Ninemik xolal Obregón, kampa ika norte itech altepet México. Nikinpia chikueyi nokniuan, satepan ke yolkej nauin nejua niyolik. Tinemiaj tatenoj itech xolal, nopopaj tekitia kampa kinyekpiayaj tapialmej. Kualtsin kampa tinemiaj uan kuali timouikayaj kemej kalyetouanij uan tiyolpakiaj. Sayoj ke, keman nikpiaya sayoj makuil xiuit, se kiouaejekat tauejueloj kampa tinemiaj uan monekik tinemitiuij itech okse xolal.

 Nopopaj peuak kuali kiyoui itech tekit, sayoj ke, no peuak tauana. Nejon kinijtakoj kemej namikuanij uan tejuan no. Kemej nopopaj tachichinaya, nokniuan uan nejua no tipeujkej titachichinaj porin tikichtekiliayaj cigarros. Keman yekinika nimouintij sayoj nikpiaya chikuasen xiuit. Satepan notatuan mokaujkej uan nejua peuak okachi nikchiua tachiualismej tein amo kuali.

 Nomomaj nemito iuan okse takat uan techuikak iuan. Yejua amo kimakaya tomin uan amo techajsia tomin tein tomomaj kitania, yejua ika, nokniuan uan nejua peujkej titekitij itech tein yeski taman. Maski ijkon, amo keman techajsia tein tiktaniaj. Nejua niktapaluiaya zapatos, uan niknamakaya pan, periódicos, chicles uan okseki taman. No niktemouaya takual itech xolal kampa kitamotayaj tajsol akin kipiayaj miak tomin.

 Keman nikpiaya majtakti xiuit, se takat nechyoleuak maj iuan nitekiti kampa kitamotaj tajsol ompa itech xolal. Nikselij nejon tekit, nikisak kaltamachtiloyan uan no nikisak nochan. Tein niktania nochi tonal amo ajsia se dólar uan nechmakaya tein nikuaskia tein onkaya itech tajsol. Ika tein tikajsiaj ompa, nimochijchiuilij kampa ninemis. Akin ompakauin nemiaj kikuiaj tajtolmej tein pitsotikej uan auilnemiaj. Miakej kikuiaj drogas uan mouintiayaj. Ijkuak, nonemilis okachi amo kuali katka. Mojmostaj youak nichokaya porin semi nimouia. Semi nimopinaujmatia porin amo teyi nikpiaya uan nion no se kuali nemachtil. Ninemik kampa kitamotaj tajsol kemej eyi xiuit. Satepan niyajki itech okse xolal ompa itech altepet, nitekitia kampa kitokayaj xochit, algodón, ouat uan papas.

 Naui xiuit satepan, nimokepak itech xolal Obregón. Se notía, akin tapajtiaya uan kitekitiltiaya naualot, nechyoleuak maj nimokaua ikalijtik. Peuak nikochita tein amo kuali uan semi nimotayokoltij hasta niknekia nimomiktis. Se youak niktataujtij Dios uan nikiluij: “Notekotsin, komo yekmelauj tinemi, nikneki nimitsixmatis uan nimitstekitilis nochipaya. Komo moajsi se taneltokalis tein melauak, nikneki nikajsis”.

 Nochipa nechyolnotsaya nikixmatis Dios. Maski katka nikonet, niyajki miakkan kampa monechikouayaj tataman taneltokalismej. Sayoj ke amo nechmachtijkej nion teyi ika Biblia nion nechpaleuijkej maj nikixmati Dios. Itech seki taneltokalismej okachi kitemouayaj kipiaskej tomin uan itech okseki, auilnemiaj.

 Keman nikpiaya 19 xiujmej, se nocuñado nechiluij ke itaixpantijkauan Jiova kinextilijkaj tein Biblia tamachtia ika tiotsitsin. Nechixtajtoltilij Éxodo 20:4, 5, kampa kijtoua ke amo moneki timochijchiuiliskej tiotsitsin. Uan versículo 5 kijtoua: “Amo ximotankuaketsa ininixpan nion no xikintekitili, porin nejua Jiova nimoDios se niDios akin nitajtani maj sayoj nejua nechueyichiuakan”. Ompa, nocuñado nechtajtanij: “Komo Dios kikuiskia tiotsitsin uan ika kichiuaskia mouiskatekimej oso kinekiskia maj tikinkuikan uan maj ika tikueyichiuakan, ¿keyej techiluia maj amo tikuikan?”. Nejon kichiuak maj nitanemili. Ijkuak, peuak miakpa ika titajtouaj Biblia. Semi nikuelitaya ika nitajtos Biblia yejua ika keman ika timonojnotsayaj nikitaya ke amo tiuejkauayaj.

 Tepitsin satepan, niyajki iuan nocuñado itech se nechikol tein kipiaj itaixpantijkauan Jiova. Semi nikmoujkaitak tein nikitak uan tein nikakik. ¡Hasta akin telpochmej no tapaleuiayaj itech nechikol uan keman tajtouayaj sentaixpan semi kuali kichiuayaj! Semi nikmoujkaitak tamachtilis tein kiseliayaj akin ompa moajsiaj. Maski keman niyajki notson ueyak katka uan amo kuali nitakentiaya, nochin katkaj kualtakamej nouan. Hasta semej kalyetouanij nechyoleujkej maj nitakuati ininchan satepan ke tamik nechikol.

 Itech nemachtil ika Biblia iniuan itaixpantijkauan Jiova nikajsikamatik ke Jiova se toPopaj tetasojtakej akin toka motekipachoua maski tikpiaskej tomin oso amo, taman kemej tiixtamatij oso amo tikselijkej se ueyi nemachtil. Se Dios akin amo techikotasojta (Hechos 10:34, 35). Axkan kuali nimomachilia porin nikixmatik Dios.

 Nonemilis semi mopatak. Nikauak tachichinalis, tayil tein teuintij uan amo nikuiaok tajtolmej tein pitsotikej. Tein nikmachiliaya keman nimoskaltij peuak poliui uan no takochitalismej tein nikpiaya. Uan no, amo nikmachiliayaok ke amo teyi nikualtia, tein semi nechijtakojka. Tein kichiuak maj ijkon nimomachili yejua tein nikpanok keman katka nikonet uan porin amo nikselijka se kuali nemachtil.

 Axkan nikpia se kuali nonamik akin kitasojta Jiova uan akin semi nechpaleuia. Axkan nitekiti kemej takalpanojkej uan nikinkalpanoua nechikolmej uan ijkon uelis nikinyolchikauas uan nikinmachtis nokniuan. Kemej Biblia nechpaleuij maj axkan kuali nimomachili uan Dios nechmakak se kuali nemachtil, axkan amo nimopinaujmatiok.