Tlamachtil 6

¿Tlen iTekiuajkayo toTajtsin Dios?

¿Kanin kajki iTekiuajkayo toTajtsin Dios? (1)

¿Akin iueyi Tekiua? (2)

¿Katej oksekimej tlaltikpaktlakamej tlen tlanauatiskej iuan ueyi Tekiua? Tla ijkon, ¿keski? (3)

¿Tlen techititia tinemij itech itlamian tonalmej? (4) ¿Tlen kichiuas satepan iTekiuajkayo toTajtsin Dios pampa tlaltikpaktlakamej? (5-7)

1. Ijkuak Jesús okatka itech Tlaltikpak, okinmachti imachtijkauan ma kitlajtlanikan ma uiki iTekiuajkayo toTajtsin Dios. Ika tlajtoli español reino kijtosneki se tekiuajkayotl tlen kipia se tekiua. ITekiuajkayo toTajtsin Dios amo ken intekiuajkayo tlaltikpaktlakamej. Kajki itech iluikak uan ualtlanauatis ipan Tlaltikpak. Kiueyichiuas itoka toTajtsin Dios, kijtosneki kichipauas. Kichiuas ma mochiua itlanekilis toTajtsin Dios ipan Tlaltikpak ijkon ken mochijtok itech iluikak (Mateo 6:9, 10).

2. ToTajtsin Dios okijto kitlaliskia Jesús ken ueyi Tekiua itech ITekiuajkayo (Lucas 1:30-33). Ijkuak Jesús okatka itech Tlaltikpak, okiteititi yetoskia se Tekiua yolkuali, yolmelajki uan amo tlajtlakole. Ijkuak omokuepki iluikak, amo san niman okitlalijkej ueyi Tekiua itech iTekiuajkayo toTajtsin Dios (Hebreos 10:12, 13). Itech xiuitl 1914, Jehová okimakak Tekiuajkayotl Jesús ijkon ken achto okilui. Itech non tonalmej ik tlayekapan, Jesús yitlanauatijtok itech iluikak ken ueyi Tekiua tlen toTajtsin Dios okitlali (Apocalipsis 11:15).

3. Jehová noijki yokinpejpenki sekimej tlakamej uan siuamej yolmelajkej tlen katej itech Tlaltikpak tlen yaskej iluikak. Ninmej tlanauatiskej inauak Jesús ken tekiuajkej, jueces uan teopixkej ipan Tlaltikpak (Lucas 22:28-30; Apocalipsis 5:9, 10). Jesús okintokayoti akinmej inauak tlanauatiskej ken ‘mach miakej ichkamejʼ. Nochtin yejuan 144,000 (Lucas 12:32; Apocalipsis 14:1-3).

4. San niman opejki tlanauatia Jesús, Satanás uan amo kuali iejekauan tlen okatkaj iluikak okinualtlamotlakej ipan Tlaltikpak. Ik non, itech xiuitl 1914 ik tlayekapan onka okachi miak tlajyouilistli (Apocalipsis 12:9, 12). Guerras, apistli,  kokolistli, momiaktilia tlen amo kuali..., nochi nin tlamantli techititia Jesús yitlanauatijtok uan ayakmo onka miak kauitl pampa kixpoloskej tlamantli tlen amo kuali (Mateo 24:3, 7, 8, 12; Lucas 21:10, 11; 2 Timoteo 3:1-5).

5. Jesús san niman kinmixkomakas tlaltikpaktlakamej uan kinxelos ijkon ken kichiua se tlajpixki ijkuak kinxeloa ichkamej uan tentsomej. Ye kinmitas ken “ichkamej” akinmej amo keman moxeloaj inauak uan kinmakas nemilistli tlen amo keman tlamis nikan Tlaltikpak. Uan “tentsomej” yetoskej akinmej amo kiseliaj iTekiuajkayo toTajtsin Dios (Mateo 25:31-34, 46). Amo miak kauitl poliui uan Jesús kinmixpolos nochtin tlen katej ken tentsomej (2 Tesalonicenses 1:6-9). Tla tejuatsin tikneki tiyetos se “iichka” Jesús, moneki tikakis tlen motematiltia itech iTekiuajkayo toTajtsin Dios uan tikchiuas ken timomachtia (Mateo 24:14).

6. Ipan Tlaltikpak katej miakej uejueyi altepemej tlen kipiaj intekiua. Uejueyi altepemej san yejuan moteuiaj. ITekiuajkayo toTajtsin Dios kinpatlas nochtin ninmej tekiuajkej. Uan san ye mokauas itech nochi Tlaltikpak (Daniel 2:44). Ijkuakon, ayakmo momiktiskej uan ayakmo mochiuas tlen amo kuali. Nochtin tlaltikpaktlakamej san sekan chantiskej ika yolseuilistli (Miqueas 4:3, 4).

7. Itech Mil xiuitl ijkuak tlanauatijtos Jesús, tlaltikpaktlakamej tlen yolmelajkej ayakmo kipiaskej tlajtlakoli uan nochi Tlaltikpak mokuepas se xochitlal. Jesús kichiuas nochi tlen toTajtsin Dios kinekia kichiuas ijkuak tlamis mil xiuitl. Ijkuakon kimakas Tekiuajkayotl iTajtsin (1 Corintios 15:24). ¿Tleka amo tikinmiluia moyolikniuan uan mochanejkauan tlen kichiuas iTekiuajkayo toTajtsin Dios?

[Tlaixkopinal itech página 13]

Ijkuak Jesús tlanauatis, ayakmo mokokoliskej nion motlauelitaskej