Watch Tower Bible and Tract Society of Pennsylvania kijtosneki se nechikol tein amo kitemoua kitanis tomin ika tein kichiua tein moixtalij itech xiuit 1884 ijkon kemej kijtoua tanauatilmej tein kiixtalianij tekiuanij ompa Pensilvania (Estados Unidos). Ika nejin nechikol tein ijkuiliujtok ininixpan tekiuanij, itaixpantijkauan Jiova uelij kipaleuiaj tekit tein mochiua noyampa taltikpak ijkon kemej kikixtiskej Biblias uan amatajkuilolmej.

 Ijkon kemej kiixtaliani, nechikol Watch Tower kitemoua “maj akin ompa pouij kisenueyichiuakan Dios, tamachtis uan tapaleuis”. Sayoj ke tein okachi kitemoua yejua “maj moteixmatilti uan maj motamachti ika iTekiuajyo Dios tein kiixyekana Jesucristo”. Aksa peua poui itech nejin nechikol porin kiyoleuaj, amo porin tapaleuij ika miak tomin. Akin ompa pouij uan akin taixyekanaj kichiuaj tekimej tein ika kipaleuiaj Oloch Taojtokaltianij akin kinixyekanaj iTaixpantijkauan Jiova.

 Itaixpantijkauan Jiova amo sayoj ijkuiliujtokej ininixpan tekiuanij ika tokayit Watch Tower Bible and Tract Society of Pennsylvania, ta no ika okseki tokaymej itech tataman altepemej. Itech seki ijkuiliujtokej ika tokaymej “Watch Tower”, “Watchtower” oso kitajtolkepaj tein kijtosneki.

 Ijkuak moijkuilojkej nejin tokaymej ininixpan tekiuanij uan hasta axkan, techpaleuiani maj ueli tikchiuakan miak taman. Kemej:

•   Moijkuilouanij amatajkuilolmej uan moamakixtianij. Tikmoyauanij Biblias kemej 220 millones uan ajsitokya 40 millones amatajkuilolmej tein mokixtiaj itech Biblia itech panoua 900 tataman tajtolmej. Itech Internet jw.org kampa timoteixmatiltiaj, miakej uelij kiixtajtoltiaj Biblia itech tepos tein amo moneki kiixtauaskej itech panoua 160 tataman tajtolmej uan kiajsij itanankililuan netajtanilmej kemej “Toni iTekiuajyo Dios?”.

•   Tamachtilis. Motemakaj tataman tamachtilismej ika Biblia. Kemej neskayot, itech xiuit 1943 peuak tamachtilis Galaad de la Watchtower, tein kinpaleuiani panoua 9,000 itaixpantijkauan Jiova maj tekitikan kemej misioneros oso maj tapaleuikan maj kuali mochiua tekit noyampa taltikpak. Uan no, tel miakej millones kiseliaj nemachtil tein motemaka itech nechikolmej tein mochiuaj nochi semanas hasta akin amo itaixpantijkauan Jiova. No moixtaliani maj tikinmachtikan akin amo taixmatij uan mokixtiani se amatajkuilol itech 120 tataman tajtolmej tein ika tikinpaleuiaj maj taixtajtoltikan uan maj tajkuilokan.

•   Titapaleuiaj. Tikinmakaj tein okachi moneki akin kinijtakoua se tetsauit oso ijkuak taltikpakneminij kichiuaj teisa tein ika taijtakouaj. Kemej neskayot, tikinpaleuijkej akin tajyouijkej ijkuak kinmijmiktijkej ompa Ruanda itech xiuit 1994 uan keman talolinik Haití itech xiuit 2010.

 Maski ika nejin tokaymej tein ijkuiliujtokej ininixpan tekiuanij uelini tikchiuanij miak taman tein moneki, amo tikchiaj maj sayoj itechkopa mochiua tekit. Sejse akin kichiua kemej Cristo moneki kinixmatiltis uan kinmachtis oksekin tein kijtoua Biblia (Mateo 24:14, TNM; 28:19, 20). Senkis tikmatij ke Dios kitiochiua nejin tekit uan kisentokas kichiuas maj moskalti (1 Corintios 3:6, 7).