Tlamachtil 5

¿Tlen kineki kichiuas toTajtsin Dios ipan Tlaltikpak?

¿Tleka Jehová okichijchi Tlaltikpak? (1, 2)

¿Tleka Tlaltikpak amo se xochitlal? (3)

¿Tlen kinpanos akinmej amo yolkualmej? (4)

¿Tlen kichiuas Jesús pampa akinmej mokokoaj?, ¿akinmej yikipiaj miak xiuitl?, ¿uan akinmej yomikej? (5, 6)

¿Tlen moneki tikchiuas pampa tikselis tlateochiualismej? (7)

1. Jehová okichijchi Tlaltikpak pampa tlaltikpaktlakamej ma nemikan itech nochipa. Ye kinekia ma yetokan itech Tlaltikpak akinmej yolpakij uan yolmelajkej (Salmo 115:16; Isaías 45:18). Tlaltikpak amo keman kixpoloskej, nochipa yetos (Salmo 104:5; Eclesiastés 1:4).

2. Achto kichiuaskia tlaltikpaktlakatl, toTajtsin Dios okipejpenki sekan itech Tlaltikpak, uan okikuepki se kualtsin xochitlal tlen okitokayoti “Edén”. Ompa okintlali achto tlakatl uan siuatl: Adán uan Eva. ToTajtsin Dios kinekia ma kipiakan inkoneuan uan ma kitemitikan nochi Tlaltikpak. Ajachitsin mokuepaskia nochi Tlaltikpak se xochitlal (Génesis 1:28; 2:8, 15).

3. Adán uan Eva otlajtlakojkej pampa amo okitlakamatkej itlanauatil toTajtsin Dios maski kimatiaj tlen kinpanoskia. Ik non, Jehová okinkixti itech xochitlal Edén, uan ijkon opoliuik xochitlal (Génesis 3:1-6; 23). Maski ijkon, Jehová amo kilkaua tlen kineki kichiuas ipan Tlaltikpak. Ye kijtoa kikuepas se xochitlal kanin nemiskej tlaltikpaktlakamej nochipa. ¿Ken kichiuas? (Salmo 37:29.)

4. Achto mochiuas nin Tlaltikpak se xochitlal, ixpoliuiskej akinmej amo yolkualmej (Colosenses 3:6). Nin mochiuas itech Armagedón, iguerra toTajtsin Dios kanin kixpolos nochi tlen amo kuali. Satepan, Satanás kitsakuaskej mil xiuitl, kijtosneki amo mokauas akin kijtlakos Tlaltikpak. San mokauas ialtepetl toTajtsin Dios (Apocalipsis 16:14, 16; 20:1-3).

5. Ijkuakon, Jesucristo ualtlanauatis mil xiuitl nikan Tlaltikpak (Apocalipsis  20:6). Uan ajachitsin kitlajtlamis tlajtlakoli itech tokuayejyekol uan itech tonakayo. Ayakmo tiyetoskej titlajtlakolejkej ijkon ken Adán uan Eva okatkaj achto tlajtlakoskiaj. Ayakmo yetos kokolistli, ayakmo ueuejtiskej nion ayakmo yetos mikilistli. Akinmej mokokoaj mopajtiskej uan akinmej yikipiaj miak xiuitl mokuepaskej telpokamej (Job 33:25; Isaías 33:24; Apocalipsis 21:3, 4).

6. Ipan Mil xiuitl ijkuak tlanauatijtos Jesús, tlaltikpaktlakamej akinmej yolkualmej kikuepaskej Tlaltikpak se xochitlal (Lucas 23:43, NM). Noijki, sapanoa miakej mikamej kinyolitiskej uan oksepa nemiskej ken tlaltikpaktlakamej ipan Tlaltikpak (Hechos 24:15). Tla kichiuaj tlen toTajtsin Dios kineki ma kichiuakan, uelis nemiskej itech Tlaltikpak nochipa. Tla amo kichiuaj, kinmixpoloskej (Juan 5:28, 29; Apocalipsis 20:11-15).

7. Ijkon mochiuas tlen achto kinekia toTajtsin Dios ma mochiua ipan Tlaltikpak. ¿Mitspaktiskia tikselis ninmej tlateochiualismej? Tla kema, moneki timomachtis okachi itech Jehová uan tiktlakamatis itlanauatiluan. Itlaj tlen mitspaleuis, ye timonechikos itech Kali kanin monechikoaj iTlaixpantijkauan Jehová kanin tichanti (Isaías 11:9; Hebreos 10:24, 25).

[Tlaixkopinal itech página 10]

Xochitlal tlen opoliuik

[Tlaixkopinalmej itech página 11]

Satepan panos Armagedón, Tlaltikpak mochiuas se xochitlal