Itech xiuit 2014, Oloch Taojtokaltianij akin kinixyekanaj itaixpantijkauan Jiova kiixtalijkej maj moteixmatilti tein tamachtia Biblia kampa okachi uejka ompa Europa uan Norteamérica (Hechos 1:8). Yekinika moixtalij maj motanojnotsa itech seki xolalmej ompa Alaska (Estados Unidos), Laponia (Finlandia) uan Nunavut uan xolalmej kampa ika norte Canadá.

Miak xiujmejya itaixpantijkauan Jiova tanojnotsanij itech nejin xolalmej. Sayoj ke amo mokauayaj miak tonalmej uan kemansa sayoj kitemakayaj amaixmej tein ika tajtouaj Biblia.

Yejua ika, sucursales tein kiixyekanaj tekit tein kichiuaj itaixpantijkauan Jiova kampa ika norte kinyoleuaj akin tanojnotsaj miak tonalmej (precursores) maj mokauakan eyi metsti oso okachi itech nejon xolalmej. Komo miakej akin ompa nemij kinekij momachtiskej Biblia, precursores uelis mokauaskej okachi tonalmej uan hasta kichiuaskej nechikolmej kampa nochin uelis yaskej.

Tein melauj, akin nemij ompa norte kipanouaj seki taman ouijkayomej. Ompa Barrow tapaleuiaj ome precursores, se kayot California kampa ika sur uan okse kayot Georgia (Estados Unidos), kampa takauani. Keman okachi taseseya ompa Barrow, ajsik hasta 38 °C bajo cero. Maski ijkon, seki metsti satepan keman ajsikej, kinkalpanojkajya tel miakej uan kipeualtijkajya naui nemachtilmej ika Biblia iniuan akin ompa nemij. Semej yejua se telpoch akin itokay John iuan inovia. Yejuan momachtiaj Biblia ika amatajkuilol ¿Toni yekmelauj tamachtia Biblia?, uan John kintapouia itasojikniuan uan akin iniuan tekiti tein momachtijtok. No kiixtajtoltia itech JW Library folleto Maj timomachtikan itajtol Dios mojmostaj itech iteléfono.

Kemej ompa Nunavut (Canadá) amo onkak carreteras tein ajsij Rankin Inlet, ome precursores yajkej itech avión hasta itech nejon xolal kampa nemij esquimales, uan kipeualtijkej miakej nemachtilmej ika Biblia. Keman se takat kiitak video ¿Keniuj mochiuaj tonechikoluan?, tajtanik kemanian kichijchiuaskiaj itech xolal se Kali kampa tiMosentiliaj. Uan kijtoj: “Komo nikauin nimoajsiok keman nankichijchiuaskej, niyas nechikolmej”.

Ome precursores akin tapaleuiaj ompa Savukoski (Finlandia), kijtojkej: “Semi taseseya uan onkak miak sekti”. Itech nejin xolal onkakej okachi renos ke taltikpakneminij. Sayoj ke precursores kijtojkej ke ajsikej keman okachi monekia. ¿Keyej? Yejuan kijtojkej: “Uelik titanojnotskej itech nochi xolal. Nochipa kijkuaniaj sekti uan kinyekpiaj ojmej tein ajsij kampa okachi uejka. Kemej semi taseseya, nochin okachi yetokej ininkalijtik”.

Ompa norte, miakej kimoujkaitaj maj titanojnotsakan ika Biblia kampa okachi uejka. Ome precursores kikalpanojkej se siuat akin tekiuajti itech se xolal ompa Alaska. Satepan, itech se red social kuali ika tajtoj tein monojnotsak iniuan itaixpantijkauan Jiova uan kitalij se taixkopin kampa ixnesi tratado ¿Toni itekiuajyo Dios?

Ompa Haines (Alaska), ome precursores kichiujkej se nechikol itech se biblioteca kampa mosentilijkej chikueyin. Itech se periódico tein ompa mochijchiua moijtoj ke ome takamej kayomej Texas uan Carolina del Norte ueliskia yaskej ininkalijtik taltikpakneminij uan kinmachtiskej ika Biblia. Satepan moijtouaya: “Komo nankinekij nankimatiskej okachi, xikonitakan jw.org”.