Tlamachtil 9

Itekitijkauan toTajtsin Dios moneki ma yetokan chipauakej

¿Tleka moneki tiyetoskej chipauakej itech nochi tlen tikchiuaj? (1)

¿Tlen kijtosneki ma yeto chipauak totlaneltokilis? (2)

¿Ma yeto chipauak tonemilis? (3)

¿Ma yeto chipauak tokuayejyekol? (4)

¿Uan ma yeto chipauak tonakayo uan kanin tichantij? (5)

¿Tlen tlajtolmej pitsotikej amo ma tikijtokan? (6)

1. Jehová Dios chipauak uan santo. Ye kineki akinmej kitekichiuiliaj ma yetokan chipauakej itech intlaneltokilis, innemilis, inkuayejyekol, itech innakayo uan kanin chantij (1 Pedro 1:16). Moneki ma timochijchikauakan miak pampa tiyetoskej tichipauakej ixpan toTajtsin Dios. Tinemij itech Tlaltikpak kanin onka tlamantli tlen pitsotik. Ken titlajtlakolejkej, timochijchikauaj pampa ayakmo tikchiuaskej tlen amo kuali. Maski ijkon, amo ma timosotlauakan.

2. Ma yeto chipauak totlaneltokilis: Tla tiknekij tiktekichiuiliskej Jehová, ayakmo ma tikchiuakan tlen tlamachtia noso kichiua tlaneltokalistli tlen amo melauak. Moneki tikisaskej itech tlaneltokalistli tlen amo melauak uan amo ma tikchiuakan itlaj pampa tikpaleuiskej (2 Corintios 6:14-18; Apocalipsis 18:4). Ijkuak yotimomachtijkej tlen melauak itech toTajtsin Dios, moneki ma timomaluikan pampa amo ma techkajkayauakan akinmej tlamachtiaj tlen amo melauak (2 Juan 10, 11).

3. Ma yeto chipauak tonemilis: Akinmej kitekichiuiliaj Jehová nochipa ma kichiuakan ken akinmej melauak kichiuaj  ken Cristo ijkon ken ye kineki (1 Pedro 2:12). Ye kita nochi tlen tikchiuaj, maski tikchiuaj san ichtaka (Hebreos 4:13). Moneki tikixtopeuaskej auilnemilistli uan nochi tlamantli tlen amo kuali noso pitsotik (1 Corintios 6:9-11).

4. Ma yeto chipauak tokuayejyekol: Tla tiktlaliaj itech tokuayejyekol san tlen chipauak, nochipa tikchiuaskej tlen chipauak (Filipenses 4:8). Tla timokuayejyekoaj itech tlamantin tlen amo kuali, satepan tikchiuaskej tlamantin tlen amo kuali (Mateo 15:18-20). Amo tikmauisoskej tlen amo kuali pampa uelis kipitsotilis tokuayejyekol. Tla timomachtiaj iTlajtol toTajtsin Dios, tokuayejyekol kipias san tlen chipauak.

5. Ma yeto chipauak tonakayo uan kanin tichantij: Ken tikchiuaj ken Cristo, titlajtoaj itech toTajtsin Dios, ik non, moneki ma yeto chipauak tonakayo uan totlaken. Moneki ma timomapajpakakan tla otiajkej baño, uan noijki achto titlakuaskej noso ijkuak titlakualchiuaskej. Tla kanin tichantij amo onka baño, moneki tiktlalpachos kuitlatl (Deuteronomio 23:12, 13). Tla tichipauakej amo tikpiaskej kokolistli. Akinmej kichiuaj ken Cristo, inkalijtik uan inkaltempan moneki ma yeto chipauak uan amo ma tlaxixinto. Moneki ma kinmixmatikan itech inaltepetl ken chipauakej.

6. Ma yeto chipauak tlen tikijtoaj: Akinmej kitekichiuiliaj toTajtsin Dios moneki kijtoskej nochipa tlen melauak. Akinmej tlakajkayauaj amo kalakiskej itech iTekiuajkayo toTajtsin Dios (Efesios 4:25; Apocalipsis 21:8). Akinmej kichiuaj ken Cristo amo kijtoa tlen amo kuali noso tlen pitsotik. Amo kikakij nion kamanaloaj ika tlajtoli tlen pitsotik. Kanin tekitij, kanin momachtiaj uan kanin chantij kinmixmatij pampa amo kijtoaj tlen pitsotik (Efesios 4:29, 31; 5:3).

[Tlaixkopinalmej itech página 18 uan 19]

Akinmej kitekichiuiliaj toTajtsin Dios moneki yetoskej chipauakej itech nochi tlen kichiuaj