TLAMACHTIL 10
Jesús okachi chikauak amo ken amo kuali ejekamej
¿TIKILNAMIKI tleka se iángel toTajtsin Dios omochi Satanás uan Diablo?... Ye okixnamik toTajtsin Dios porque otlaixnamikiaya uan okinekiaya ye makiueyichiuakan. ¿Oksekimej ángeles okipaleuijkej Satanás? Kema. Biblia kintokayotia iángeles Satanás noso amo kuali ejekamej (Apocalipsis 12:9).
¿Amo kuali ejekamej kineltokaj toTajtsin Dios?... Biblia kijtoua amo kuali ejekamej kineltokaj onka Dios (Santiago 2:19). Pero yejuan kimauiliaj porque kimatokej ye kinmixpolos porque kichiuaj tlen amo kuali. ¿Akinmej amo kuali ejekamej?...
Biblia kijtoua nonmej ángeles oualtemokej nikan tlaltikpak uan omochijkej ken tlakamej. Yejuan oualtemokej porque okinekiayaj motekaskej inmiuan siuamej nikan tlaltikpak (Génesis 6:1, 2; Judas 6). ¿Tikmati tlen kijtosneki ijkuak se tlakatl uan se siuatl motekaj san sekan?...
Se tlakatl uan se siuatl motekaj san sekan ijkuak mosetiliaj. Ijkuak motekaj san sekan, uelis kipiaskej se konetl tlen moskaltis ijtik inantsin. ToTajtsin Dios kineki san sekan mamotekakan san akinmej yomonamiktijkej. Ijkon tla nesis se konetl nochtin ome uelis kimaluiskej. Pero ángeles amo okinchijchijkej para motekaskej inmiuan siuamej.
¿Tlen tlamantli amo kuali okichijkej amo kuali ejekamej?
Ijkuak ángeles omochijkej tlakamej uan omotekakej inmiuan siuamej, okinpixkej inkoneuan tlen omochijkej uejueyij. Okatkaj sapanoua amo yolkualmej uan okintlajyouiltiayaj oksekimej. Ik non, toTajtsin Dios okichi matlatemi uan ijkon okinmixpolo inkoneuan ángeles uan nochtin akinmej amo yolkualmej. Pero ye okinauati Noé makichiua se arca uan ijkon amitlaj makinpano akinmej okichiuayaj tlen kuali maski amo miakej okatkaj. Jesús otechmachti miak ipati matikilnamikikan tlen opanok ijkuak otlatenki (Génesis 6:3, 4, 13, 14; Lucas 17:26, 27).
¿Tikmati tlen okichijkej amo kuali ejekamej ijkuak otlatenki?... Okikajkej incuerpo uan oksepa oyajkej iluikak. Pero ayakmo uelis yetoskiaj iángeles toTajtsin Dios, ik non, omochijkej iángeles Satanás noso amo kuali ejekamej. Pero ¿tlen okinpanok inkoneuan?... Yejuan oixpolikej ijkuak otlatenki inmiuan akinmej amo okitlakamatkej toTajtsin Dios.
¿Tleka axkan okachi titlajyouiaj?
Satepan toTajtsin Dios ayakmo okitekauili amo kuali ejekamej mamochiuakan ken tlakamej. Axkan maski amo tikinmitaj amo kuali ejekamej yejuan kichiuaj miakej makichiuakan tlen amo kuali. Yejuan okinualtlamotlakej nikan tlaltikpak, ik non, okachi tetlajyouiltiaj.
¿Tikmati tleka amo ueli tikinmitaj amo kuali ejekamej?... Porque yejuan espíritus, pero tikmatij melauak katej. Porque Biblia kijtoua Satanás uan amo kuali ejekamej miakej kinkajkayajtokej ipan nochi tlaltikpak (Apocalipsis 12:9, 12).
¿Uelis techkajkayauaskej Diablo uan amo kuali ejekamej?... Yejuan uelis techkajkayauaskej tla amo timomaluiaj. Pero amo matikinmauilikan porque Jesús okijto: “Ye amitla weletis nechtoktis”. Tla kuali timouikaj iuan toTajtsin Dios, ye techpaleuis amitlaj matechtoktikan Diablo uan amo kuali ejekamej (Juan 14:30).
Moneki matikmatikan tlen tlamantli amo kuali kinekij matikchiuakan amo kuali ejekamej. Ximokuayejyeko ¿tlen okichijkej amo kuali ejekamej ijkuak oualajkej ipan tlaltikpak?... Ijkuak ayamo otlatemiaya, omotekakej inmiuan siuamej maski amo uelis ijkon kichiuaskiaj. Axkan amo kuali ejekamej yolpakij ijkuak oksekimej amo kitlakamatij toTajtsin Dios uan motekaj inmiuan oksekimej. ¿Tikilnamiki akinmej uelis san sekan motekaskej?... Kema, san akinmej yomonamiktijkej.
Axkan telpochmej uan ichpochmej san sekan motekaj uan non amo kuali. Biblia kijtoua tlakamej kipiaj intlakayo tlen itoka pene (Levítico 15:1-3). Siuamej intlakayo itoka vulva. Jehová ijkon okichijchi tocuerpo para akinmej yomonamiktijkej uelis san sekan motekaskej uan yolpakiskej. Amo kuali ejekamej yolpakij ijkuak oksekimej kichiuaj tlen Jehová amo kipaktia. Xamo se chokotsin uan se takotsin mauiltiaj ika intlakayo. ¿Tikchiuaskia tlen kinpaktia amo kuali ejekamej?...
Onka okse tlamantli tlen amo kuali ejekamej kinpaktia pero Jehová amo kipaktia. ¿Tikmati tlen tlamantli?... Amo kipaktia ijkuak moteuiaj (Salmo 11:5). Akinmej kinpaktia moteuiskej kintlajyouiltiaj oksekimej uan kinkojkouaj. Ijkon okichiuayaj inkoneuan amo kuali ejekamej.
Amo kuali ejekamej noijki kinpaktia temomojtiskej. Ualeua tlajtouaj ken akinmej yoixpolikej. Ijkon tlakajkayauaj para oksekimej makineltokakan ok yoltokej akinmej yoixpolikej uan uelis inmiuan motlapouiskej. Ik non, miakej kineltokaj katej fantasmas.
Moneki timomaluiskej uan ijkon Satanás uan amo kuali ejekamej amo techkajkayauaskej. Biblia kijtoua Satanás kineki kiteititis ye se ángel yolkuali uan akinmej kichiuaj ken ye noijki ijkon kichiuaj (2 Corintios 11:14, 15). Pero san tlakajkayauaj uan amo yolkualmej. Matikitakan tlen ika kinekij techkajkayauaskej para matikchiuakan ken yejuan.
¿Kanin kitaj ken moteuiskej, motekaskej inmiuan oksekimej uan kineltokaj katej espíritus uan fantasmas?... Kitaj itech televisión, videojuegos, Internet uan amochmej. ¿Tlen timokuayejyekoua? ¿Techpaleuia non tlamantli okachi matimouikakan iuan toTajtsin Dios noso iuan Diablo uan amo kuali ejekamej?...
¿Tlen techpanos tla tikitaskej kanin moteuiaj?
¿Akinmej kinekij matikitakan uan matikkakikan tlen amo kuali?... Satanás uan amo kuali ejekamej. Ik non, ¿tlen moneki tikchiuaskej?... Moneki tikkakiskej, tikitaskej uan tiktlajtoltiskej tlen techpaleuis matiktekichiuilikan Jehová. ¿Tlen timokuayejyekoua uelis tikchiuaskej?...
¿Tlen moneki tikchiuaskej para amitlaj techtoktiskej Satanás uan amo kuali ejekamej?
Amo moneki tikinmauiliskej amo kuali ejekamej tla tikchiuaj tlen kuali porque Jesús okachi chikauak. Se tonal amo kuali ejekamej okiluijkej Jesús: “¿Otiwala otechpojpoloko?” (Marcos 1:24). Tiyolpakiskej ijkuak Jesús kinmixpolos. Pero tla axkan kuali timouikaj iuan Jesús uan itajtsin ye techpaleuis.
Matikitakan tlen moneki tikchiuaskej para amitlaj techtoktiskej Satanás uan amo kuali ejekamej 1 Pedro 5:8, 9 uan Santiago 4:7, 8.