Romanos 13:1-7). No tikneltokaj ke itatojtokakauan Cristo moneki kintakamatiskej tekiuajyomej (Lucas 20:25).

 Sayoj ke ¿toni tikchiuaskej komo inintanauatiluan tekiuajyomej kijtouaj maj se kichiua teisa tein Dios kijtoua ke amo moneki se kichiuas? Kemansa, uelis tikintajtaniskej tekiuajyomej maj tepitsin kipatakan inintanauatiluan. c Sayoj ke komo amo kipataj, ika poujkaitalis tikixtaliskej tikchiuaskej nejin: “Dios yejua taixyekankej akin moneki tiktakamatiskej uan amo tein oksekin technauatiaj maj tikchiuakan” (Hechos 5:29).

 Amo. Itaixpantijkauan Jehová amo tikinpaleuiaj nion tikinixnamikij tekiuajyomej. Amo tikijtouaj juramento, amo tiktajpalouaj bandera nion ticantarouaj himno nacional. Tikixtaliaj ijkon tikchiuaskej porin tiknekij tiktakamatiskej tein Biblia kijtoua, uan amo porin tiknekij maj mopata tekiuaj.