Tlamachtil 10

Tlamantin tlen toTajtsin Dios amo kipaktia

¿Ken moneki tikitas tlen toTajtsin Dios kijtoa amo kuali? (1)

Ijkuak se tlakatl uan se siuatl motekaj, ¿tlen tlamantli amo moneki kichiuaskej? (2)

Akinmej kichiuaj ken Cristo, ¿ken moneki kitaskej tlakajkayaualistli? (3) ¿Ijkuak mauiltiaj ika tomin? (3) ¿Tlachtekilistli? (3) ¿Ijkuak teuiteki noso tetlajyouiltia? (4) ¿Naualotl? (5) ¿Tlauanalistli noso uintilistli? (6)

¿Ken uelis tikauaskej ninmej tlamantin tlen amo kuali? (7)

1. Itekitijkauan toTajtsin Dios kitlasojtlaj tlen kuali uan moneki kikokoliskej tlen amo kuali (Romanos 12:9). Non kijtosneki amo ma tikchiuakan tlen toTajtsin Dios amo kipaktia. ¿Katli sekimej tlamantin?

2. Auilnemilistli: Ijkuak moteka uan ayamo monamiktia, ijkuak momekatia, ijkuak moteka iuan se yolkatl noso moteka iuan se ichanejke, ijkuak ome tlakamej motekaj noso ome siuamej, nochi nin se ueyi tlajtlakoli ixpan toTajtsin Dios (Levítico 18:6; Romanos 1:26, 27; 1 Corintios 6:9, 10). Tla se tlakatl uan se siuatl san sekan chantij uan ayamo monamiktiaj, moneki ma moxelokan, noso ma monamiktikan ixpan tekiuajkej (Hebreos 13:4).

3. Tlakajkayaualistli, ijkuak mauiltiaj ika tomin, tlachtekilistli: Jehová amo tekajkayaua (Tito 1:2). Ik non, tlaltikpaktlakamej tlen kinekij kiyolpaktiskej amo ma tlakajkayauakan (Proverbios 6:16-19; Colosenses 3:9, 10). Ijkuak mauiltiaj pampa kitlaniskej tomin satepan okachi kinekij. Ik non, akinmej kichiuaj ken Cristo  amo mauiltiaj itech lotería, barajas nion itech okse tlamantli kanin motlani tomin (Efesios 5:3-5). Noijki amo tlachtekij nion kikoaj tlamantli tlen kimatij okichtekej nion kiuikaj itlaj san ichtaka (Éxodo 20:15; Efesios 4:28).

4. Sapanoa kualani, teuiteki noso tetlajyouiltia: Akin sapanoa kualani uelis kinekis teuitekis (Génesis 4:5-8; Santiago 1:19, 20). Akinmej sapanoa kualanij amo uelis yetoskej iyolikniuan toTajtsin Dios (Salmo 11:5; Proverbios 22:24, 25). Ijkuak akaj techchiuilia se tlamantli tlen amo kuali, amo ma timomakuepakan (Proverbios 24:29; Romanos 12:17-21).

5. Tetlajchiuilistli uan naualotl: Sekimej tlaltikpaktlakamej kinnotsaj espíritus pampa ma kinpajtikan. Oksekimej kintlajchiuiaj akinmej kinkokoliaj pampa ma mokokokan noso ma mikikan. Satanás kintopeua ma kichiuakan nochi nin tlamantli. Ik non, akinmej kichiuaj ken Cristo amo ma kichiuakan nochi nin tlamantli (Deuteronomio 18:9-13). Tla tikatej inauak Jehová, techpaleuis pampa amo techtlajchiuiskej (Proverbios 18:10).

6. Tlauanalistli noso uintilistli: Se konis tepitsin mezcal, cerveza noso okse tlakonili tlen kipia alcohol amo tlajtlakoli (Salmo 104:15; 1 Timoteo 5:23). Maski ijkon, toTajtsin Dios amo kipaktia ma uintikan (1 Corintios 5:11-13; 1 Timoteo 3:8). Ijkuak akaj uinti uelis kajsis kokolistli, uan kintlajyouiltis ichanejkauan. Noijki uelis kichiuas okseki tlamantli tlen amo kuali (Proverbios 23:20, 21, 29-35).

7. Tlaltikpaktlakamej tlen kichiuaj tlamantli tlen amo kuali “mach uelis kalakiskej kan Dios tlanauatia” (Gálatas 5:19-21). Tla melauak tiktlasojtla toTajtsin Dios uan tikneki tikyolpaktis, uelis tikauas nochi nin tlamantli tlen amo kuali (1 Juan 5:3). Xikokoli tlen toTajtsin Dios amo kipaktia (Romanos 12:9). Ximouika iuan akinmej kichiuaj tlen toTajtsin Dios kineki (Proverbios 13:20). Tokniuan akinmej chikauak intlaneltokilis uelis techpaleuiskej miak (Santiago 5:14). Noijki uelis tiktlajtlaniliskej toTajtsin Dios ma techpaleui ijkuak timotlatlaujtiaj inauak (Filipenses 4:6, 7, 13).

[Tlaixkopinalmej itech página 20 uan 21]

ToTajtsin Dios kikokolia tlauanalistli noso uintilistli, tlachtekilistli, ijkuak mauiltiaj ika tomin uan ijkuak teuitekij noso tetlajyouiltiaj