TLAXELOL 1
“Akin politok niktemos”
Ichkatsin opoliuik. Ijkuak otlakuajtoka omoxelo uan amo okimatki kanin omoxelo. Ayakmo kinmita okseki ichkamej nion itlajpixki. Axkan ayakmo ikaj kimaluia uan ompa katej miakej yolkamej tlen uelis kikuaskej uan peua tlayoa. Pero san niman kikaki itlajpixki, akin kuali kixmati. Tlajpixki motlaloa, kiajkokui uan kinapaloa ika itlaken uan kiuika ikalijtik.
MIAK uelta Jehová moneskayotia ken se tlajpixki. Itech iTlajtol techiluia: “Nikintemos nochkauan uan nikinmaluis” (Ezequiel 34:11, 12).
“Nikinmaluis nochkauan”
¿Akinmej iichkauan Jehová? Nochtin akinmej kitlasojtlaj uan kiueyichiuaj. Biblia kijtoa: “Xiualakan, ma tikueyichiuakan uan ma timotolokan; ma timotlankuaketsakan iixpan Jehová akin oTechchijchi. Pampa ye toTajtsin Dios, uan tejuan tiialtepe tlen kintlajpia, ichkamej tlen kinmaluia” (Salmo 95:6, 7). Akinmej kiueyichiuaj Jehová kinekij kitokaskej inTlajpixki, ijkon ken kichiuaj ichkamej. Pero amo nochipa uelij kichiuaj. Ualeua itekipanojkauan Jehová katej ken ichkamej tlen xexelitokej, omoxelojkej uan oksekimej tlen yolik peua moxeloaj (Ezequiel 34:12; Mateo 15:24; 1 Pedro 2:25). Pero maski ikaj ijkon kipanos, Jehová amo kikaua, pampa kimati uelis moyektlalis.
¿Tikmachilia Jehová motlajpixki? Axkan, ¿ken techmaluia ken se tlajpixki?
Techmaka tlakuali espiritual. Jehová kijtoa: “Kanin onka kuali xiuitl namechtlamakas uan [...] motekaskej kanin onka kuali xiuitl uan kikuaskej xiuitl tlen okachi kuali” (Ezequiel 34:14). Jehová nochipa techmaka tlatlamantli tlakuali ijkuak okachi moneki. ¿Tikilnamiki se tlamachtil, se revista noso se video tlen ika omitsnankili Jehová? ¿Otikmachili Jehová motech motekipachoa?
Techmaluia uan techpaleuia. Jehová kijtoa: “Akin omoxelo oksepa nikualikas, akin omoposteki nikkemilos uan akin omokoko nikyolchikauas” (Ezequiel 34:16). Jehová kinyolchikaua akinmej moyolkokoaj noso sotlauaj pampa itlaj kintekipachoa. Ye kinkemiloa ichkamej tlen mokokoaj pampa ma pajtikan tla ikaj okinkoko, uan noijki tla se tokni okinkoko. Uan kinpaleuia ma mokuepakan akinmej omoxelojkej uan mokuayejyekoaj tlen amo kuali.
Techtemoa tla timopoloaj. Jehová kijtoa: “Nikinmakixtis maski san kanin opolitokaj” uan “akin politok niktemos” (Ezequiel 34:12, 16). Maski ikaj yomoxelo Jehová amo kilkaua Ye kita ijkuak ikaj poliui, ik non, kitemoa uan yolpaki ijkuak kajsi (Mateo 18:12-14). Uan itekipanojkauan yolmelauakej kintokayotia nochkauan (Ezequiel 34:31). Tejuatsin tiichkatsin Jehová.
Jehová kimati maski yomoxelojkej oksepa uelis kinpaleuis. Ik non, kintemoa uan yolpaki ijkuak kinmajsi
“Xikinyankuili tonalmej ken yiuejkika”
¿Tikmati tleka Jehová mitstemoa uan mitstlatlaujtia iuan ximokuepa? Pampa kineki xiyolpaki. Ye kijtoa sapanoa kinteochiuas iichkauan (Ezequiel 34:26). Uan melauak kichiuas. Itech monemilis yotikitak ken ijkon yokichi.
Xikilnamiki tlen otikmachili ijkuak opejki tikixmati Jehová. Se neskayotl, ijkuak otikmatki toTajtsin Dios itoka Jehová uan tlen kineki pampa nochtin tejuan. ¿Tikilnamiki ken otimoyolchikauaya ijkuak otimonechikoaya iuan tokniuan itech uejueyij nechikolmej? Uan ijkuak otikintlapouiaya tlaltikpaktlakamej itech kuali tlajtolmej tlen tikinmajsij itech Biblia, ¿amo melauak otiyolpakiaya uan kuali otimomachiliaya?
Oksepa uelis ijkon timomachilis. Yiuejkika itekipanojkauan Jehová okitlatlaujtijkej: “Xikchiua motech ma timokuepakan, oh Jehová, uan san niman timokuepaskej. Xikinyankuili tonalmej ken yiuejkika” (Lamentaciones 5:21). Jehová okinankili uan ialtepe oksepa oyolpakik (Nehemías 8:17). Ye noijki ijkon mitspaleuis.
Uan nochtin akinmej kinekij oksepa mokuepaskej inauak Jehová kipanoskej seki ouijkayotl. Axkan tikitaskej seki ouijkayotl tlen uelis mitspanos uan ken uelis titlaxikos.
Xamo noijki mitspaktis
DOCUMENTALES
Tikatej san sekan pampa techmachtia toTajtsin Dios
¿Ken okinpaleui miakej uejueyij nechikolmej “Techmachtia toTajtsin Dios?
DOCUMENTALES
ITlaixpantijkauan Jehová: akinmej melauak tlaneltokaj. Tlaxelol 1: Okiskej itech tlen amo melauak
Tikitaj inneskayo sekimej tlaltikpaktlakamej tlen okiskej itech tlen amo melauak maski okintlajyouiltijkej. Inneskayo techpaleuis pampa tiktekichiuiliskej toTajtsin Dios.
DOCUMENTALES
ITlaixpantijkauan Jehová: akinmej melauak tlaneltokaj. Tlaxelol 2: Kitematiltiaj tlen melauak
Jesús okinmilui imachtijkauan ma kintlapouikan nochtin tlaltikpaktlakamej. Maski okintlajyouiltijkej Akinmej oMomachtiayaj Biblia, okitakej tlen kijtosneki kitematiltiskej tlen melauak.
