Itaixpantijkauan Jiova amo tiiluichiuaj keman aksa xiuajsi porin senkis tikneltokaj ke Dios amo kineki maj tikchiuakan. Maski Biblia amo senkis kijtoua ke amo kuali yetok nejin iluit, kemaj techiluia seki taman tein techpaleuia maj tikajsikamatikan keniuj kiita Dios keman aksa xiuajsi. Maj tikitakan naui taman tein techpaleuis maj tikajsikamatikan nejon uan keniuj mouika iuan tein Biblia tamachtia.

1.   Iluit tein kichiuaj keman aksa xiuajsi ualeua itech taneltokalismej tein amo melaujkej. Se diccionario enciclopédico kijtoua ke nejin iluit peuak mochiua porin kineltokaj ke itech nejon tonal, “espíritus uan chikaualis tein amo kuali kitemouaj kijtakoskej akin iluichiua nejon tonal” uan “komo ompa moajsij akin iniuan kuali mouika uan kiluiaj maj kipia se kuali nemilis, nejon uelis kimatampauis” (Funk & Wagnalls Standard Dictionary of Folklore, Mythology, and Legend). Okse amatajkuilol kimelaua ke ne uejkauj kinijkuilouayaj nochin akin yoliaj, nejon “semi monekia porin ijkon ueliskia kiitaskej toni horóscopo kinamikia”, nejin mokixtia itech “tein miakej kineltokaj ke ueli motokiaj iuan Dios”. Uan nejin amaix no kijtoua: “Ke miakej kineltokaj ke velas tein kikuij keman aksa xiuajsi kipia naualot tein ika mochiua tein kinejneki akin xiuajsi” (The Lore of Birthdays).

    Sayoj ke, Biblia senkis kiixtopeua nochi taman naualot oso tein mouika iuan (Deuteronomio 18:14; Gálatas 5:19-21). Tein melauj, se taman keyej Dios kitatsakuiltij ne uejkauj xolal Babilonia yejua porin akin ompa nemiaj kitekitiltiayaj naualot, se taman tein ika kimatiaj tein panos satepan (Isaías 47:11-15). Maski tiitaixpantijkauan Jiova amo senkis tikitaj kani ualeujtok nochi tein taltikpakneminij momattokej kichiuaskej oso iluit, amo uelis tiktapanauiliskej tein Biblia kijtoua kemej moneki tikitaskej naualot.

2.   Akin yekinika kichiuayaj kemej Cristo amo iluichiuayaj keman xiuajsiaj. Enciclopedia, (The World Book Encyclopedia) kijtoua ke yekinika itatojtokakauan Cristo “kiitayaj ke iluit tein kichiuayaj keman aksa xiuajsia ualaya itech taneltokalis tein amo melauak”. Biblia kinextia ke tatitanilmej uan oksekin akin Jesús kinmachtij keman moajsia taltikpak, kiixtalijkej se taman tein tinochin akin tikchiuaj kemej Cristo moneki tiktojtokaskej (2 Tesalonicenses 3:6).

3.   Akin kichiuaj kemej Cristo amo kinnauatijkej maj kielnamikikan keman aksa yoli, ta se mikilis: imikilis Jesús (Lucas 22:17- 20). Nejin amo se kimoujkaita porin Biblia kijtoua ke “okachi kuali [...] tonal keman se momikilia uan amo tonal keman se yoli” (Eclesiastés 7:1). Achto ke yaskia iluikak, Jesús mochikauak kipias se kuali tokayit iixpan Jiova, yejua ika tonal keman momikilij okachi moneki ke tonal keman yolik (Hebreos 1:4).

4.   Itech Biblia nion seko kijtoua ke se itekitikauj Dios iluichiuak keman xiuajsik. Nejin amo kijtosneki ke mopoloj, ta Biblia kijtoua ke ome taltikpakneminij akin amo kitekitiliayaj Dios iluichiujkej keman xiuajsikej. Sayoj ke, Biblia amo kuali ika tajtoua nejon iluimej (Génesis 40:20-22; Marcos 6:21-29).

 Kemej nochi tetatmej, itaixpantijkauan Jiova kintasojtaj ininkoneuan. Yejua ika, kinmakaj netetayokolilmej tein yeski tonal itech xiuit uan kichiuaj okseki taman uan iluimej kampa uelis moixpetaniskej. Kitemouaj kichiuaskej ijkon kemej Dios, akin nochipa kinmaka itekitikauan tein kuali (Mateo 7:11). Yejua ika, ikoneuan itaixpantijkauan Jiova, amo kimachiliaj ke mopolouilijtokej teisa tein kuali. Ijkon kinextia tein kijtojkej seki konemej:

•   “Okachi teyolpaktij se kiselis se netetayokolil keman amo se kichia.” (Tammy, akin kipia 12 xiujmej.)

•   “Notatuan amo nechmakaj netetayokolilmej keman nixiuajsi, sayoj ke kemaj nechmakaj okse tonal. Nikuelita nikselis teisa keman amo nikchia.” (Gregory, akin kipia 11 xiujmej.)

•   “Konemej sayoj kikuaj pastel uan mokuikatiaj. Nejon iluimej amo nikuelita, tein tikchiuaj nochan okachi kualtsitsin.” (Eric, akin kipia 6 xiujmej.)