TLAXELOL 3
Ijkuak techyolkokoaj: ‘Tla se nomokni onomechchiwili itla amo kuali’
“Se tokni okijto onikichtekili itomin. Ijkuak sekimej tokniuan okimatkej, sekimej onechpaleuijkej uan oksekimej okipaleuijkej. Satepan tokni okajsikamatki ne amo oniktlachteki. Maski okijto ma niktlapojpolui, onikmachili amo keman niktlapojpoluiskia pampa sapanoa onechyolkoko.” (Linda)
¿OMITSPANOK ken Linda? Ye sapanoa okiyolkoko tlen okichiuili tokni. Teyolkoko tikmatiskej sekimej sapanoa kintekipachoa tlen oksekimej tokniuan kichiuaj, ik non, ayakmo chikauak intlaneltokilis. ¿Ijkon omitspanok?
¿Uelis ikaj techxelos itech itlasojtlalis toTajtsin Dios?
Ijkuak ikaj techchiuilia itlaj amo kuali, uelis oui tiktlapojpoluiskej, uan okachi tla kichiua ken Cristo uan omonekiaya ma techtlasojtla (Juan 13:34, 35). Ik non, ijkuak se tokni itech tlanechikol techchiuilia itlaj amo kuali ayakmo itech titlaneltokaj uan sapanoa timoyolkokoaj (Salmo 55:12).
Biblia techiluia ualeua se tokni uelis okiyolkoko okse tokni (Colosenses 3:13). Pero ijkuak tejuan ijkon techpanoa, uelis oui titlaxikoskej. ¿Tlen techpaleuis? Ma tikitakan eyi principios bíblicos.
ToTajtsin Dios kita nochi tlen techpanoa. Jehová kita nochi tlen techpanoa, ken ijkuak techchiuiliaj itlaj amo kuali uan titlajyouiaj (Hebreos 4:13). Uan noijki kimachilia tlen tejuan tikmachiliaj (Isaías 63:9). Amo kitekauilia ouijkayotl noso okse tlamantli —nion se tokni— ma ‘techachiwa de itech itlasojtlalis Dios’ (Romanos 8:35, 38, 39). Ma tikchiuakan ken ye uan amo ma tikkauakan nion ikaj noso itlaj ma techxelo itech itlasojtlalis Jehová.
Titetlapojpoluiskej amo kijtosneki kuali tikitaj tlen otechchiuilijkej. Tiktlapojpoluiskej ikaj amo kijtosneki amo se ueyi tlamantli tlen otechchiuili noso tikijtoskej kuali tikitaj tlen okichi. Jehová amo kiselia tlajtlakoli, pero ijkuak moneki tetlapojpoluia (Salmo 103:12, 13; Habacuc 1:13). Jehová amo nochipa kilnamiktok tlen tikchiuaj, uan ken kineki ma tikchiuakan ken ye techyoleua ma titetlapojpoluikan (Salmo 103:9; Mateo 6:14).
Ijkuak tikilkauaj tlen otechchiuilijkej techpaleuia. ¿Tleka? Ximokuayejyeko tikitskia se tetl tlen etik kanaj se kilo uan tikmelaua moma. Uelis achto amo timasotlaua. Pero ¿tlen panos tla okachi tiuejkauas tikitskijtos tetl? Tla panos miak kauitl kanaj se hora noso okachi, timasotlauas. Non tetl amo okachi etik, san se kilo, pero tla panoa kauitl satepan tikmachilis sapanoa etik. Ijkon techpanoa ijkuak titetlapojpoluiaj pero amo tikilkauaj tlen otechchiuilijkej, satepan tikitaskej sapanoa oui maski amo okachi ueyi tlajtlakoli tlen otechchiuilijkej, uan satepan san toneuian timotlajyouiltiskej. Ik non, Jehová techiluia ma titetlapojpoluikan, pampa non tlen melauak techpaleuis (Proverbios 11:17).
Sapanoa tlapaleuia tikilkauaskej tlen otechchiuilijkej
“Onikitak ken Jehová nechtlapouijtoskia”
¿Tlen okichi Linda pampa kitlapojpoluis tokni tlen okitlajtlakolti? Achto omokuayejyeko itech tlen Biblia kijtoa itech tleka moneki ma titetlapojpoluikan (Salmo 130:3, 4). Uan Linda okitlajtlachialti kimatis tla tikintlapojpoluiaj oksekimej pero amo tikilkauaj tlen otechchiuilijkej, Jehová noijki amo techtlapojpoluis (Efesios 4:32–5:2). Ijkuak mokuayejyekoa ken okipaleuijkej ninmej tlaxelolmej ye kijtoa: “Onikitak ken Jehová nechtlapouijtoskia”.
Satepan Linda okilka nochi. Melauak okitlapojpolui tokni uan axkan sapanoa kuali mouikaj. Axkan Linda kitekichiuilia Jehová. Uan Jehová kineki noijki nochipa xiktekichiuili.
