Moneki timochijchikauaskej pampa tikpiaskej toyolikniuan uan kuali timouikaskej innauak. Tla timochijchikauaj pampa tiyetoskej tiiyolikniuan toTajtsin Dios uan kuali timouikaskej iuan, tikpiaskej miak tlateochiualistli. Jesús okinmilui akinmej otlaneltokayaj itech: “Tlan melauak amechmakixtis” (Juan 8:32). ¿Tlen kinekia kijtos?

Uelis axkan tiyolpakiskej pampa amo itlaj techtsakuilia. Uelis tikauaskej tlamachtilmej tlen amo melauak uan tlakajkayaualis tlen Satanás kixitinijtok. Noijki uelis tikpiaskej se kuali chialistli, amo ken miakej tlaltikpaktlakamej tlen amo kixmatij Jehová (Romanos 8:22). Iyolikniuan toTajtsin Dios nion “momaujtiaj mikiskej” (Hebreos 2:14, 15).

Uelis tiyolpakiskej ipan yankuik Tlaltikpak tlen toTajtsin Dios kiualikas, kanin amo itlaj techtsakuilis. ¡Kualtsin nemilistli tikpiaskej ipan non tonalmej! Ijkuak Tlaltikpak mochiuas se Xochitlal, amo yetos guerras, kokolistli nion mochiuas tlamantli tlen amo kuali. Amo yetos apistli nion kijtoskej amo kipiaj tomin. Amo tiueuejtiskej, timikiskej, timomojtiskej, techtlajyouiltiskej nion mochiuas tlen amo kuali. Biblia kijtoa: “ToTajtsin Dios [...] Yej techtliokolia iuan techmaka nochi tlan kuale” (Santiago 1:17).

 Iyolikniuan toTajtsin Dios nemiskej nochipa. Nemilistli tlen amo keman tlamis se kualtsin tetliokolil tlen toTajtsin Dios kinmakas nochtin akinmej mochiuaj iyolikniuan (Romanos 6:23). ¡Ximokuayejyeko tlen uelis tikchiuas tla tikpias nemilistli tlen amo keman tlamis!

Yetos miak kauitl pampa tikchiuaskej tlen tiknekiskej. Uelis tiknekiskej timomachtiskej titlatsotsonaskej, tikmachijchiuaskej se ixkopinkayotl uan tiktlapaluiskej noso tiknekiskej tikchiuaskej okseki tlamantli tlen axan amo tiueli. Uelis tiknekiskej okachi tikinmixmatiskej yolkamej noso xochimej. Noso uelis tiknekiskej tikixmatiskej oksekimej ueyi altepemej uan tlaltikpaktlakamej tlen ompa nemij. Ken tikpiaskej nemilistli tlen amo keman tlamis, uelis tikchiuaskej nochi ninmej tlamantli.

Yetos miak kauitl pampa tikpiaskej miakej toyolikniuan. Ken tikpiaskej nemilistli tlen amo keman tlamis uelis tikixmatiskej miakej iyolikniuan toTajtsin Dios. Tikmatiskej tlen kimatij kichiuaj, tlen kuali inyelis kipiaj uan noijki timochiuaskej tiiyolikniuan. Tikintlasojtlaskej, uan yejuan techtlasojtlaskej (1 Corintios 13:8). Ken tikpiaskej nemilistli tlen amo keman tlamis, uelis timochiuaskej tiiyolikniuan nochtin tlaltikpaktlakamej. Uan tlen okachi kuali, toyekuikalis inauak Jehová okachi mochikauas ijkuak panos xiuitl. ¡Nochipa ma tiyetokan tiiyolikniuan toTajtsin Dios!