“Komo yekmelauj tikneki tikixmatis Dios, ximokaua iniuan itaixpantijkauan Jiova”. Semi nikmoujkakakik nejon tajtolmej. Ijkuak, seki tonalmejya nimomachtijtoya iniuan itaixpantijkauan Jiova. Sayoj ke uelis nankiajsikamatiskej keyej nikmoujkakakik nejon, komo yekinika namechtapouia seki taman tein nikpanok.

 Niyolik itech xolal Quezaltepeque tein poui El Salvador. Notatuan kinpiakej 15 ininkoneuan, uan nejua nichikuasentika. Notatuan mochikaujkej nechmachtiskej maj kuali nimonejnemilti uan maj amo niktapanauili tanauatilmej. Uan no, se itaixpantijkauj Jiova akin motokaytia Leonardo uan ome siuamej akin no itaixpantijkauan Jiova kemansa techkalpanouayaj uan technojnotsayaj ika Biblia. Sayoj ke nejua amo nikchiuak tein nechmachtijkej uan miakpa amo kuali nitaixpejpenak. Keman nikpiaya 14 xiujmej, peuak nitauana uan nikui drogas iniuan akin nimouikaya kampa nimomachtiaya. Sejse kistiyajkej kaltamachtiloyan uan mokuikej iniuan okseki telpochmej akin kichiuayaj tein amo kuali, uan nejua no ijkon nikchiuak. Nochipa tiyetoyaj ojti, uan tikinchikaujkauiayaj taltikpakneminij maj techmakanij tomin uan titachtekiaj, porin tiknekiaj tikouaskej drogas uan tayil tein teuintij.

 Akin iniuan nimouikaya mochiujkej kemej nochankauan. Niknemiliaya ke monekia nochipa nikinpaleuis. Kemej neskayot, se tonal, semej telpochmej akin kikuika drogas kiteuij se akin nemia kampa ika nejua ninemia. Keman moteuijtoyaj, takat kikitskij notasojikniuj uan kinotsak policía. Kemej nitelkualanik, peuak nikuijuiteki icarro ika se kouit porin niknekia maj kikajkauani notasojikniuj. Takat nechtataujtiaya maj nimotsakuiliani keman nejua niktajtapantoya ventanas uan nikuejuelojtoya nochi icarro, sayoj ke amo nikakik.

 Se tonal, timoteuijkej iniuan policías. Keman niknekia nikintamotilis se bomba tein tejuan tikchijchiujkaj, amo nikyekmati keniuj panok, sayoj ke toponik nomako. Sayoj nikelnamiki ke nikitak ke noyekmay kokotokak uan satepan niixtayouak. Keman niijsak kaltapajtiloyan, nechiluijkej ke amo nikpiayaok nomay, ke nonakas uan noixtololo tein noyekmakopaka moijtakojkaj uan amo nitakakiaok nion niyektachiayaok. Nikpiaya 18 xiujmej.

 Maski semi nimokokojka, satepan ke nikisak kaltapajtiloyan oksepa peuak nimouika iniuan nejon telpochmej. Sayoj ke tepitsin satepan, policías nechkitskijkej uan nechtsakkej. Ompa peuak okachi nimokui iniuan akin kitelchiuayaj tein amo kuali. Nochi tonal tisenyetoyaj, kualkan hasta keman yaya tikochitij. Keman tisentakuayaj kualkan, niman tipeuayaj tikchichinayaj marihuana.

 Keman nitsaktoya, Leonardo yajki nechitato. Keman titajtojtoyaj, kiitak se tatuaje itech noyekmay uan nechtajtanij: “¿Tikmati toni kijtosnekij nejon eyi puntos tein timotalilij?”. Nejua niknankilij: “Kemaj: auilnemilis, drogas uan rock and roll”. Sayoj ke Leonardo kijtoj: “Nejua nikijtoskia ke kijtosnekij kaltapajtiloyan, kampa tetsakuaj uan mikilis. Tiyetoyaya kaltapajtiloyan uan axkan kampa tetsakuaj. Tikmatiya toni kisentoka”.

 Tein nechiluij Leonardo nechtanemililtij. Melauak tein kijtouaya: ika tein nikchiujtoya noselti niktemojtoya nimomiktis. Leonardo nechyoleuak maj iuan nimomachti Biblia uan nikiluij ke kemaj. Tein nimomachtij kichiuak maj nimopata. Kemej neskayot, Biblia kijtoua ke “takan timouikatinemij iuan nekes ten amo yolchipauke, ijkuakon nojonkes techmajmauaske ika tajtakolme” (1 Corintios 15:33). Yejua ika, tein yekinika monekia nikchiuas yejua nikintemos okseki notasojikniuan. Kemej niknekia ijkon nikchiuas, amo niyayaok ininnechikoluan akin iniuan nimokuia uan peuak niyouj ininnechikoluan itaixpantijkauan Jiova tein kichiuayaj ompa kampa titsaktoyaj. Ompa nikixmatik Andrés, akin no tsaktoya uan ompa moauijka kemej itaixpantijkauj Jiova. Nechyoleuak maj iuan nitakua kualkan. Ijkuak peuak amo nikchichinaok marihuana niman keman tanesia. Okachi kuali, Andrés uan nejua kualkampa mojmostaj ika titajtouayaj se tajkuilol tein moajsi itech Biblia.

 Akin achto iniuan nimouikaya niman kiitakej ke nimopatatoya. Yejua ika, semej akin taixyekanaya nechiluij ke monekia tajtos nouan. Nimomoujtij porin amo nikmatia toni nechchiuiliskia keman kimatiskia tein nikixtalijtoya, porin semi ouij maj se mokixti keman iniuan se mokui. Nechiluij: “Tikitanij ke amo tiuitsaok tonechikoluan, ta tiyouj ininnechikoluan itaixpantijkauan Jiova. ¿Toni tiknemilia tikchiuas?”. Nikiluij ke niknekia niksentokas nimomachtis Biblia uan nikpatas nonemilis. Nikmoujkakakik maj nechiluiani ke yejuan amo teyi nechchiuiliskiaj komo niknextiaya ke yekmelauj niknekia nimochiuas itaixpantijkauj Jiova. Ompa nechiluij: “Komo yekmelauj tikneki tikixmatis Dios, ximokaua iniuan itaixpantijkauan Jiova. Tikchiaj amo xikchiuaok tein amo kuali. Kuali tein tikixtalijtok uan kampa tiyajtok. Itaixpantijkauan Jiova uelis mitspaleuiskej. Nimomachtij iniuan ompa Estados Unidos, uan seki nochankauan itaixpantijkauan Jiova. Amo ximoui. Xiksentoka ijkon”. Nimouiaok, sayoj ke no semi niyolpakia. Niktasojkamatilij Jiova. Nimomachilij kemej se tototsin akin kimajkaujkaj kampa tsaktoya uan ijkuak nikajsikamatik tein kijtoj Jesús: “Nankajsikamatiyaske de ne Tajtoltsin ten yekmelau. Uan ne yekmelau Taltoltsin, yejua ne namechtojtomatiu” (Juan 8:32).

 Sayoj ke, sekin akin achto katkaj notasojikniuan nechyejyekouayaj keman kinekiaj nechmakaskej drogas. Uan kemansa nikselij. Sayoj ke, ijkon kemej panokej tonalmej uan semi niktataujtij Dios, uelik nikauak drogas (Salmo 51:10, 11).

 Keman nechkixtijkej, miakej kinemilijkej ke oksepa nimonejnemiltiskia kemej achto, sayoj ke amo nikchiuak. Okachi kuali, miakpa niyajka kampa tetsakuaj uan nikintapouito oksekin akin tsaktoyaj tein nimomachtijka itech Biblia. Satepan, akin achto katkaj notasojikniuan kiajsikamatkej ke nimopataka. Sayoj ke, akin nechtauelitakej keman nikchiuaya tein amo kuali, amo ijkon kinemiliayaj.

 Se tonal nitanojnotstoya iuan okse itaixpantijkauj Jiova uan sepasaj techyoualojkej miakej akin techtauelitakaj nejua uan akin achto iniuan nimokuia. Kiuikayaj teposmej uan kinekiaj nechmiktiskej. Tokniuj akin iuan niyaya kinmelauilij ika poujkaitalis sayoj ke ika yolchikaualis ke nejua amo nimokuiaok iuan nion akin. Keman kinnojnotstoya, nejua niktemouaya niyolseujtos. Satepan ke nechmaakej uan nechiluijkej maj amo nimokepaniok ompa, nejon takamej kijkuanijkej ininteposuan uan techkaujkej maj tiyakan. ITajtol Dios kichiujka maj nimopata porin achto niktemoskia nimomakepas. Sayoj ke axkan niktakamati tayolmajxitilis tein kitemaka Biblia itech 1 Tesalonicenses 5:15: “Kuak aksa namechchiuilis tensa ika ten amo kuali, ijkuakon ma amo aken no ijkon ma kichiualti. Ta, kachi kuali xiktemokan keniu para nanmopaleuijtinemiske se uan okse iuan nochi in taltikpakuani”.

 Keman nimochiuak itaixpantijkauj Jiova, nochipa nimochikauani nikchiuas tein melauak. Ouij nechkisani. Sayoj ke ika inepaleuil Jiova, tein tayolmajxitia Biblia uan ininnepaleuil akin axkan notasojikniuan, uelini nikchiuani. Amo niknekiskia oksepa ninemis kemej achto (2 Pedro 2:​22).

 Achto semi nitateuiaya uan nikualania. Senkis nikmati ke amo niyoltoskiaok komo niksentokaskia ijkon nimonejnemiltiskia. Tein nimomachtij itech Biblia senkis nechpatak. Nikauak drogas uan okseki tachiualismej tein amo kuali uan nimomachtij kuali nikinnojnotsas akin nechtauelitakaj keman nikchiuaya tein amo kuali (Lucas 6:27). Axkan nikinpia notasojikniuan akin nechpaleuiaj maj nikpia kualtsitsin kualneskayomej (Proverbios 13:20). Semi niyolpaki porin niktekitilia se Dios akin nechtapojpoluiani nochi tein amo kuali tein nikchiuani (Isaías 1:18).

 Itech xiuit 2006, nikselij se tamachtilis tein kiseliaj takamej akin amo kipiaj ininnamik. Seki xiujmej satepan, nimonamiktij iuan se kuakualtsin siuat uan tikpiakej se siuapil. Axkan miak notonaluan nikui keman nikinmachtia oksekin tayolmajxitilismej tein kipia Biblia tein nejua nechpaleuijkej. No nitayekankej itech nonechikol uan nimochikaua nikinpaleuis telpochmej uan ichpochmej maj amo kiixpejpenakan tein amo kuali kemej nejua nikchiuak. Axkan amo niktemojtokok nimomiktis, ta niktemojtok nikselis nemilis nochipaya tein Dios motenkaua itech Biblia.