Itech Tlen omoijkuilo ika tlajtoli hebreo uan arameo (tlen noijki moixmati ken Antiguo Testamento), itoka toTajtsin Dios ijkuilitok kanaj 7,000 veces ika ninmej letras יהוה. Ninmej símbolos kijtosnekij naui consonantes hebreas uan moixmati ken Tetragrámaton. Itech Traducción del Nuevo Mundo, ninmej naui letras motlajtolkuepaj ken “Jehová”. Nin tokayotl ye tlen okachi miak ijkuilitok itech Biblia. Akinmej okijkuilojkej Biblia tlatlamantli okitokayotijkej toTajtsin Dios, ken akin kipia sapanoa miak Chikaualistli, akin okachi Ueyititok uan toTeko. Pero san Tetragrámaton okitekitiltijkej pampa itoka toTajtsin Dios.

Jehová okinnauati akinmej okijkuilojkej Biblia ma kijkuilokan itoka. Se neskayotl, okinauati teotlajtojki Joel ma kijkuilo: “Nochi akin kijtos itoka Jehová momakixtis” (Joel 2:32). Uan noijki Jehová okinauati salmista ma kijkuilo: “Pampa tlaltikpaktlakamej ma kimatikan te, akin motoka Jehová, san te okachi tiUeyititok ipan nochi Tlaltikpak” (Salmo 83:18). San itech amochtli Salmos ijkuilitok itoka toTajtsin Dios kanaj 700 veces, uan itech nin amochtli itekipanojkauan toTajtsin Dios okijkuilojkej tlakuikalmej uan xochitlajtolmej tlen otlakuikayaj noso okijtoayaj ialtepe. Pero ¿tleka itech miakej Biblias amo ijkuilitok itoka toTajtsin Dios? ¿Tleka Traducción del Nuevo Mundo kitlalia tokayotl Jehová? ¿Uan tlen kijtosneki nin tokayotl?

¿Tleka itech miakej Biblias amo ijkuilitok itoka toTajtsin Dios? Onka miak tlamantli tlen kiteititia tleka. 1) sekimej mokuayejyekoaj toTajtsin Dios akin kipia sapanoa miak Chikaualistli amo moneki kipias itoka tlen ika kixmatiskej. 2) oksekimej kichiuaj ijkon ken judíos, uelis pampa momojtiaj kisokiotiskej itoka toTajtsin Dios. 3) sekimej kijtoaj amo uelis tikmatiskej ken omoijtoaya itoka toTajtsin Dios, kijtoaj  okachi kuali tlatlamantli kitokayotiskej ken toTeko noso Dios. Pero tlen kijtoaj amo itlaj ipati pampa ma kipojpolokan itoka toTajtsin Dios. Ma tikitakan tleka.

• Katej akinmej kijtoaj toTajtsin Dios amo moneki kipias itoka tlen san ye kinamiki uan amo kitaj tlen kijtoaj amatlajkuilolmej tlen yiuejkika omoijkuilojkej, ken tlen omoijkuilojkej achto ualaskia Cristo, kanin ijkuilitok itoka toTajtsin Dios. Ken yotikitakej, ineuia toTajtsin Dios okichi ma moijkuilo itoka itech iTlajtol kanaj 7,000 veces. Ik non, kuali tikitaj ye kineki ma tikixmatikan itoka uan ma tiktekitiltikan.

• Akinmej kitlajtolkuepaj Biblia kikixtiaj itoka toTajtsin Dios pampa tlen kineltokaj judíos uan amo kita se tlamantli tlen miak ipati. Maski sekimej judíos akinmej okinchiuayaj copias itech iTlajtol toTajtsin Dios amo okinekiayaj kijtoskej itoka toTajtsin Dios pero kema okitlaliayaj itech Biblias. Amo uejka itech mar Muerto itech altepetl Qumrán, okinmajsikej miakej rollos tlen yiuejkika okinmijkuilojkej uan kanin miak uelta ijkuilitok itoka toTajtsin Dios. Sekimej tlen kitlajtolkuepaj Biblias okikixtijkej itoka toTajtsin Dios uan okitlalijkej TOTEKO ika mayúsculas kanin onesiaya. Pero tla kimatij itoka toTajtsin Dios sapanoa miak uelta ijkuilitok itech Biblia, ¿tleka kipatlaj noso kikixtiaj? ¿Akin okinnauati ijkon ma kichiuakan? San yejuan kimatij.

• Uan eyi, katej akinmej kijtoaj amo uelis motekitiltis itoka toTajtsin Dios pampa amo momati ken omoijtoaya, pero kema kitekitiltiaj itoka Jesús. Itech achto siglo tlatlamantli okijtoayaj itoka Jesús, amo ken axkan kijtoaj. Akinmej okichiuayaj ken Cristo uan otlajtoayaj hebreo uelis okijtoayaj itoka Jesús ken “Yeshúa”. Uan uelis okijtoayaj Cristo (noso Mesías) ken “Maschíaj”. Uan akinmej okichiuayaj ken Cristo uan otlajtoayaj griego okijtoayaj “Iēsóus Kjristós”, uan akinmej otlajtoayaj latín okijtoayaj “Iesus Christus”. Jehová okinnauati akinmej okijkuilojkej Biblia ma kijkuilokan itoka ken omotekitiltiaya ika tlajtoli griego. Yejuan amo okijkuilojkej ken okijtoayaj ika tlajtoli hebreo, okijkuilojkej ken tlaltikpaktlakamej otlajtoayaj. Noijki ijkon panoa ika itoka toTajtsin Dios: iTlaixpantijkauan Jehová okitakej kuali kajki ma kitekitiltikan tokayotl Jehová maski amo kuali momati tla ijkon okijtoayaj itech tlajtoli hebreo tlen yiuejkika otlajtoayaj.

¿Tleka Traducción del Nuevo Mundo kitekitiltia tokayotl Jehová? Ika español, naui letras tlen kipia Tetragrámaton (יהוה) moijkuiloaj ika consonantes YHWH (noijki YHVH noso JHVH). ¿Uan tleka amo kipia vocales? Pampa yiuejkika tlajtoli hebreo san omoijkuiloaya ika consonantes. ¿Uan ken okimatiayaj tlaltikpaktlakamej ken kitlajtoltiskiaj non tlajtoli? Okimatiayaj pampa mojmostla okijtoayaj.

Kanaj mil xiuitl satepan ijkuak otlanki itech Tlen omoijkuilo ika tlajtoli hebreo uan arameo, sekimej ixtlamatkej judíos okichijkej se  tlamantli tlen kinpaleuiskia ma kitlajtoltikan tlajtoli hebreo. Yejuan otlamachtijkej tlajtolmej uelis kintlaliliskej puntos noso signos pampa uelis momatiskia tlen vocales kintekitiltiskiaj itech sejse tlajtoli. Pero itech nonmej tonalmej miakej judíos okineltokayaj tlen oksekimej okijtoayaj: amo kuali okatkaj ma kijtokan itoka toTajtsin Dios, ik non, okipatlayaj ika okseki tlajtolmej. Nesi ijkuak okijkuiloayaj Tetragrámaton, nonmej naui consonantes okintlaliliayaj okseki vocales tlen ika moijkuiloa itoka toTajtsin Dios. Ik non, amatlajkuilolmej tlen yiuejkika okinmijkuilojkej uan kinpiaj nonmej puntos, amo techpaleuiaj kuali ma tikmatikan ken okijtoayaj yiuejkika itoka toTajtsin Dios ika tlajtoli hebreo. Sekimej kijtoaj omoijtoaya ken “Yahweh” (noso “Yahvé”), uan oksekimej kijtoaj tlatlamantli omoijtoaya. Itech Rollos del mar Muerto ijkuilitok se tlaxelol itech amochtli Levítico ika tlajtoli griego kanin ijkuilitok itoka toTajtsin Dios ken “Iao”. Sekimej griegos akinmej okinchiuayaj copias itech iTlajtol toTajtsin Dios tlen okatkaj yiuejkika, noijki okijkuilojkej “Iaé”, “Iabé” noso “Iaoué”. Sepa amo tikmatij ken okijtoayaj yiuejkika itekipanojkauan toTajtsin Dios itoka ika tlajtoli hebreo, ik non, amo uelis tikijtoskej ijkon moneki se kijtos (Génesis 13:4; Éxodo 3:15). Pero itlaj kema tikmatij, toTajtsin Dios okitekitilti itoka ijkuak omotlapouiaya iuan itekipanojkauan uan yejuan noijki okijtoayaj ijkuak okitlatlaujtiayaj uan ijkuak omotlapouiayaj iuan oksekimej (Éxodo 6:2; 1 Reyes 8:23; Salmo 99:9).

Uan axkan, ¿tleka Traducción del Nuevo Mundo kitekitiltia tokayotl Jehová? Ken tikitaskej, yikipia miak xiuitl ijkon motekitiltia ika tlajtoli español.

Achto Biblia tlen okitIajtolkuepkej ika tlajtoli español kipia itoka toTajtsin Dios, ye Salmos de Juan de Valdés, tlen omochijchi kanaj itech xiuitl 1537. Ompa ijkuilitok ken Iehova. Pero ijkuak non tlajtoli omopatlatia, noijki omopatlatia ken moijkuiloa itoka toTajtsin Dios. Se neskayotl, traducción de los Salmos de Bernardino de Rebolledo,  de 1661, kitekitiltia tokayotl Jehova. Biblia de Scío de San Miguel, de 1791, itech notas kitekitiltia Iehováh. Versión Torres Amat, de 1824 kitekitiltia Jehovah, uan Reina-Valera de 1862, kitekitiltia Jehová. Itech miak xiuitl okseki tlatlamantli tlajtolmej ijkon okitekitiltijkej itoka toTajtsin Dios. Se neskayotl, traducción del Pentateuco tlen okichi William Tyndale, de 1530, kitekitiltia tokayotl Iehovah. Nin Biblia ika inglés ye tlen achto opejki kitekitiltia itoka toTajtsin Dios.

Itech amatlajkuilol ika inglés Studies in the Psalms (Tlen momachtiaj itech Salmos), tlen okiski itech 1911, biblista Joseph Bryant Rotherham, tlen miakej kitlakaitaj, okitekitilti tokayotl ika inglés Jehovah uan amo Yahweh pampa okitaya “non okixmatiayaj miakej akinmej okitlajtoltiayaj Biblia” uan okiseliayaj. Uan noijki, itech xiuitl 1930, Alexander Kirkpatrick akin kuali kimati tlajtoli hebreo, noijki ijkon okijto itech tokayotl ika inglés Jehovah: “Axkan miakej akinmej kimatij itech tlajtolmej kijtoaj moneki moijtos ‘Yahveh’ noso ‘Yahaveh’; pero tokayotl JEHOVAH nochtin kijtoaj itech inglés, uan tlen okachi ipati amo ken tikijtoaj, okachi kuali, tikmatiskej non Tokayotl ikaj iaxka, uan amo san se tlajtoli tlen ika kixmatij ken ijkuak kijtoaj toTeko”. Itech tlajtoli español, Diccionario Manual Bíblico noijki ijkon kijtoa pampa kiyekijtoa tokayotl Jehová okachi kitekitiltiaj itech Biblias tlen okachi moixmatij.

¿Tlen kijtosneki tokayotl Jehová? Itech tlajtoli hebreo, tokayotl Jehová kisa itech se verbo tlen kijtosneki “ma Mochiua”. Sekimej ixtlamatkej kijtoaj nin verbo kijtosneki ikaj kichiua okse ma kichiua se tlamantli. Ik non, iTlaixpantijkauan Jehová kijtoaj itoka toTajtsin Dios kijtosneki “Ye kichiua ma Mochiua”. Amo uelis tikijtoskej sepa ijkon kijtosneki, pampa ixtlamatkej kijtoaj miak tlamantli. Pero tlen tikijtoaj kuali kajki, pampa Jehová okichijchi nochi tlen onka uan nochipa kichiua itlanekilis. ¿Tleka? Pampa ye amo san okichijchi semanauak uan nochi tlen yoltok, noijki nochipa kichiua ma mochiua itlanekilis.

¿Uan tlen kijtosneki tlen kijtoa Éxodo 3:14? Ompa toTajtsin Dios kijtoa itech ye: “Ne niyetos san tlen Nikpejpenas Niyetos” (noso ken kijtoa nota, “Ne niyetos san tlen ne niknekis”). Nonmej tlajtolmej kitekitiltiaj se verbo tlen uits itech se verbo kanin kisa itoka toTajtsin Dios. Pero ninmej tlajtolmej amo kijtoaj nochi tlen kijtosneki itoka. San kiteititiaj itlaj itech iyelis: Ye nochipa mochiua tlen poliui pampa ma mochiua itlanekilis. Pero itoka toTajtsin Dios amo san kijtosneki ye ineuia mochiua tlen moneki pampa ma mochiua itlanekilis. Noijki kijtosneki ye kichiua nochi tlen okichijchi ma kichiua tlen moneki uan ijkon ma mochiua itlanekilis.