Nimoskaltij kampa katka koujyoj uan taseujtoya ompa Tampere, itech altepet Finlandia. Nochankauan amo semi taneltokayaj, sayoj ke kiitayaj ke monekia maj se momachti uan maj se tapoujkaita. Nomomaj kayot Alemania, yejua ika keman katka nikonet seki tonalmej niyaya Alemania, kampa nemiaj noueyitatuan.

 Nochipa nikuelitani nimauiltis, uan keman semi nikonetok nikatka nimauiltiayaya tataman neauiltilis. Sayoj ke, keman nikpiaya 14 xiujmej nikixtalij okachi nimauiltis tenis. Keman nikpiaya 16 xiujmej nimomachtiaya keniuj nimauiltis ojpa oso expa itech tonal. Kualkan ojpa nechmachtiaya aksa uan tiotak noselti nimomachtiaya. Semi nikuelitaya keniuj tataman kemej se mauiltia tenis. Nimauiltis tenis nechpaleuiaya maj okachi mochikauani nonakayo uan maj okachi kuali nitaixejekouani. Maski nikuelitaya nikisas iniuan notasojikniuan uan kemansa nitayis se cerveza, amo keman nikuik drogas nion niteltauanak. Okachi niktayekanaltiaya nimauiltis tenis.

 Keman nikpiaya 17 xiujmej, peuak nimauiltia itech ATP. a Miakpa nitatanik uan yejua ika peuak okachi nechixmatij itech noaltepeuj. Keman nikpiaya 22 xiujmej nipouiaya iniuan 50 akin okachi kuali mauiltiayaj tenis itech nochi taltikpak.

 Miak xiujmej, nimauiltito itech okseki altepemej. Maski kampa niyajka semi takualtsinkan katka, no nikitak ke onkayaj miak kuejmolmej, miakej kikuij drogas, mochiua miak taman tein kiuejueloua taltikpak uan onkak tachtekilis uan teikamauiltilis. Kemej neskayot, ompa Estados Unidos techiluijkej maj amo tiyanij itech seki xolalmej porin ueliskia techpanos teisa. Nochi nejon nechtayokoltiaya. Uan no, maski nikchiujtoya se taman tein semi nikuelitaya, keman tamia tonal nikmachiliaya ke teisa nechpolouaya.

 Nonovia, Sanna, momachtijtoya Biblia iniuan itaixpantijkauan Jiova. Maski amo nikchiaya maj kiuelitani momachtis Biblia, amo nikitaya ke amo kuali yetoya. Itech xiuit 1990 timonamiktijkej uan se xiuit satepan mochiuak itaixpantijkauj Jiova. Nejua amo semi nitaneltokaya, maski kemaj nikneltokaya Dios. Nikelnamiki ke noueyinan akin kayot Alemania semi kiixtajtoltiaya Biblia uan hasta nechmachtij keniuj nikchiuas netataujtil.

 Se tonal, seki namikuanij akin itaixpantijkauan Jiova techyoleujkej ininchan. Takat, akin monotsa Kari, ika nechnojnotsak tein Biblia achtook kijtoj ke panoskia itech itamian tonalmej (2 Timoteo 3:​1-5). Semi nikmoujkaitak, porin nikajsikamatik keyej noyampa semi mochiua tein amo kuali. Nejon tonal amo ika titajtojkejok taneltokalis. Sayoj ke ijkuak peuak nitajtoua iuan Kari ika tein tamachtia Biblia. Nochi tein nimomachtiaya nikitaya ke taixejekol. Kemej nikpiaya miak tekit uan nochipa monekia nikisas, amo nochipa uelia timoitayaj. Maski ijkon, Kari amo keman mosenkauak. Ika cartas kinankiliaya netajtanilmej tein nikchiuiliaya keman timomachtiayaj. Nikitak ke taixejekol kemej Biblia kinankilia netajtanilmej tein okachi monekij. Yolik nikajsikamattiyajki katiyejua tamachtilis tayekantok itech Biblia: ke iTekiuajyo Dios kichiuas maj mochiua itanejnekilis. Nikixmatis itokay Dios, Jiova, uan nikitas nochi tein toka kichiuani semi nechyololinij (Salmo 83:18). Tein okachi nechyololinij yejua inemilis Jesús tein Dios kitemakak, tein amo se taman tein ipa monekia kichiuas, ta se taman kemej kinextij ke techtasojta (Juan 3:​16). No nikajsikamatik ke ueliskia nimochiuas niitasojikniuj Dios uan ninemis nochipaya itech se xochital kampa onkas yolseuilis (Santiago 4:8). Yejua ika, peuak nimotajtania: “¿Keniuj uelis niknextis ke nimotasojkamati?”.

 Nitanemilij itech tein nikchiujtoya ika nonemilis. Itech Biblia nimomachtij ke okachi tiyolpakij keman tiktemakaj teisa uan niknekik nikintapouis oksekin tein nimomachtijtoya (Hechos 20:35). Kemej nochipa niyaya uejka nimauiltiti, kemej 200 tonalmej itech xiuit amo niyetoya nokalijtik. Nochi tein tikchiuayaj kemej kalyetouanij mouikaya ika tein nejua nikchiuaya: nimomachtis keniuj nimauiltis, tein ixyetoya nikchiuas uan nimauiltis tenis. Nikajsikamatik ke monekia nimopatas.

 Nikmatia ke amo nochin kiajsikamatiskiaj keyej niknekia niktekitilis Dios uan amo nimauiltisok tenis kampa ueliskia niktanis okachi tomin. Sayoj ke, okachi kuali nikixmatis Jiova uan ninemis nochipaya okachi tayekantoya ke tein yeski netetayokolil tein ueliskia niktanis keman nimauiltiskia tenis; yejua ika amo monekiaok niknemilis toni nikchiuas. Nikixtalijkaya amo nikakis tein oksekin kijtoskiaj. Nejua nikixtalij toni nikchiuas. Se tajkuilol itech Biblia tein nechpaleuij maj amo nikintajtolkakini yejua Salmo 118:6, tein kijtoua: “Jiova nouan yetok; amo nimouis. ¿Toni uelis nechchiuilis taltikpaknenkej?”.

 Itech nejon tonalmej, sekin akin kiixyekanayaj neauiltilis nechiluijkej ke ueliskia niktanis miak tomin tein nechpaleuiskia maj nochipa nimauilti tenis uan maj amo nechtekipacho keniuj timoixpanoltiskiaj tel miak xiujmej. Sayoj ke nikixtalijkaya tein nikchiuaskia. Nikiniluij ke amo uan no nikisak itech ATP. Niksentokak nimomachtij Biblia uan nimoauij kemej itaixpantijkauj Jiova itech tonal 2 metsti julio xiuit 1994.

 Nejua amo nikpanok se ueyi ouijkayot uan ijkon peuak niktemoua Dios. Nion no nikijtoua ke niktemojtoya nikixmatis tein melauak. Niknemiliaya ke nikpiaya se kuali nemilis uan ke amo teyi nechpolouaya. Sayoj ke, keman amo nikchiaya, uan kemej yeskia tamachtilis tein melauak kichixtoya maj nikajsi, nikajsikamatik ke uelis tiyolpakiskej itech tonemilis. Axkan okachi kuali ninemi, kemej amo keman niknemiliaya. Okachi kuali timouikaj kemej kalyetouanij. Uan semi nimotasojkamati porin eyi nokoneuan kichiujkej tein nejua nikchiuak, amo mochiujkej mauiltianij, ta mochiujkej itatojtokakauan Cristo.

 Niksentoka nikuelita nimauiltis tenis. Itech xiujmej tein panouanij timoixpanoltianij ika seki taman tein ueli nikchiua itech nejin neauiltilis. Nitaixyekanani kampa mauiltiaj tenis uan no nikinmachtiani sekin keniuj mauiltiskej. Amo niktayekanaltiaok tenis. Achto nimomachtiaya miak horas itech semana porin niknekia okachi kuali nimauiltis uan nitatanis. Axkan nitanojnotsa miak tonalmej uan nikinpaleuia oksekin maj kiixmatikan uan maj kichiuakan tein Biblia tamachtia, tein kipatak nonemilis. Niktayekanaltis kuali nimouikas iuan Jiova uan nikintapouis oksekin ke satepan uelis tikpiaskej se kuali nemilis, kichiua maj semi niyolpaki (1 Timoteo 6:​19).