Tlamachtil 15

Ma tikinpaleuikan oksekimej ma kichiuakan tlen toTajtsin Dios kineki

¿Tleka moneki titetlapouis itech tlen timomachtijtok? (1)

¿Akinmej uelis tikinmatiltis ninmej kuali tlajtolmej? (2)

¿Ken uelis kinpaleuis oksekimej tlen tikchiua itech monemilis? (2)

¿Keman uelis tipeuas titetlapouis iuan motlanechikol? (3)

1. Tejuatsin yotimomachti miak tlamantli tlen kuali itech Biblia. Tlen yitikmati uelis mitspaleuis pampa tikchiuas ken Cristo okichi (Efesios 4:22-24). Noijki, nin tlamatilistli moneki pampa tikselis nemilistli tlen amo keman tlamis (Juan 17:3). Oksekimej noijki moneki kikakiskej ninmej kuali tlajtolmej pampa momakixtiskej. Nochtin akinmej melauak kichiuaj ken Cristo moneki tetlapouiskej. Ijkon tlanauatia toTajtsin Dios (Romanos 10:10; 1 Corintios 9:16; 1 Timoteo 4:16).

2. Uelis tipeuas tikintlapouis akinmej mitsyaualoaj ninmej kuali tlamantin tlen timomachtijtok. Xikintlapoui mochanejkauan, moyolikniuan, akinmej innauak timomachtia noso titekiti. Xikchiua ika yolyamanilistli uan amo xikinkualani (2 Timoteo 2:24, 25). Xikilnamiki, tlaltikpaktlakamej okachi kitaj tlen kichiua se tlakatl uan amo tlen kijtoa. Ik non, tla kuali tinemi uelis tikinpaleuis ma kikakikan kuali tlajtolmej tlen tikinmatiltia (Mateo 5:16; 1 Pedro 3:1, 2, 16).

3. Panos kauitl uan satepan uelis titetlapouis inauak itlanechikol itlaixpantijkauan Jehová kanin timonechikoa. Nin se tlamantli tlen kipia miak ipati tlen moneki tikchiuas (Mateo 24:14). ¡Melauak tipakis tla akaj uelis tikpaleuis ma mochiua itlaixpantijka Jehová uan ijkon uelis kipias nemilistli tlen amo keman tlamis! (1 Tesalonicenses 2:19, 20.)