Nochankauan kayomej Tonga, kampa moajsij 170 islas kampa ika sur itech oceano Pacífico. Amo tikpiayaj miak taman, kemej tit nion se carro. Sayoj ke kampa tinemiaj tikpiayaj at uan seki piomej. Keman amo timomachtiayaj, ome nokniuan uan nejua tikpaleuiayaj topopaj kampa tatokaya. Tiktokayaj pajpata oso platano uan no ñame, taro uan yuca, ijkon tikpaleuiayaj topopaj porin amo kitania miak tomin keman kichiuaya seki tekimej. Kemej oksekin akin no ompa nemiaj, tochankauan semi kipoujkaitayaj Biblia uan yayaj tiopan. Maski ijkon, tiknemiliayaj ke komo tiknekiaj tikpiaskej se okachi kuali nemilis monekia tiyaskej okse altepet.

 Keman nikpiaya 16 xiujmej, notío kichiuak tein monekia uan ijkon timokaltalitoj California (Estados Unidos). Ouij techkisak timomatiskej kemej akin ompa nemiaj. Maski tiktaniaj okachi tomin, kampa tinemiaj onkaya tatasojtilis, semi tateuiayaj uan kikuiaj drogas. Miakpa tikakiaj keniuj tatojtoponiayaj youak uan akin ompa nemiaj semi kinmouiliayaj akin ijkon kichiuayaj. Miakej kiuikayaj teposmej tein ika mopaleuiskej oso ika kiyektaliskej kuejmolmej. Nikpiaok se bala noyolixko porin se tonal nechtatoponilijkej.

 Keman katka nitelpoch, nimonejnemiltiaya kemej akin iniuan nimomachtiaya uan ijkon ueliskia nechseliskej. Peuak okachi niyouj iluimej, okachi nimouintiaya, okachi nitateuiaya uan nikuia drogas. Semi nikuia cocaína uan peuak nitachteki uan ijkon ueliskia nikouas droga. Maski nochankauan semi kiuelitaya yaskej tiopan, amo akin nechyolmajxitij nion nechpaleuij maj amo nikchiua tein amo kuali. Miakpa nechkitskijkej porin nitateuiaya. Nikpiaya miak kuejmolmej itech nonemilis. Tein melauj satepan hasta nechtsakkej.

 Se tonal, itech xiuit 1997, keman nitsaktoya, okse akin no ompa tsaktoya kiitak ke nikpiaya se Biblia. Katka Navidad uan miakej akin nemiaj tonga semi kipatiuitaya nejin iluit. Nechtajtanij ox nikmatia tein Biblia kijtoua keman Jesús nemik, sayoj ke amo nikmatik toni niknankilis. Nechnextilij kampa ika tajtoua keman Jesús yolik uan nikitak ke miak taman tein kichiuaj itech Navidad, amo ika tajtoua Biblia (Mateo 2:1-12; Lucas 2:5-14). Semi nikmoujkaitak uan nimotajtanij toni okseki taman kijtoua Biblia. Nejon takat yajtoya nechikolmej iniuan itaixpantijkauan Jiova tein kichiuayaj kampa titsaktoyaj uan nikixtalij iuan niyas. Itech nechikol, momachtijtoyaj amaix Apocalipsis. Maski amo teyi nikajsikamatik, nikitak ke nochi tein tamachtiayaj moajsia itech Biblia.

 Keman itaixpantijkauan Jiova nechiluijkej ox nikneki nikselis se nemachtil ika Biblia, amo niomeyolouak uan niman nikijtoj ke kemaj. Ijkuak, yekinika nikakik ke itech taltikpak mochiuas se xochital (Isaías 35:5-8). Nikajsikamatik ke komo niknekia nikyolpaktis Dios monekia nikpatas miak taman itech nonemilis. Nikajsikamatik ke Jiova amo kikauaskia maj nemi itech xochital aksa akin kichiua tein amo kuali kemej nejua (1 Corintios 6:9, 10). Yejua ika nikixtalij nimochikauas amo semi nikualanis uan amo nitachichinasok, amo nimouintis nion nikuis drogas.

 Itech xiuit 1999, achto ke nikisas kampa nitsaktoya, nechuikakej kampa kinajxitiaj akin ejkoj itech nejin altepet. Panok se xiuit amo nikinitak itaixpantijkauan Jiova. Sayoj ke senkis nikixtalijka niksentokas nikpatas nonemilis. Itech xiuit 2000, nechiluijkej ke amo ueliskiaok niyetos Estados Unidos uan nechkepkej Tonga.

 Keman niajsik Tonga, nikintemoj itaixpantijkauan Jiova uan ijkon ueliskia niksentokas nonemachtil ika Biblia. Semi nechyolpaktiaya tein nimomachtiaya uan semi nikmoujkaitak keniuj itaixpantijkauan Jiova akin nemiaj itech isla, no kikixtiayaj itech Biblia tein tamachtiayaj, ijkon kemej akin nemiaj Estados Unidos.

 Nopopaj semi kitelixmatiaj itech xolal porin kipiaya se ueyi tekit itech itiopan. Yejua ika nochankauan amo kimatiaj toni kichiuaskej uan kualaniaj porin nimouikaya iniuan itaixpantijkauan Jiova. Sayoj ke, satepan notatuan yolpakkej porin tayolmajxitilismej tein kipia Biblia nechpaleuijkej maj nikyektali nonemilis.

 Se taman tein semi ouij nechkisak yejua nikauas se tayil tein semi onkaya kampa ninemia. Takamej akin nemiaj Tonga miak horas itech semana tayiaj kava, se tayil tein kichijchiuaj ika inaluayo pimienta uan kichiua maj se sepoui. Axkan ke oksepa niyetoya Tonga, peuak niyouj mojmostaj itech youak kampa tayiaj kava uan nitayia hasta keman niixtayouaya. Nikpiaya nejon kuejmol porin nikinpiaya amo kuali tasojiknimej uan amo kintekipachouaya tein kijtoua Biblia. Satepan, itaixpantijkauan Jiova nechpaleuijkej maj nikajsikamati ke tein nikchiuaya kiyolxokoliaya Dios. Yejua ika peuak nikpata nonemilis uan ijkon ueliskia nikpias itatiochiualis Jiova.

 Peuak niyouj nochi nechikolmej tein kipiaj itaixpantijkauan Jiova. Nimouikas iniuan akin kiyolpaktiaj Dios nechpaleuij maj nikixnamiki tayejyekolismej. Itech xiuit 2002 nimoauij uan nimochiuak itaixpantijkauj Jiova.

 Nikseliani tein kuali porin Dios amo yolijsiui, ta Biblia kijtoua ke Jiova “amo yolijsiui [...] porin amo kineki maj nion akin ixpoliui; ta maj nochin moyolnonotsakan” (2 Pedro 3:9, Traducción del Nuevo Mundo). Yejuatsin ueliskia achtoya kiixpolos tein amo kuali tein onkak itech taltikpak, sayoj ke kemej amo kichiuak, kikauak maj taltikpakneminij kemej nejua mochiuakan itasojikniuan. Nikuelita niknemilis ke yejuatsin uelis kichiuas maj nikinpaleui oksekin maj motokikan iuan.

 Ika inepaleuil Jiova, axkan kuali nimonejnemiltia. Achto nitachtekia uan ijkon nikixtauaya drogas. Axkan nikinpaleuia oksekin maj kiixmatikan Jiova. Itech nechikol kampa mosentiliaj itaixpantijkauan Jiova, nikixmatik nonamik, Tea. Tikpiaj se konetsin uan semi tiyolpakij kemej kalyetouanij. Tikinmachtiaj tein Biblia kijtoua akin ompakauin nemij, ke uelis nemiskej nochipaya ika yolseuilis itech se xochital.