TLAMACHTIL 8
Ijkuak panoa itlaj amo kuali
“Nomejwah xikpiakah pakílistli, porke nontlaijyowiskeh kanaj kech tonatih.” (1 Pedro 1:6)
Maski timochijchikauas pampa ma yolpakikan mokalchanejkauan uan kuali ma yeto monamiktilis, ualeua panoa itlaj tlen kichiua ayakmo xiyolpakikan (Eclesiastés 9:11). Pero toTajtsin Dios techpaleuia ijkuak tikpanotokej itlaj amo kuali. Tla nankichiuaj tlen kijtoaj principios bíblicos, tejuatsin uan mokalchanejkauan uelis nankixikoskej ueyi ouijkayotl.
1 XITLANELTOKA ITECH JEHOVÁ
BIBLIA KIJTOA: “Nochi tlan nomechtekipachoah, xiktlalikah imak Dios, porke Ye nomechmokuitlawia [noso namechmaluia]” (1 Pedro 5:7). Nochipa xikilnamikto, toTajtsin Dios amo techtlajyouiltia (Santiago 1:13). Tla inauak timotokia melauak mitspaleuis (Isaías 41:10). “Xikiluikan tlen nankipiaj itech namoyolo.” (Salmo 62:8.)
Biblia noijki uelis mitspaleuis tla nochipa tiktlajtoltia uan timomachtia. Tla ijkon tikchiua, tikitas ken Jehová techyolchikaua ijkuak itlaj techpanoa (2 Corintios 1:3, 4; Romanos 15:4). Jehová kijtoa mitsmakas yolseuilistli (Filipenses 4:6, 7, 13).
TLEN UELIS TIKCHIUAS:
-
Xikilui Jehová ma mitspaleui pampa amo ximotekipacho uan pampa kuali timokuayejyekos
-
Xikita keski tlamantli uelis tikpejpenas pampa tikchiuas tlen okachi kuali
2 XIMOMALUI UAN XIKINMALUI MOKALCHANEJKAUAN
BIBLIA KIJTOA: “Iyolo akin ixtlamatki kiselia tlamatilistli, uan inakas akin ixtlamatki mochijchikaua kajsis tlamatilistli” (Proverbios 18:15). ¿Tlen kintekipachoa sejse mokalchanejkauan? Moneki tikajsikamatis nochi tlen kintekipachoa. Inmiuan ximotlapoui uan kuali xikinkaki (Proverbios 20:5).
¿Uan tlen panos tla ikaj akin tiktlasojtla miki? Amo xipinaua pampa tikteititis tlen tikmachilia itech moyolo. Xikilnamiki noijki “Jesús ochokak” (Juan 11:35; Eclesiastés 3:4). Timoseuis uan tikochis noijki miak ipati (Eclesiastés 4:6). Ijkon okachi amo oui tikixnamikis ouijkayotl.
TLEN UELIS TIKCHIUAS:
-
Ximotlapoui iuan mokalchanejkauan achto tlapanos itlaj tlen amo kuali. Ijkon ijkuak itlaj panos, uelis kuali inmiuan timotlapouis
-
Ximotlapoui inmiuan akinmej noijki okinpanok itlaj tlen amo kuali
3 XIKTEMO AKIN UELIS MITSPALEUIS
BIBLIA KIJTOA: “Se melauak toyolikni nochipa techtlasojtla, uan ye se tokni tlen kajki ijkuak timoyolkokoaj” (Proverbios 17:17). Moyolikniuan kinekij mitspaleuiskej, maski ualeua amo kimatij ken kichiuaskej. Amo xipinaua uan xikinmilui tlen tikneki (Proverbios 12:25). Noijki xiktemo akin kixmati uan uelis mitspaleuis ika Biblia. Ika tlen mitsiluis uelis titlaxikos (Santiago 5:14).
Tla nochipa timouika iuan akinmej tlaneltokaj itech Jehová uan tlaneltokaj tlen kijtoa, uelis mitspaleuiskej ijkuak itlaj amo kuali mitspanos. Noijki timoyolchikauas tla tikinpaleuis akinmej moyolkokoaj. Xikintlapoui ken titlaneltoka itech Jehová uan tlen kichiuas satepan. Nochipa xikchiua tlen moneki pampa tikinpaleuis oksekimej uan amo ximoxelo itech akinmej mitstlasojtlaj uan motekipachoaj motech (Proverbios 18:1; 1 Corintios 15:58).
TLEN UELIS TIKCHIUAS:
-
Ximotlapoui iuan akin kuali timouika uan xikaua ma mitspaleui
-
Xikilui ika nochi moyolo tlen tikmachilia
