Niyolik ompa San Juan Chancalaíto, se xolalkonet tein poui Chiapas (México). Nochankauan moixmatij kemej akin tajtouaj chol tein kisak itech tajtol maya. Notatuan kinpiakej 12 ininkoneuan, uan nejua nimakuiltika. Keman katka nikonetsin nokniuan uan nejua timomachtiayaj Biblia iniuan itaixpantijkauan Jiova. Sayoj ke amo niktakamatik tein Biblia tayolmajxitia.

 Keman nikpiaya 13 xiujmej, nikuiaya drogas uan nitachtekia. Keman nikpiaya nejon xiuit, nikisak nokalijtik uan niyajtinemia kampa yeski. Keman nikpiaya 16 xiujmej peuak nitekiti kampa kitokayaj marihuana. Se youak, keman nikuikayaya nitekititoya ompa kemej se xiuit, seki takamej taixnamikinij akin kipiayaj teposmej tein ika tateuiskej, techtatojtoponilijkej keman tikuikayaj miak marihuana itech se tsikitsin barco. Niktemoj nimopaleuis yejua ika nimopankajkauak itech ueyiat uan atampa nipanotiyajkej hasta nikisato uejka. Satepan nicholoj Estados Unidos.

 Keman ompa niyetoyaya, niksentokak nikichtakanamakaya droga uan nimokuejmolkalakiaya. Keman nikpiaya 19 xiujmej nechkitskijkej porin nitachtekia uan niknekia nitemiktis. Ompa itech cárcel nimosentilij iniuan oksekin akin no kichiuayaj tein amo kuali uan niksentokaya nitateuiaya. Yejua ika, tekiuanij nechuikakej Lewisburg (Pensilvania) itech se cárcel kampa semi tajpixtoyaj.

 Ompa Lewisburg kampa nitsaktoya, okachi amo kuali nimonejnemiltiaya. Kemej nikpiayaya tatuajes tein nechteixmatiltiaya ke nipouia iniuan sekin akin tamouililmej, amo nechouijmakak nimosentilis iniuan. Okachi nitateuiaya uan nochipa nimokuejmolkalakiaya. Se tonal, peuak timoteuiaj kalixpan itech cárcel iniuan sekin akin techixnamikiaj, uan timokuikej ika koujmej tein ika mauiltiaj beisbol uan pesas tein kikuij gimnasio. Semi eliuis timoteuijkej. Tajpianij monekik techtsakuiliskej ika se gas tein semi teixkokoua. Satepan, nechkauatoj kampa tsaktoyaj akin okachi tamouililmej. Semi ijsiujka nikualania uan ika notajtoluan niknextiaya ke amo nitapoujkaitaya. Ika tein yeski taman niman nitateuiaya. Tein melauj nejon nechpaktiaya. Uan nion tepitsin nechyolkokouaya tein nikchiuaya.

 Ompa nochipa nitsaktoya, sayoj tepitsin nechkauayaj maj nikisa itech tonal. Kemej amo uelia nikisaya, peuak nikixtajtoltia Biblia. Satepan, se tajpixkej nechmakak amatajkuilol Usted puede vivir para siempre en el paraíso en la Tierra. a Ijkon kemej nikixtajtoltijtiaya, nikelnamikia nochi tein nimomachtijka iniuan itaixpantijkauan Jiova keman katka nikonet. Nikajsikamatik ke semi tetayokoltij kemej nimoajsia porin semi nitateuiaya. No inintech nitanemilij nochankauan. Kemej ome nokniuan mochiujkaj itaixpantijkauan Jiova, niknemilij: “Yejuan nemiskej nochipaya”. Yejua ika nimotajtanij: “¿Uan nejua keyej amo?”. Itech nejon tonal senkis nikixtalij nimopatas.

 Sayoj ke, nikmatia ke komo niknekia nimopatas, monekiskia maj nechpaleuikan. Yejua ika, yekinika taman tein nikchiuak yejua niktataujtis Jiova maj nechpaleui. Satepan, niktitanik se amat itech sucursal tein kipiaj itaixpantijkauan Jiova ompa Estados Unidos kampa nitajtanik se nemachtil ika Biblia. Yejuan kinauatijkej se nechikol tein yetoya kampa ika nimoajsia maj nechkalpanotij. Itech nejon tonalmej, sayoj nochankauan kinkauayaj maj nechkalpanokan. Yejua ika, se itaixpantijkauj Jiova peuak nechtitanilia amamej tein ika nechyolchikauaya uan amaixmej tein ika tajtouayaj Biblia tein nechpaleuijkej maj niksentoka nikneki nimopatas.

 Niknextij ke niknekia nimopatas keman nikixtalij nikinkauas akin iniuan nimouikaya miak xiujmej. Akin techixyekanaya keman timosenkuitinemiaj no tsaktoya ompakauin kampa nimoajsia, yejua ika nitajtoj iuan uan nikiluij ke niknekia nimochiuas itaixpantijkauj Jiova. Nikmoujkakakik tein nechnankilij. Nechiluij: “Komo melauj tein tikijtoua, xikchiua. Amo nikneki niktsakuilis aksa akin kineki motokis iuan Dios. Sayoj ke komo sayoj tiktemojtok titechkauas, tikmattokya toni mitspanos”.

 Itech ome xiuit tein panok, tajpianij kiitakej ke nikpatatoya nonemilis. Yejua ika okachi kualtakamej katkaj nouan. Kemej neskayot, amo nechmailpiayaj ika tepos keman nechuikayaj kampa timopakayaj. Se tajpixkej no nechyolchikauak maj niksentoka nimopata. Uan no, nechtsakuatoj kampa amo semi tajpiayaj uan ompa nimoajsik se xiuit. Itech xiuit 2004, satepan ke nitsaktoya majtakti xiuit, nechkixtijkej uan nechkauatoj México ika se autobús tein ompa kipiaj.

 Tepitsin satepan ke niajsik México, nikajsik se Kali Kampa Mosentiliaj iTaixpantijkauan Jiova. Yekinika nechikol niyajki ika tilmaj tein monekia nimotalilis kampa nitsaktoya porin amo nikpiaya okse tein kuali moitaya. Maski amo kuali nimoitaya, itaixpantijkauan Jiova nechselijkej ika netasojtalis. Keman nikitak nejon, nikmachilij ke niyetoya iniuan akin yekmelauj kichiuaj kemej Cristo (Juan 13:35). Itech nejon tonal, tayekananij itech nechikol kiixtalijkej maj aksa nechmachti. Se xiuit satepan, itech tonal 3 metsti septiembre xiuit 2005, nimoauij kemej itaixpantijkauj Jiova.

 Itech metsti enero xiuit 2007, nikpeualtij tekit kemej precursor, nejin kijtosneki ke nikteixmatiltiaya tein kijtoua Biblia 70 horas itech metsti. Itech xiuit 2011, niktamiselij Tamachtilis ika Biblia tein Kinmakaj Takamej akin Ininselti (axkan motokaytia Tamachtilis tein Kiseliaj akin Kiteixmatiltiaj iTekiuajyo Dios). Nejin tamachtilis semi nechpaleuij maj ueli nikchiua tataman tekit itech nechikol.

 Itech xiuit 2013, nimonamiktij iuan Pilar akin semi niktasojta. Keman niktapouia keniuj nimonejnemiltiaya achto, nechixuetskilia uan nechiliuia ke amo ueli kineltoka ke ijkon nimonejnemiltij. Amo sepaok ijkon nimonejnemiltiani kemej achto. Nonamik uan nejua tikneltokaj ke nemilis tein axkan nikpia kinextia ke Biblia ueli kipata se inemilis (Romanos 12:2).

 Achto nimoajsia kemej kijtoj Jesús itech Lucas 19:10: “Niuala nikan taltikpak para nikintemoko uan nikinmakixtis nekes ten poliutokke”. Axkan amo nikmachilia ke nipoliujtokok. Amo nitaijtakojtinemiok. Ika inepaleuil Biblia, axkan yekmelauj niyolpaki itech nonemilis, kuali nimouika iniuan nochin uan tein okachi moneki, kuali nimouika iuan noDios, Jiova.