Jesucristo ye iKone Jehová uan iyolikni tlen okachi kitlasojtla. Achto ualaskia nikan Tlaltikpak, Jesús okatka iluikak ken se ángel tlen okipiaya miak chikaualistli (Juan 17:5). Satepan ouala nikan Tlaltikpak, pampa kinmachtis tlaltikpaktlakamej tlen melauak itech toTajtsin Dios (Juan 18:37). Noijki, okitemakak inemilis pampa akinmej tetlakamatij, uan ijkon kinmakixtis itech tlajtlakol uan mikilistli (Romanos 6:23). Axkan Jesús ueyi Tekiua itech iTekiuajkayo toTajtsin Dios, se tekiuajkayotl tlen kajki iluikak tlen kichiuas Tlaltikpak ma mokuepa se Xochitlal (Mateo 28:18).

Ángeles noijki iyolikniuan toTajtsin Dios. Innemilis ángeles amo opejki ken tlaltikpaktlakamej ipan Tlaltikpak. ToTajtsin Dios okinchijchi ipan iluikak achto kichijchiuaskia Tlaltikpak (Job 38:4-7). Katej sapanoa miakej ángeles (Apocalipsis 5:11). Yejuan iyolikniuan toTajtsin Dios tlen katej iluikak uan kinekij ma kimatikan tlaltikpaktlakamej tlen melauak itech Jehová (Apocalipsis 14:6, 7).

ToTajtsin Dios noijki kipia iyolikniuan nikan Tlaltikpak; kintokayotia itlaixpantijkauan. Se tlaixpanti ye akin kijtoa ixpan tekiuajkej tlen kimati itech akaj noso itlaj. Itlaixpantijkauan Jehová tetlapouiaj itech Jehová uan itlanekilis inauak oksekimej tlaltikpaktlakamej (Isaías 43:10). Ijkon ken ángeles, iTlaixpantijkauan Jehová kinekij mitspaleuiskej xikixmati tlen melauak itech Jehová. Kinekij tejuatsin noijki ximochiua iyolikni toTajtsin Dios.