Tlamachtil 11

Tlaneltokilismej uan iluimej tlen toTajtsin Dios amo kipaktia ma tikchiuakan

¿Tlen tlaneltokilismej uan iluimej amo kuali ma tikchiuakan? (1)

Akinmej kichiuaj ken Cristo, ¿moneki ma kineltokakan toTajtsin Dios se Trinidad? (2)

Akinmej melauak kichiuaj ken Cristo, ¿tleka amo iluichiuaj itech Navidad, Semana Santa nion ijkuak akaj kajxitia xiuitl? (3, 4) ¿Uelis mikamej kintlajyouiltiskej akinmej yoltokej? (5) ¿Omiki Jesús ipan se cruz? (6) ¿Tleka miak ipati ma tikyolpaktikan toTajtsin Dios? (7)

1. Amo nochtin tlaneltokilismej uan iluimej amo kuali. Maski ijkon, toTajtsin Dios amo kipaktia nochi tlen kisa itech tlaneltokalistli tlen amo melauak noso tlen amo kisa itech Biblia (Mateo 15:6).

2. Trinidad: ¿Jehová ye se Trinidad, kijtosneki, eyi tlen katej itech toTajtsin Dios? Amo. Jehová, ye tePapan, akin ‘melauak Dios, iuan mach onkaj okseʼ (Juan 17:3; Marcos 12:29). ItlayekanKone toTajtsin Dios ye Jesús, uan kitlakamati (1 Corintios 11:3). TePapan okachi ueyi amo ken iKone (Juan 14:28). Espíritu santo amo ken toTajtsin Dios; non ichikaualis tlen ika kichiua tlen ye kineki (Génesis 1:2; Hechos 2:18).

3. Navidad uan Semana Santa: Jesús amo otlakatki itech tonal 25 ipan mestli diciembre, otlakatki kanaj ipan tonal se, itech mestli octubre, itech non tonalmej tlajpixkej okinpiayaj inmichkauan itech youak (Lucas 2:8-12). Jesús amo okinnauati imachtijkauan ma kiiluichiuilikan ijkuak otlakatki. Tlen kema okinmilui ma kichiuakan noso ma kiilnamikikan, ye imikilis (Lucas 22:19, 20). Nochi tlen mochiua itech Navidad okiski itech yiuejkika tlaneltokalismej tlen amo melauakej. Noijki ijkon uelis tikijtoskej itech Semana Santa, ijkuak kitlayaualoltiaj Cristo ipan cruz uan amo kikuaj nakatl. Akinmej achto opejkej tlaneltokaj itech Cristo amo okichiuayaj iluitl Navidad nion Semana Santa, uan axan, akinmej melauak kichiuaj ken Cristo noijki amo kichiuaj.

4. Ijkuak kajxitiaj xiuitl: Biblia tlajtoa san itech ome tlakamej tlen oiluichijkej ijkuak okajxitijkej xiuitl uan yejuan  amo okiueyichiuayaj Jehová (Génesis 40:20-22; Marcos 6:21, 22, 24-27). Akinmej achto opejkej tlaneltokaj itech Cristo amo iluichiuayaj ijkuak okajxitiayaj xiuitl. Non okiski itech yiuejkika tlaneltokalismej tlen amo melauakej. Akinmej melauak kichiuaj ken Cristo kitemakaj tetliokolilmej uan moyolpaktiaj oksekimej tonalmej itech nochi xiuitl.

5. Kinmakajsij mikamej: Mikamej amo ueli itlaj kichiuaj nion itlaj kimachiliaj. Tejuan amo uelis tikinpaleuiskej nion yejuan uelis techtlajyouiltiskej (Salmo 146:4; Eclesiastés 9:5, 10). Ijkuak akaj miki ayakmo itlaj mokaua tlen ok yoltok (Ezequiel 18:4). Kemantika ángeles amo yolkualmej, tlen kintokayotiaj amo kuali ejekamej, monextiaj ken akinmej miktokej. Amo kuali tikinueyichiuas noso tikinmakajsis mikamej (Isaías 8:19).

6. Cruz: Jesús amo omiki ipan se cruz, omiki ipan se kuauitl melajtik. Tlajtoli griego tlen itech miakej Biblias motlajtolkuepaj “cruz”, kijtosneki san se kuauitl tlen melajtik. Cruz uits itech yiuejkika tlaneltokalismej tlen amo melauakej. Akinmej achto opejkej tlaneltokaj itech Cristo amo okitekitiltiayaj nion okiueyichiuayaj cruz. Ik non, ¿tikneltoka kuali yetos ma tiktekitiltikan se cruz ijkuak tikueyichiuaj toTajtsin Dios? (Deuteronomio 7:26; 1 Corintios 10:14.)

7. Uelis melauak oui tikauas tlaneltokilismej uan iluimej. Mochanejkauan uan moyolikniuan uelis mitsiluiskej amo xikaua tlen tikneltoka uan tlen tikchiua. Maski ijkon, okachi kipia ipati ma tikyolpaktikan toTajtsin Dios uan amo se tlakatl (Proverbios 29:25; Mateo 10:36, 37).

[[Tlaixkopinal itech página 22]

ToTajtsin Dios amo se Trinidad

[[Tlaixkopinal itech página 23]

Navidad uan Semana Santa uitsej itech yiuejkika tlaneltokalismej tlen amo melauakej

[[Tlaixkopinal itech página 23]

Amo kuali ma tikinueyichiuakan nion ma tikinmakasikan mikamej