Miakej israelitas oksepa okinueyichijkej teotsitsintin. Ik non, Jehová okinkauili filisteos ma kimoaxkatikan altepetl Israel. Pero sekimej israelitas kema okitlasojtlayaj Jehová. Ijkon okichi se tlakatl tlen omotokayotiaya Manóah. Ye iuan isiua amo ueli okinpiayaj inkoneuan. Se tonal, Jehová okititlanki se ángel ma kiluiti isiua Manóah: “Tikpias se mokone tlen kinmakixtis israelitas inmak filisteos. Yetos nazareo”. ¿Tikmati akinmej okatkaj nazareos? Yejuan okachi okitekichiuiliayaj Jehová uan amo keman okinximayaj.

Satepan, oneski ikone Manóah uan okitokayotijkej Sansón. Ijkuak omoskalti, Jehová okimakak miak chikaualistli. ¡Ueli okimiktiaya se león san ika imauan! Se tonal, san iselti okinmikti 30 filisteos. Ik non, filisteos okikokoliayaj uan omokuayejyekojkej ken kimiktiskiaj. Se yoak, Sansón okochtoka altepetl Gaza. Akinmej okikokoliayaj oyajkej kanin okatka ikaltlatsakuil altepetl uan ompa okichixkej para kualkan kimiktiskiaj. Pero, tlajko yoak, Sansón omejki uan oyajki kanin okatka ikaltlatsakuil altepetl uan okiuiuitlak kaltlatsakuil. Okimama uan okiuikak ipan se tepetl ik altepetl Hebrón.

Satepan, filisteos omotlapouitoj iuan inovia Sansón tlen omotokayotiaya Dalila uan okiluijkej: “Timitsmakaskej miak platajtomin tla tiktlajtlanis Sansón tleka sapanoa chikauak. Tiknekij tikitskiskej uan tiktsakuaskej”. Dalila okinekiaya tomin, ik non, okinmilui kinpaleuiskia. Sansón amo okiluiaya Dalila tleka okatka sapanoa chikauak. Pero Dalila sapanoa okikuejso, ik non, Sansón okilui: “Amo keman nechtekiliaj notsonkal porque ninazareo. Nikpolos nochikaualis tla nechtekiliskej notsonkal”. Amo kuali okichi Sansón ijkuak ijkon okilui Dalila, ¿melauak?

Dalila san niman okinmiluito filisteos: “¡Yinikmati tleka sapanoa chikauak!”. Satepan, Dalila okichi Sansón ma kochi ipan itlankuauan uan okinotski se tlakatl para ma kixima. Ijkuakon, Dalila chikauak  okijto: “¡Sansón, nikan katej filisteos!”. Sansón oijsak pero okimachili ayakmo okipiaya chikaualistli. Filisteos okikitskijkej, okinkixtilijkej ixtololouan uan okitsakej.

Se tonal, miakej filisteos omonechikojkej itech teokali kanin okiueyichiuayaj Dagón. Chikauak okijtoayaj: “Todios otechpaleui ma tikitskikan Sansón. Xikixtikan para ma techuetskiti”. Okitlalijkej itlajkotia ome tlaketsalmej uan okipinauijkej. Sansón chikauak okijto: “Oh Jehová, nimitstlatlaujtia, oksepa xinechmaka chikaualistli”. Yomoskaltijka itsonkal, ik non, ika nochi ichikaualis okolini itlaketsaluan teokali. Nin teokali ouetski uan okinmikti nochtin akinmej ompa okatkaj. Sansón noijki omikik.