Tlamachtil 14

Ken tekitij itlaixpantijkauan Jehová

¿Keman opejkej tekitij itlaixpantijkauan Jehová? (1) ¿Ken mochiuaj innechikoluan itlaixpantijkauan Jehová? (2) ¿Kanin kisa tomin tlen kitekitiltiaj? (3)

Itech se tlanechikol, ¿akin tlayekana? (4)

¿Tlen ueyi nechikolmej mochiua sejse xiuitl? (5)

¿Tlen tekitl mochiua itech kali kanin katej akinmej kinyekanaj itlaixpantijkauan Jehová, uan noijki itech kalmej tlen katej itech oksekimej ueyi altepemej? (6)

1. Itlaixpantijkauan Jehová opejkej tekitij itech xiuitl 1870. Achto okinmixmatiayaj ken akinmej Momachtiaj Biblia, satepan itech xiuitl 1931 omotokayotijkej itlaixpantijkauan Jehová, ken nesi itech Biblia (Isaías 43:10). Ijkuak opejkej amo miakej okatkaj uan axan katej millones itlaixpantijkauan Jehová tlen tetlapouiaj itech kanaj 236 ueyi altepemej.

2. Miakej intlanechikoluan itlaixpantijkauan Jehová monechikoaj ojpa itech se semana. Timitsyoleuaj noijki ximonechiko innauak (Hebreos 10:24, 25). Nochi tlen ompa tlamachtiaj kisa itech Biblia. Nechikolmej peuaj uan tlamij ika tlatlaujtilistli, noijki tlakuikaj ika nochi inyolo uan ijkon kiueyichiuaj Jehová (Efesios 5:18, 19). Nochtin uelis kalakiskej, amo motlajtlani tomin (Mateo 10:8).

3. Kanin yauij kitokayotiaj Kali kanin monechikoaj itlaixpantijkauan Jehová. Non Kali kanin monechikoaj, yejuan kichijchiuaj ika miak pakilistli maski amo kintlaxtlauiaj. Itech non kalmej amo tikinmitas teotsitsintin nion se cruz nion okse tlamantli. Nochi tomin tlen motekitiltiaj kitemakaj tlaltikpaktlakamej  ika nochi inyolo. Akinmej kinekij kitemakaskej tomin uelis kitlaliskej ipan cajas kanin kitlaliaj tomin (2 Corintios 9:7).

4. Itech sejse tlanechikol onkaj tlayekankej akinmej tlamachtiaj (1 Timoteo 3:1-7; 1 Tesalonicenses 5:12). Uan siervos ministeriales kinpaleuiaj (1 Timoteo 3:8-10, 12, 13). Itech tlanechikol amo onka se akin okachi ueyi (2 Corintios 1:24). Amo kintlaliliaj se tokayotl tlen ika kinueyichiuaj (Mateo 23:8-10). Amo tlatlamantli motlakentiaj. Noijki amo kintlaxtlauiaj. Tlayekankej tlapaleuiaj ika miak pakilistli itech tlanechikol pampa ma mochikaua intlaneltokilis tokniuan. Kinyolchikauaj uan kinpaleuiaj ijkuak kipiaj se tlajyouilistli (Santiago 5:14-16; 1 Pedro 5:2, 3).

5. Itlaixpantijkauan Jehová noijki kichiuaj ueyi nechikolmej itech sejse xiuitl. Itech non tonalmej monechikoaj miakej tlanechikolmej pampa kikakiskej se kuali tlanojnotsalistli tlen kisa itech Biblia. Noijki ipan non ueyi tlanechikol, yankuikej tlaneltokakej itech Cristo moapolaktiaj (Mateo 3:13-17; 28:19, 20).

6. Itech New York kajki se kali kanin katej akinmej kinyekanaj itlaixpantijkauan Jehová. Ompa kajki Cuerpo Gobernante, sekimej tlayekankej tlen kipiaj miak tlamatilistli akinmej kinyekanaj itlaixpantijkauan Jehová itech nochi Tlaltikpak. Noijki itech nochi Tlaltikpak katej kanaj 100 kalmej kanin tekitij itlaixpantijkauan Jehová. Akinmej ompa tekitij amo kintlaxtlauiaj, tlapaleuiaj pampa ma kinchijchiuakan amatlajkuilolmej tlen kisa ipan Biblia uan kintitlanij. Noijki ompa kitaj ken uan kanin tetlapouiskej. ¿Tleka amo tiktlalia se tonal pampa tikitati Kali kanin itlaixpantijkauan Jehová kichijchiuaj amatlajkuilolmej kanin tichanti?