Melauak techyolkokoa ijkuak tikitaj se tokalchanejka, noso se toyolikni kikixtiaj itech tlanechikol pampa amo moyolkuepa. Tla tiktlakamatiskej tlen kijtoa Biblia ijkuak ijkon panos, tikteititiskej tla tiktlasojtlaj Jehová ika nochi toyolo uan tla melauak tiknekij tikintlakamatiskej itlanauatiluan. * Ik non, ma tikitakan seki tlamantli tlen uelis panos.

¿Uelis iuan timouikaskej akin okikixtijkej itech tlanechikol? Biblia kijtoa: “Amo ximowikakah iwa akin kijtoa nomokni itech Cristo, iwa ok momekatijtinemi, noso tominápistli, noso kinweyilia diosmeh non kinmachijchiwah, noso xolópijtli, tláwanki, noso tlachtek, iwa non tlakatl nion amo íwa xitlakuakah” (1 Corintios 5:11). Uan noijki kijtoa: “Nochi akin [...] amo kitlakita itemachtilis Cristo, [...] amo xikkalakikah [nomocha] nion xikselikah nion xiktlajpalokah, porke akin kitlajpaloa noiwa moiknitia ika tlan ye kichijtinemi” (2 Juan 9-11). Ken tikitaj, amo uelis iuan timouikaskej nion timotlapouiskej itech iTlajtol toTajtsin Dios akin okikixtijkej itech tlanechikol. Ijkon ken okijto La Atalaya 15 de noviembre de 1981, itech página 19: “Maski san tikiluiskej: ¡Panolti!, uelis kichiuas okachi iuan ma timotlapouikan noso iuan ma timouikakan. ¿Tiknekij iuan timouikaskej akin okikixtijkej itech tlanechikol?”.

¿Sepa amo uelis tiknotsaskej? Amo, uan onka miak tlamantli tlen ijkon kiteititiaj. Achto, pampa moneki tiyetoskej tiyolmelajkej iuan Jehová uan iTlajtol. Moneki nochipa tiktlakamatiskej Jehová, maski ualeua sapanoa oui. Jehová kichiua nochi ika melajkayotl, techmaka itlanauatiluan pampa kuali ma tiyetokan, uan pampa tiktlasojtlaj, tikintlakamatij itlanauatiluan (Isaías 48:17; 1 Juan 5:3). Ome, moneki timoxeloskej itech akin otlajtlakolchi tlen amo moyolkuepa, pampa tlanechikol yetos chipauak, amo moijtos tlen amo kuali itech uan pampa nochtin kipiaskej  chikauak intlaneltokilis (1 Corintios 5:6, 7). Eyi, tla tikintlakamatij principios bíblicos, uelis tikpaleuiskej akin otlajtlakolchi. Ijkuak tikchiuaj ijkon ken okijtojkej eyi tlayekankej tlen okiyektlalijkej non ouijkayotl, uelis tikpaleuiskej akin otlajtlakolchi pampa uelis ayamo kineki ma kipaleuikan tlayekankej. Kema, ika tlen tikchiuaskej, uelis tikyoliniskej ma kipatla iyelis. Ijkuak kitas ayakmo uelis mouikas iuan ikalchanejkauan uan iyolikniuan, uelis moilnamikis uan kajsikamatis otlajtlakolchi uan moneki mochijchikauas pampa ma kitlapojpolui Jehová (Lucas 15:17).

¿Uan tla kikixtiaj itech tlanechikol se tokalchanejka? Ijkuak kikixtiaj se tokalchanejka, uelis okachi oui tikintlakamatiskej itlanauatiluan Jehová. Tla ijkon techpanos, ¿tlen tikchiuaskej iuan akin okikixtijkej? Maski amo uelis titlajtoskej itech nochi tlamantli tlen uelis tikchiuaskej, tikitaskej ome tlamantli.

Ualeua akin kikixtiaj uelis yetos ikaj tlen chanti touan, ken tonana, totata noso se tokni. Maski okikixtijkej, amo kijtosneki ayakmo tokalchanejka, ik non, ok uelis iuan tikchiuaskej seki tlamantli itech tokalijtik. Pero amo uelis iuan timouikaskej, noso timotlapouiskej itech iTlajtol toTajtsin Dios, pampa ye ijkon okipejpenki. Tla tiknekij tiyetoskej tiyolmelajkej iuan Jehová, amo uelis tikkauiliskej tokalchanejka tlen okikixtijkej itech tlanechikol ma kiueyichiuaj Jehová touan. Se neskayotl, ijkuak tikueyichiuaj Jehová ken kalchanejkej, uelis touan yetos pero amo uelis tlanankilis. Pero tla akin okikixtijkej ok tsikitsin, itatajuan ok moneki kimachtiskej uan kiyektlaliskej. Ik non, uelis kitlaliskej se tonal ijkuak kimachtiskej ika Biblia (Proverbios 6:20-22; 29:17). *

Ualeua, akin okikixtijkej itech tlanechikol uelis ayakmo chanti iuan itatajuan noso iuan iikniuan. Maski ualeua monekis iuan motlapouiskej itech itlaj tlen panotok itech ikalchanejkauan, amo iuan mouikaskej. Akinmej kinekij yetoskej yolmelajkej,  amo san kitemojtinemiskej ken uelis iuan motlapouiskej akin okikixtijkej tlen ayakmo inmiuan chanti. Okachi kuali, pampa kinekij yetoskej yolmelajkej iuan Jehová uan ialtepe, kitlakamatij tlen kijtoa Biblia ijkuak kikixtiaj ikaj itech tlanechikol. Noijki nin kichiuaj pampa kinekij kuali ma yeto inkalchanejka, uan non uelis kipaleuis ma moyektlali (Hebreos 12:11). *