Tlamachtil 3

¿Akin Jesucristo?

¿Tleka kitokayotiaj Jesús itlayekanKone toTajtsin Dios? (1)

¿Tleka kitokayotiaj iTlajtol toTajtsin Dios? (1)

¿Tleka ouala Jesús nikan Tlaltikpak ken se tlakatl? (2-4) ¿Tleka okichi milagros? (5)

¿Tlen kichiuas Jesús satepan, tlen amo uejka yetok? (6)

1. Jesús onemia iluikak ken se espíritu achto ualaskia nikan Tlaltikpak. ToTajtsin Dios okichijchi achto Jesús, ik non, kitokayotiaj itlayekanKone toTajtsin Dios (Colosenses 1:15; Apocalipsis 3:14). ToTajtsin Dios iselti okichijchi Jesús, uan amo akaj okipaleui. Jehová okitekitilti Jesús ijkuak okatka iluikak ken se “kuali tekipanojki” ijkuak okinchijchi nochtin tlamantin tlen katej itech iluikak uan Tlaltikpak (Proverbios 8:22-31; Hebreos 1:2). ToTajtsin Dios noijki okimakak tekitl pampa ma kitemaka iTlajtol. Ik non, Jesús kitokayotiaj akin kiuika Tlajtoli (Apocalipsis 19:13).

2. Ijkuak toTajtsin Dios okiualtitlanki iKone nikan Tlaltikpak okitlali iyolilis ijtik María. Itajtsin Jesús amo okatka se tlaltikpaktlakatl, ik non, amo otlakatki ika tlajtlakoli. ToTajtsin Dios okiualtitlanki Jesús nikan Tlaltikpak pampa kichiuaskia eyi tlamantli: 1) pampa techmachtis tlen melauak itech toTajtsin Dios (Juan 18:37), 2) pampa kipias iyolo ajsitok uan ijkon otechtlalili se kuali neskayotl (1 Pedro 2:21) uan 3) pampa kitemakaskia iyolilis uan ijkon techmakixtis itech tlajtlakoli uan mikilistli. ¿Tleka monekia ma miki? (Mateo 20:28.)

3. Ijkuak achto tlakatl Adán amo okitlakamatki toTajtsin Dios, okichi tlen Biblia kitokayotia “tlajtlakoli”. Ik non, toTajtsin Dios okilui mikiskia (Génesis 3:17-19). Ken ayakmo okitlakamatki Jehová, opejki kichiua tlajtlakoli. Opejki ueuejti uan satepan, omiki. Uan noijki okipanoltili tlajtlakoli nochtin tlaltikpaktlakamej. Ik non, tejuan noijki tiueuejtij uan timikij. ¿Ken ueliskia momakixtiskej tlaltikpaktlakamej? (Romanos 3:23; 5:12.)

 4. Jesús okatka se tlakatl tlen amo okipiaya tlajtlakoli ijkon ken Adán. Maski ijkon, Adán amo otetlakamatki, Jesús nochipa okitlakamatki toTajtsin Dios, maski otlajyoui. Ik non, ye ueliskia kitemakas iyolilis tlen amo kipia tlajtlakoli uan ijkon kitlaxtlauaskia tlajtlakoli tlen okichi Adán. Biblia kitokayotia nin temaktilistli ken ‘tlaxtlauiliʼ. Ijkon, ikoneuan Adán uelis makisaskiaj itech mikilistli. Nochtin akinmej titlaneltokaj itech Jesús uelis techtlapojpoluiskej totlajtlakol uan tikpiaskej nemilistli tlen amo keman tlamis (1 Timoteo 2:5, 6; Juan 3:16; Romanos 5:18, 19).

5. Ijkuak Jesús onemia nikan ipan Tlaltikpak okinpajti akinmej omokokoayaj, okintlamakak miakej uan noijki okitlakaualti ejekakiauitl. Noijki okinyoliti mikamej. ¿Tleka okichi milagros? 1) Okinmiknomatia akinmej otlajyouiayaj uan kinekia kinpaleuis. 2) Milagros tlen Jesús okichi okiteititijkej ye iKone toTajtsin Dios. 3) Okiteititi ken kinpaleuis akinmej tetlakamatij ijkuak ualtlanauatis ipan Tlaltikpak (Mateo 14:14; Marcos 2:10-12; Juan 5:28, 29).

6. Satepan Jesús omiki, toTajtsin Dios okiyoliti ken se espíritu uan oksepa oyajki iluikak (1 Pedro 3:18, NM). Satepan toTajtsin Dios okitlali ken ueyi Tekiua. Amo miak kauitl poliui uan Jesús kitlajtlamis nochi tlen amo kuali uan tlajyouilistli tlen onka itech Tlaltikpak (Salmo 37:9-11; Proverbios 2:21, 22).

[Tlaixkopinalmej itech página 7]

Ijkuak Jesús onemia Tlaltikpak, otlamachti, okichi milagros uan okitemakak iyolilis uan ijkon otechmakixti