TLAPOUALISTLI 82

Mardoqueo uan Ester

MA TITLAJTOKAN itech tlen opanok seki xiuitl achto Esdras yaskia Jerusalén. Mardoqueo uan Ester yejuan israelitas tlen okachi ueyitijtokej itech tekiuajkayotl Persa. Ester kajki ken siuatl ueyi tekiua, uan iprimo Mardoqueo ye akin kitokilijtok ueyi tekiua. Ma tikitakan ken opanok nin.

Itatajuan Ester omikej ijkuak ye ok okatka takotsin, ik non, Mardoqueo okiskalti. Asuero, ueyi tekiua itech Persia, okipiaya se kali kanin otlanauatiaya itech altepetl Susa, uan Mardoqueo okatka se itekipanojka. Se tonal, Vasti isiua ueyi tekiua amo okitlakamatki, ik non, ueyi tekiua okipejpenki okse isiua tlen noijki yetoskia ueyi tekiua. ¿Tikmati akin okipejpenki? Kema, ichpochtli kuajkualtsin akin omotokayotiaya Ester.

¿Tikita nin tlakatl tlen moueyimati uan tlaltikpaktlakamej tlen ixpan motlankuaketsaj? Ye Hamán. Se tlakatl tlen oueyititoka itech Persia. Hamán okinekiaya noijki ma motlankuaketsa Mardoqueo ixpan ye. Mardoqueo ye akin tikita euatok. Maski ijkon, Mardoqueo amo okichi non. Ye amo kuali okitaya motlankuaketsaskia ixpan se tlakatl tlen sapanoa amo yolkuali. Hamán okualanki miak. Uan axkan tikitas tlen okichi.

Hamán okilui ueyi tekiua xolopijkayotl itech israelitas, okilui: ‘Yejuan amo yolkualmej uan amo kitlamatij motlanauatiluan. Moneki mikiskej’. Asuero amo okimatiaya tla isiua okatka israelita. Ik non, okikak Hamán, uan okijkuilo se tlanauatil tlen okijtoaya se tonal nochtin israelitas omonekiaya kinmiktiskiaj.

Ijkuak Mardoqueo okikak nin tlanauatil omotekipacho miak. Otlanauati ma kiluikan Ester: ‘Xiktlapoui ueyi tekiua, uan xikilui ma techmakixti’. Itlanauatil persas okijtoaya amo akaj uelis yaskia ixpan ueyi tekiua tla amo okiyolejkej. Maski ijkon, Ester oyajki okitato ueyi tekiua maski amo okiyolejkej. Ueyi tekiua okimela itlako tlen ochichijkej ika oro, uan non kijtosnekia amo ma kimiktikan. Ester okinyole ueyi tekiua uan Hamán itech se ueyi tlakualistli. Ijkuakon, ueyi tekiua okitlajtlani Ester kox itlaj okinekiaya. Ester kiluiskia tla mostlatika oksepa yaskiaj tlakuatij ueyi tekiua uan Hamán.

Ijkuak otlakuajtokaj, Ester okilui ueyi tekiua: ‘Noaltepetl uan ne techmiktiskej’. Ueyi tekiua okualanki miak uan okitlajtlani: ‘¿Akin kinekis ijkon kichiuas?’.

Ester okinankili: ‘Ye nin tlakatl akin techkokoliaj, nin amo yolkuali Hamán’.

Ueyi tekiua melauak okualanki miak. Uan otlanauati ma kimiktikan Hamán. Satepan, ueyi tekiua okitlali Mardoqueo ken tlayekanki akin okitokiliaya. Mardoqueo okichi ma kijkuilokan se yankuik tlanauatil kanin okijtoaya israelitas uelis mopaleuiskej itech tonal tlen okitlalijkej pampa kinmiktiskiaj. Ken Mardoqueo okatka ueyititok, miakej tlaltikpaktlakamej okinpaleuijkej israelitas, uan yejuan omomakixtijkej.

Ester 1 a 10.