Itaixpantijkauan Jiova tiktakamatij tayolmajxitilis itech Biblia tein kijtoua maj amo titanankilikan keman techteluiliaj ika teisa oso techkejkelouaj. Kemej neskayot, itech Biblia kijtoua: “Akin kimelaua se takejkelojkej motanilijtok pinaualis” (Proverbios 9:​7, 8; 26:4). Timochikauaj tikyolpaktiskej Dios, yejua ika amo timotajtolteuiaj nion timotenpaleuiaj keman techteluiliaj ika teisa (Salmo 119:69).

 Tikmatij ke, onkak “tonal keman amo teyi se kijtos uan tonal keman se tajtos” (Eclesiastés 3:7). Yejua ika, titajtouaj iniuan akin kinekij kimatiskej tein melauak, sayoj ke amo titanankiliaj keman kinekij motajtolteuiskej. Ijkon tiktojtokaj itamachtilis Jesús uan neskayot tein techkauilij yejua uan imomachtijkauan.

•   Jesús amo teyi kijtoj keman kitakajkayauilijkej iixpan Pilato (Mateo 27:11-​14; 1 Pedro 2:​21-​23). Uan amo no tanankilij keman kijtouilijkej ke katka tauankej uan ke tel takuaya. Okachi kuali kikauak maj itachiualisuan kinextianij ke amo melauak tein kijtouiliayaj, kemej kijtoua Biblia: “Tamatilis monextia ke melauak ika itachiualisuan” (Mateo 11:19, TNM). Sayoj ke keman monekik, kinnankilij ika yolchikaualis akin kijtouiliayaj tein amo melauak (Mateo 15:​1-3; Marcos 3:​22-​30).

   Jesús kinmachtij imomachtijkauan maj amo mosenkauanij keman kintakajkayauiliskiaj. Kiniluij: “Nantatiochiualme namejuan kuak namechuijuikaltiske uan kuak namechtajyouiltiske uan kuak namechijtouiliske miak xolopijyot porin nantakuautamatij itech Nejuatsin notokay” (Mateo 5:​11, 12). Jesús no kiniluij ke ijkuak kintakajyauiliskiaj tapaleuiskia maj kiteixmatiltikan tein kineltokayaj. Keman kipanoskiaj nejon, Jesús kichiuaskia tein motenkauak: “Namechinmaktiliti tajtolme uan tamachilis. Uan ijkon nekes ten namechtauelitstinemij, [...] amo uelis [...] namechtajtolixnamikiske” (Lucas 21:12-​15).

•   Pablo, se itekitikauj Dios kinyolmajxitij akin kichiuayaj kemej Cristo maj amo motajtolteuikan ika tein amo moneki oso “ten nenka san” (Tito 3:9; Romanos 16:17, 18).

•   Pedro, se itekitikauj Dios kinyolchikauak akin kichiuayaj kemej Cristo maj kipaleuianij tein kineltokayaj keman ueliskiaj (1 Pedro 3:​15). Uan no, kijtoj ke tein kichiuaskiaj okachi tapaleuiskia ke tein kijtoskiaj. Kijkuiloj: “Ma tikchiutinemikan ika ten kuali uan ijkon tikintentamatiliske ne taka ten ne yolmijmikilome san” (tejuan tiktalilijkej cursivas; 1 Pedro 2:​12-​15).