SATEPAN Salomón okika Jehová, Israel omoxelo itech ome tekiuajkayotl, ijkon ken Jehová okijtojka. Okimakakej tekiuajkayotl Rehoboam, ikone Salomón, majtlaktli nechikolmej tlen omokauayaj norte omoxelojkej itech altepetl pampa otlajyouiayaj miak ika itekiuajkayo Rehoboam. Ome nechikolmej tlen amo omoxelojkej itech itekiuajkayo David tlen okatka Jerusalén, yejuan omokajkej ken tekiuajkayotl sureño itech Judá.

Ken inueyi tekiuajkej amo otetlakamatkej uan amo otlaneltokakej, nion se itech ome tekiuajkayotl amo kipiayaj yolseuilis nion kuali okatkaj. Uan okachi otlajyoui tekiuajkayotl norteño itech Israel, inueyi tekiuajkej okichijkej uan otemachtijkej tlaneltokilis tlen amo melauak. Uan maski toTajtsin Dios okintitlanili teotlajtojkej ken Elías uan Eliseo —maski yejuan okinyolitijkej sekimej tlaltikpaktlakamej—, amo otlaneltokakej. Saiktlami, toTajtsin Dios okikauili Asiria ma kimoaxkati Israel.

Opanok kanaj 100 xiuitl, Jehová noijki okitlajyouilti tekiuajkayotl sureño. Iteotlajtojkej toTajtsin Dios okinnejmachtijkej ueyi tekiuajkej, uan san sekimej otlakakej uan omochijchikajkej pampa altepetl mokuepaskia inauak Jehová oksepa. Se neskayotl, ueyi tekiua Josías okitlajtlami tlaneltokilis tlen amo melauak uan okiyektlali iteokali Jehová. Ijkuak okiyektlalijtoka, okajsikej se tlajkuilol itech Tlanauatil tlen okijkuilo Moisés. Josías omoyolchika uan okachi omochijchika pampa kitlajtlamis tlaneltokilis tlen amo melauak.

Maski ijkon, amo nochtin tekiuajkej okichijkej ken Josías. Ik non, Jehová okinkauili babilonios ma kimoaxkatikan Judá uan ma kixpolokan Jerusalén uan iteokali. Tlen omakiskej okinuikakej Babilonia, uan toTajtsin Dios okijto ke panoskia 70 xiuitl pampa mokuepaskiaj Jerusalén. Uan itech Judá amo akaj chantiskia.

Achto ualaskia ueyi Tekiua tlen omoijtojka —Mesías—, nion se ixui David tlanauatiskia. Ueyi tekiuajkej tlen okiskej itech itekiuajkayo David okiteititijkej ke tlaltikpaktlakamej amo ueli tlanauatiaj. San ye Mesías uelis kuali tlanauatis. Ik non, Jehová okilui satepan ueyi tekiua: “Corona [...] amo akaj kimotlalilis, iaxka yetos akin uits pampa kinamiki kipias, uan ijkuakon ye nikmakas” (Ezequiel 21:26, 27).

(Okisak itech 1 Reyes, 2 Reyes, uan itech 2 Crónicas tlakotonaltin 10 a 36 uan itech Jeremías 25:8-11.)