1. ¿Akinmej kineltokaj magia, tetlajchiuiaj uan brujería?

 “Akinmej chantij África amo motlajtlaniaj kox katej brujas”. Ijkon kijtoua amochtli African Traditional Religion (La religión tradicional africana), noijki kijtoua: “Akinmej kipiaj tomin noso amo, kineltokaj katej brujas”. Maski oyajkej escuela noso amo, hasta akinmej tlayekanaj itech religión islam uan akinmej kijtouaj kichiuaj ken Cristo, kineltokaj magia, tetlajchiuiaj uan brujería.

2. Tlen kineltokaj sekimej, ¿kanin uits chikaualistli?

² Akinmej chantij África kineltokaj kajki chikaualistli tlen amo ueli tikitaj uan toTajtsin Dios kiyekana. Nin chikaualistli kitekitiltiaj espíritus uan akinmej yoixpolikej. Akinmej yoltokej noijki ueli kitekitiltiaj para ika mopaleuiskej (magia blanca) uan para ika tetlajchiuiskej (magia negra).

3. ¿Tlen kijtosneki magia negra uan tlen ueli ika kichiuaj?

³ Magia negra kitekitiltiaj para ika kitlajchiuiskej akin kinkokolia. Akinmej kichiuaj nin tlamantli ueli kintitlanij murciélagos, totomej, sayolimej uan okseki yolkamej, kitekitiltiaj para ikaj kintlajchiuiskej oksekimej. Miakej kineltokaj magia negra uelis kichiuas mamokualanikan, mamokokokan noso ikaj mamiki.

4. ¿Sekimej tlen kineltokaj? ¿Tlen kijtouaj akinmej okichiuayaj brujería?

⁴ Brujería noijki mouika iuan magia negra. Miakej kijtouaj ijkuak yotlayouak brujas kikajteuaj incuerpo uan patlanij, para yaskej iuan oksekimej brujas noso para kinmiktiskej akinmej kinkokoliaj. Incuerpo kikauaj kanin kochij, ijkon kijtouaj akinmej okichiuayaj brujería. Se revista tlen okijkuilojkej África kijtoua tlen okichiuayaj sekimej siuamej ijkuak okatkaj ichpochmej: “Onikinmikti kanaj 150 tlen okiuikayaj incarro”; “Onikinmikti makuili chokotsitsintin ijkuak onikonik inmieso”; “Onikinmikti eyi telpochmej tlen okijtojkej nechtlajpalotiuij pero san onechkajkayajkej”.

5. ¿Tlen kijtosneki magia blanca uan ken kitekitiltiaj?

⁵ Sekimej kijtouaj magia blanca kinpaleuia ijkuak kinekij kinchiuiliskej tlen amo kuali. Akinmej kitekitiltiaj magia blanca kimotlaliliaj seki pulseras noso anillos mágicos, konij seki tlamantli noso kimotlaliliaj itech incuerpo. Noijki inkalijtik noso itech tlali kitlatiaj seki tlamantli tlen kijtouaj kipiaj chikaualistli tlen kinpaleuiaj uan kiuikatinemij seki tlamantli tlen itech ijkuilitok textos tlen kisa itech Corán noso Biblia.

6. ¿Tlen okichijkej yiuejkika Satanás uan amo kuali ejekamej uan ken moneki tikitaskej?

⁶ Satanás uan amo kuali ejekamej temomojtiaj. Uelis mitskuatlapololtiskej uan mitsijtlakoskej, yiuejkika okalakej itech yolkamej uan tlakamej (Mateo 12:43- 45). Pero maski kipiaj chikaualistli amo kijtosneki uelis techmomojtiskej.

7. ¿Tlen kineki Satanás matikneltokakan uan tlen techpaleuis amo ijkon matikneltokakan?

⁷ Satanás kimati tlakajkayauas. Kineki makineltokakan ye okachi chikauak. Ijkon ken opanok itech altepetl África. Akinmej moteuiaj okitekitiltijkej se sonido, achto peuaskiaj moteuiskej, okitlalijkej chikauak mamokaki ken yetoskia se tepostli ueyi uan tlatototpotsa, ijkon akinmej okikakej omokuayejyekojkej miakej ompa uitsej para moteuiskej. Noijki Satanás kineki matikneltokakan sapanoua chikauak. Ik non, miakej kinmomojtiaj para makichiuakan tlen ye kineki uan amo tlen Jehová kipaktia. Matikitakan eyi tlamantli tlen ika tlakajkayaua Satanás uan kineki matikneltokakan.

8. ¿Ken kineki techkajkayauas Satanás?

⁸ Satanás kijtoua ijkuak itlaj amo kuali panoua amo san ijkon panoua; ikaj ijkon kichiua mapano. Matikijtokan se chokotsin okajsik kokolistli tlen itoka malaria uan oixpoliuik. Inantsin kimati nin kokolistli monextia ika seki sayolimej. Pero xamo mokuayejyekos ikaj ijkon okichiuili ika naualotl, ik non, oixpoliuik.

9. ¿Ken kiteititia Biblia amo nochi itlajtlakol Satanás?

⁹ Maski Satanás kichiua tlen amo kuali, amo nochi ye kichiua, porque amo sapanoua chikauak. Biblia kijtoua: “Akinmej motlalouaj amo nochipa tlatlanij, akinmej chijchikauakej amo nochipa tlatlanij ijkuak moteuiaj, ixtlamatkej amo nochipa kipiaj tlakuali, ixtlamatkej amo nochipa kipiaj miak tomin uan akinmej kipiaj miak tlamatilistli amo nochipa kuali kisa tlen kichiuaj porque tinochtin titlajyouiaj uan uelis itlaj amo kuali techpanotikisa” (Eclesiastés 9:11). Akin kimati motlalos amo nochipa tlatlani. Uelis kitlaniliskej porque itlaj amo kuali kipanotikisa, uelis moikxitlanuis noso peuas itlaj kikokos. San akin ijkon uelis kipanos amo Satanás ijkon kichiua noso kitekitiltia naualotl.

10. ¿Tlen kijtouaj kichiuaj brujas uan ken tikmatij non amo melauak?

¹⁰ Noijki Satanás kineki matikneltokakan brujas kikajteuaj incuerpo uan yauij youak kinmajsitiuij oksekimej brujas uan temiktiaj. Ximotlajtlani: “Tla brujas ijkon kichiuaj, ¿tlen kisa itech incuerpo?”. Ken yotikitakej alma kijtosneki tejuan uan amo itlaj tlen kisa totech. Noijki espíritu kijtosneki chikaualistli tlen ika tiyoltokej amo ueli itlaj kichiua.

11. ¿Ken tikmatij brujas amo ueli kikajteuaj incuerpo? ¿Tikneltoka tejuatsin?

¹¹ Nion alma nion espíritu ueli kisa itech tocuerpo para kichiuas tlen kuali noso tlen amo kuali. Ik non, brujas amo kikajteuaj incuerpo. Amo melauak kichiuaj tlen kijtouaj uan kineltokaj okichijkej.

12. ¿Ken kichiua Satanás para miakej makineltokakan okichijkej seki tlamantli?

¹² ¿Akinmej okichiuayaj naualotl tleka kijtouaj okichijkej seki tlamantli? Satanás ueli kichiua makineltokakan okichijkej seki tlamantli maski amo melauak. Para makineltokakan ijkon opanok, kichiua makitemikikan okitakej, okikakej uan okichijkej seki tlamantli. Ijkon kichiua para amo makineltokakan Jehová uan makineltokakan tlen tlamachtia Biblia amo melauak.

13. (1) ¿Kuali tiktekitiltiskej magia blanca? (2) ¿Tlen kijtoua Biblia?

¹³ Ok se tlamantli tlen ika techkajkayaua Satanás, kineki matikneltokakan magia blanca uelis techpaleuis. Pero itech Biblia amo kijtoua kox tlatlamantli, magia negra uan magia blanca. ToTajtsin Dios amo kineki matiktekitiltikan naualotl. Matikitakan tlen okinauati altepetl Israel ijkuak miakej okitekitiltiayaj naualotl.

•   Amo xikchiuakan naualotl (Levítico 19:26).

•   Tla se tlakatl uan se siuatl kitekitiltiaj naualotl uan tetlajchiuiaj, moneki kinmiktiskej (Levítico 20:27).

•   “Amikaj mayeto akin [...] kitekitiltia magia, tlen kitemoua akin tlatetsauia, tlen tetlajchiuia, tlen kitechiuilia tlen amo kuali, tlen kitlajtlania se nauali” (Deuteronomio 18:10-14).

14. ¿Tleka Jehová okinnauati israelitas amo makitekitiltikan magia?

¹⁴ Ninmej tlanauatilmej technextiliaj toTajtsin Dios amo kineki itekipanojkauan makitekitiltikan magia. Jehová okinmakak ninmej tlanauatilmej israelitas porque okintlasojtlayaj uan amo okinekiaya mamomojtikan ika tlen okijtouayaj oksekimej, noijki para amitlaj makinchiuilikan amo kuali ejekamej.

15. ¿Ken kiteititia Biblia Jehová okachi chikauak uan amo Satanás?

¹⁵ Biblia amo kijtoua nochi tlen kichiuaj Satanás uan amo kuali ejekamej, pero kema kijtoua Jehová ye akin okachi chikauak. Jehová okiualtlamotlak Satanás (Apocalipsis 12:9). Ijkuak Satanás okinekiaya kiyejyekos Job, achto okilui toTajtsin Dios uan okitlakamatki ijkuak okilui amo makixpolo (Job 2:4-6).

16. ¿Akin uelis techmaluis?

¹⁶ Proverbios 18:10 kijtoua: “Itoka Jehová ken se chikauak tepamitl. Akin yolmelauak ompa motlaloua uan kimaluia”. Ik non, tla tiknekij matechmalui Jehová moneki inauak matimotokikan. Itekipanojkauan toTajtsin Dios amo kitekitiltiaj amuletos nion koni seki tlamantli, para amitlaj makinchiuili Satanás uan amo kuali ejekamej, noijki amo kimauiliaj nion kimakasij naualotl. Kineltokaj tlen kijtoua Biblia: “Ixtololouan Jehová tlachixtokej itech nochi tlaltikpak para kinpaleuis akinmej ixpan kipiaj ajsitok inyolo” (2 Crónicas 16:9).

17. ¿Tlen techiluia Santiago 4:7 uan tlen moneki tikchiuaskej?

¹⁷ Tla tiktekichiuilia Jehová uelis tikneltokas ye mitsmaluis. Santiago 4:7 kijtoua: “Xikmopantikah Dios iwa ximochijchikawakah para amo manomechtlani n amokualitlakatl, iwa ye nomechcholilis”. Ik non, tla tiktlakamati toTajtsin Dios xikmato ye mitsmaluis.