TLAXELOL 5

Peua ijkuak israelitas okinuikakej Babilonia uan tlami ijkuak okiyektlalijkej itepamitl Jerusalén

Ijkuak israelitas okinuikakej Babilonia, intlaneltokilis omoyejyeko. Sadrac, Mesac uan Abednego okintlamotlakej ijtik se horno tlen okatka totonik, maski ijkon, toTajtsin Dios okinmakixti uan amo omikej. Satepan, ijkuak medos uan persas okimoaxkatijkej Babilonia, Daniel okitlamotlakej ijtik se koyoktli kanin okatkaj miakej leones, maski ijkon, toTajtsin Dios noijki okimakixti ijkuak amo okinkauili leones ma kikuakan.

Saiktlami, Ciro ueyi tekiua persa okinmakixti israelitas. Israelitas omokuepkej itech inaltepetl 70 xiuitl satepan ijkuak okinuikakej Babilonia ken tlakeualtin. Satepan omokuepkej Jerusalén yejuan achto opejkej kichijchiuaj iteokali Jehová. Maski ijkon, akinmej okinkokoliayaj israelitas amo okinkauilijkej ma kichijchiuakan. Ik non, 22 xiuitl satepan oualmokuepkej Jerusalén, otlankej okichijchijkej teokali.

Satepan, timomachtiskej ken Esdras oualmokuepki Jerusalén pampa okachi kualtsin kichijchiuaskia teokali. Nin omochi kanaj 47 xiuitl satepan otlankej okichijchijkej teokali. Uan 13 xiuitl satepan omokuepki Esdras, Nehemías otlapaleui pampa okiyektlalijkej tepamitl tlen okiyaualoaya Jerusalén. Itech nin Tlaxelol MAKUILI tikitaskej tlen opanok itech 152 xiuitl.