Tiitaixpantijkauan Jehová techmachtiaj keniuj uelis tikchiuaskej itech tonemilis tein Cristo tamachtij, uan no techmachtiaj para uelis tikteixmatiltiskej kuali tanauatilmej uan titamachtiskej ijkon kemej Jesús tanauatij (Mateo 24:14; 28:19, 20). Nochi nejin timomachtiaj keman timosentiliaj nochi semanas uan itech uejueyi nechikolmej tein mochiua xijxiujtika. Uan itaixpantijkauan Jehová akin kinmakaj okseki tekit tein moneki kichiuaskej itech nechikol oso itech organización kampa tipouij, kiselitij okseki tamachtilis tein mokixtia itech Biblia.

Itech nejin tamachtilis, tikitaskej nejin:

•  ¿Keniuj kinmachtiaj itaixpantijkauan Jehová?

•  Seki taman tamachtilis tein kiseliaj itaixpantijkauan Jehová

•  ¿Kani mokixtia nejon tamachtilis tein kiseliaj itaixpantijkauan Jehová?

•  ¿Moneki kiixtauaskej nejon tamachtilis tein kiseliaj?

•  ¿Keniuj kinpaleuia nejon tamachtilis tein kiseliaj itaixpantijkauan Jehová?

 Keman timosentiliaj. Nochin semanas tiitaixpantijkauan Jehová ojpa semana timosentiliaj itech kalmej tein tikchijchiuaj para timosentiliskej. Timosentiliaj itajkotian semana uan no itamian semana. Nochin uelis yaskej uan amo motajtani tomin.

•   Keman timosentiliaj itajkotian semana. Ompa timomachtiaj keniuj titaleroskej kemej moneki, keniuj titanojnotsaskej uan titamachtiskej sentaixpan uan keniuj titetapouiskej itajtol Dios uan keniuj titamachtiskej. Yejua ika kipanoltiaj tanojnotsmej, tamachtilis kampa kinankiliaj tein kintajtaniaj, kiixnextiaj keniuj tanojnotsaskej uan kiitaj videos. Nochin nejin techpaleuia maj tikteixmatiltikan itajtol Dios uan maj tikinmachtikan ika Biblia akin kineki momachtis. Tinochin akin timosentiliaj techpaleuia tein ompa timomachtiaj uan no techpaleuia maj okachi titakuaujtamatikan iuan Dios uan maj tiktasojtakan toTajtsin uan oksekin taneltokanij.

•   Keman timosentiliaj itamian semana. Achto motemaka se tanojnots para kikakiskej akin kinyoleuaj maj takakitij. Uan satepan timomachtiaj amatajkuilol Tanejmachtijkej, a uan tiknankilijtiyouij tein tajtantiuj akin kiixyekana tamachtilis. Nejon tein timomachtiaj kimelaua tein Biblia kijtoua oso tein Biblia tayolmajxitia tein techpaleuia maj tikitakan keniuj tiktekitiliskej Dios uan keniuj tinemiskej.

 Keman tikpiaj uejueyi nechikolmej. Expa xiuit timiakej timosentiliaj uan ualeuaj de miakkan kampa mosentiliaj. Moixtalia se itokay tein timomachtiskej itech nejon ueyi nechikol uan nochin kinyolpaktia ompa yetoskej. Tikakij tanojnotsmej, technextiliaj keniuj tikchiuaskej teisa, sekin kitetapouiaj tein kinpanouani uan tikitaj videos. Ijkon kemej okseki nechikolmej tein tikpiaj, nejin uejueyi nechikolmej techpaleuiaj maj okachi tikmatikan tein kijtoua Biblia uan maj okachi kuali tikteixmatiltikan itajtol Dios. Nochin uelis yaskej uan amo motajtani tomin.

 Sekin itaixpantijkauan Jehová kinyoleuaj maj kiselitij seki taman tamachtilis para uelis kichiuaskej seki tekit. ¿Toni taman tamachtilis kiselitij? ¿Keniuj kinpaleuia uan kanachi uejkaua? ¿Uan akonimej uelis yaskej?

Tamachtilis para akin Tekitij kemej Precursor

•   Keniuj kinpaleuia: Nejin tamachtilis kiseliaj seki itaixpantijkauan Jehová akin tekitij kemej precursor. b Yejuan miak tonalmej kitetapouiaj itajtol Dios. Kinpaleuia maj okachi kuali kiteixmatiltikan itajtol Dios uan maj tamachtikan. Ixyetok toni momachtiskej, kikakij tanojnotsmej, uan no momamachtiaj keniuj moneki kichiuaskej tekit.

•   Kanachi uejkaua: Chikuasen tonal.

•   Akonimej kinyoleuaj: Akin kipiaj se xiuit kemej precursor uan akin panokya makuil xiuit keman kiselijkaj nejon tamachtilis.

Tamachtilis para akin kiteixmatiltiaj iTaixyekanalis Dios

•   Keniuj kinpaleuia: Kinmachtiaj precursores akin ipa uelijya kichiuaj tekit para okachi ueliskej kichiuaskej nejon tekit. Yejuan tel kuali momachtiaj keniuj kiteixmatiltiskej itajtol Dios uan keniuj tamachtiskej. No tel kuali kitemoliaj seki taman tein Biblia tamachtia. Miakej akin kiselitij nejon tamachtilis kinyoleuaj maj yakan tekititij kampa poliujtok maj moteixmatilti itajtol Dios.

•   Kanachi uejkaua: Ome metsti.

•   Akonimej kinyoleuaj: Precursores akin tajtanij kiseliskej nejin tamachtilis, kichiujtokej tein motajtani uan ueliskej yaskej tekititiuij kampa monekis.

Tamachtilis para Tayekananij itech Nechikol

•   Keniuj kinpaleuia: Kinpaleuia akin tekitij tein moixmatij kemej tayekananij c itech nechikol para kimatiskej keniuj kinmachtiskej akin mosentiliaj uan keniuj kinpaleuiskej maj okachi motokikan iuan Dios, uan no kinmachtiaj keniuj kichiuaskej okseki tekit tein kipiaj. No kinpaleuia maj okachi kitasojtakan Dios uan tokniuan (1 Pedro 5:2, 3).

•   Kanachi uejkaua: Makuil tonal.

•   Akonimej kinyoleuaj: Kinyoleuaj tayekananij akin yankuixtok peujkej kichiuaj nejon tekit oso akin uejkaujya kichiujtokej nejon tekit uan makuil xiuitya amo kiselijtoyaj nejon tamachtilis.

Tamachtilis para Tokniuan Takalpanouanij uan Ininsiuatsin

•   Keniuj kinpaleuia: Kinpaleuia tokniuan takalpanouanij d maj kuali kichiuakan tekit tein kipiaj itech tataman nechikolmej kampa ixyetok takalpanoskej (1 Timoteo 5:17). No kinpaleuia yejuan uan ininsiuatsin maj kuali kiajsikamatikan tein kijtoua Biblia.

•   Kanachi uejkaua: Se metsti.

•   Akonimej kinyoleuaj: Tokniuan takalpanouanij uan ininsiuatsin akin kipiaj se xiuit desde ke peujkej kichiuaj nejon tekit. Uan no oksepa kinyoleuaj keman kiajxitiaj makuil xiuit.

Tamachtilis para Tayekananij uan Tapaleuianij

•   Keniuj kinpaleuia: Kinpaleuia tayekananij uan tapaleuianij e maj kimatikan kichiuaskej tekit tein kipiaj itech nechikol (2 Timoteo 3:1). Amo miak xiujmej panouaj para oksepa kiseliskej nejon tamachtilis.

•   Kanachi uejkaua: Se tonal, uan kemansa panoua se tonal.

•   Akonimej kinyoleuaj: Tokniuan takalpanouanij, tayekananij uan tapaleuianij.

Tamachtilis para akin Tekitij Betel

•   Keniuj kinpaleuia: Kinpaleuia akin tekitij Betel f maj kimatikan keniuj kichiuaskej tekit tein kipiaj uan no kinpaleuia maj okachi kitasojtakan Dios uan oksekin akin no tekitij ompa.

•   Kanachi uejkaua: Makuil tonal uan tajko.

•   Akonimej kinyoleuaj: Akin yekin peuaj tekitij ompa Betel oso akin uejkaujya ompa tekititokej uan panokya makuil xiuit keman kiyoleujkaj maj kiseliti nejon tamachtilis.

Tamachtilis ika Biblia tein monotsa Galaad de iTaixpantijkauan Jehová

•   Keniuj kinpaleuia: Kinpaleuia maj okachi kitasojtakan itajtol Dios uan no kinpaleuia maj kiitakan keniuj kichiuaskej kemej momachtiaj (1 Tesalonicenses 2:13). Nejon takamej uan siuamej akin yektalnamikij uan kiselitij tamachtilis Galaad, okachi ueli tapaleuiaj maj motamachti ika Biblia uan okachi uelij kichiuaj tekit tein kipiaj itaixpantijkauan Jehová. Akin kiselitij nejon tamachtilis, uelis kintitaniskej maj kiteixmatiltitij itajtol Dios oso maj tekititij itech semej sucursal de itaixpantijkauan Jehová itech país kampa pouij oso okseko.

•   Kanachi uejkaua: Makuil metsti.

•   Akonimej kinyoleuaj: Akin tekitij Betel kinyoleuaj sekin akin tekititokej kemej misioneros, precursores especiales, akin tekitij Betel uan akin takalpanouaj itech nechikolmej uan ininsiuatsin. Nejin tamachtilis kiselitij kampa yetok Centro Educativo de la Watchtower, ompa Patterson (Nueva York).

Tamachtilis para akin Taixyekanaj itech Sucursal uan Ininsiuatsin

•   Keniuj kinpaleuia: Akin taixyekanaj itech sucursal g kinpaleuia maj kimatikan keniuj kiixyekanaskej tekit tein mochiua itech se sucursal uan tekit tein kichiuaj itaixpantijkauan Jehová itech país oso países kampa kiixyekanaj nejon tekit.

•   Kanachi uejkaua: Ome metsti.

•   Akonimej kinyoleuaj: Akin tekitij itech ueyi kali kampa kinixyekanaj itaixpantijkauan Jehová, kinyoleuaj sekin akin taixyekanaj itech sucursal. Nejon tamachtilis kiselitij kampa yetok Centro Educativo de la Watchtower, ompa Patterson (Nueva York).

 Itech Biblia. Nochipa kikixtiaj itech Biblia tein tamachtiaj itaixpantijkauan Jehová. Tikneltokaj ke Dios kichiuak maj moijkuilo nochi tein kijtoua Biblia uan yejua okachi kuali tamachtilis kipia para nochi taman tein tikchiuaskej kemej itatojtokakauan Cristo (2 Timoteo 3:16, 17).

 Amo. Nejon tamachtilis amo moixtaua. Nochi tekit tein kichiuaj itaixpantijkauan Jehová moixtaua ika tomin tein kitemakaj akin kipiaj pakilis tapaleuiskej (2 Corintios 9:7).