Tlamachtil 2

¿Akin toTajtsin Dios?

¿Akin melauak toTajtsin Dios, uan ken itoka? (1, 2)

¿Tleka amo ueli tikitaj toTajtsin Dios? (3)

¿Katli iyelisuan toTajtsin Dios? (4)

¿Moneki tikueyichiuaskej toTajtsin Dios ika teotsitsintin? (5)

¿Ika tlen ome tlamantli uelis tikixmatiskej toTajtsin Dios? (6)

1. Tlaltikpaktlakamej kiueyichiuaj miakej tlamantin. Biblia techiluia onka san se akin MELAUAK toTajtsin Dios. Ye okichijchi nochi tlen onka itech iluikak uan Tlaltikpak, uan ken ye otechmakak tonemilis, moneki san ye tikueyichiuaskej (1 Corintios 8:5, 6; Apocalipsis 4:11).

2. Maski tlatlamantli kitokayotiaj toTajtsin Dios, san se itoka kipia: JEHOVÁ. Itech miakej Biblias amo kitlaliliaj itoka toTajtsin Dios, san kitlaliaj toTeko noso Dios. Maski ijkon, ijkuak okijkuilojkej Biblia tokayotl Jehová onesia kanaj 7,000 (Éxodo 3:15; Salmo 83:18).

3. Jehová amo ijkon ken tejuan, ye amo ueli tikitaj. Biblia techiluia: “Dios Yej Espíritu” (Juan 4:24). Espíritu se yolilistli tlen amo yetok ken tejuan toyolilis.  Amo keman akaj yokitak toTajtsin Dios. Maski Jehová nemi iluikak, ye ueli kita nochi (Salmo 11:4, 5; Juan 1:18; Hebreos 4:13). ¿Uan tlen espíritu santo? Espíritu santo amo ken toTajtsin Dios, non ichikaualis tlen ika kichiua tlen ye kineki (Salmo 104:30).

4. Biblia techiluia ken iyelis toTajtsin Dios. Kijtoa ninmej iyelisuan: tlasojtlalistli, melajkayotl, ixtlamatilistli uan chikaualistli (Romanos 11:33, 34; 1 Juan 4:8; Apocalipsis 11:17; 15:3). Noijki techiluia toTajtsin Dios, ye teiknomati, yolkuali, tetlapojpoluia, kipaktia kitemakas tlen kipia uan noijki mochia. Ken tiikoneuan tlen titetlakamatkej, moneki timochijchikauaskej tikchiuaskej ken ye (Efesios 5:1, 2).

5. ¿Moneki tikinueyichiuaskej teotsitsintin, cruz noso okse tlamantli? Amo (Éxodo 20:4, 5). Jehová kijtoa san ye ma tikueyichiuakan. Iueyitilis amo kimaka okse. Uan, teotsitsintin amo kipiaj chikaualistli pampa techpaleuiskej (Salmo 115:4-8; Isaías 42:8).

6. ¿Ken uelis okachi kuali tikixmatiskej toTajtsin Dios? Tla tikitaj nochi tlen yokichijchi uan timokuayejyekoaj tlen techmachtiaj itech toTajtsin Dios, uelis okachi tikixmatiskej. Nochi tlen ye okichijchi techititia toTajtsin Dios kipia miak chikaualistli uan ixtlamatilistli. Itech nochi tlen okichijchi tikitaj itlasojtlalis (Salmo 19:1-6: Romanos 1:20). Uan noijki uelis tikixmatiskej toTajtsin Dios tla timomachtiaj Biblia. Biblia techiluia okachi itech iyelis toTajtsin Dios. Noijki techiluia tlen kineki kichiuas uan tlen kineki ma tikchiuakan (Amós 3:7; 2 Timoteo 3:16, 17).

[Tlaixkopinalmej itech página 5]

Uelis tikixmatiskej toTajtsin Dios itech tlen okichijchi uan itech Biblia