TLAPOUALISTLI 52

Gedeón uan 300 isoldados

¿TIKITA tlen panotok nikan? Ninmej soldados israelitas. Akinmej tikinmita motlankuaketsaj, konitokej atl. Juez Gedeón moketok innakastlan. Ye kinmita ken atlij.

Xikita ken tlakamej tlatlamantli konitokej atl. Sekimej motlankuaketsaj pampa atliskej. Se soldado ika ima kikonana atl uan ijkon atli, pampa uelis kitas tlen tlapanotok. Nin kipia miak ipati, pampa Jehová okilui Gedeón ma kinpejpena san akinmej tlachixtokej ijkuak atlij. Oksekimej moneki mokuepaskej inkalijtik. Ma tikitakan tleka.

Israelitas oksepa okipiayaj ouijkayotl pampa amo okitlakamatkej Jehová. Madianitas okachi yomomiaktilijkej uan okintlajyouiltijtokaj israelitas. Ik non, israelitas okitlatlaujtijkej Jehová ma kinpaleui, uan Jehová okinkak.

Jehová okilui Gedeón ma kinnechiko soldados, uan ik non, Gedeón okinnechiko 32,000 soldados. Maski ijkon, akinmej iuan moteuiskiaj yetokaj 135,000 soldados. Maski ijkon, Jehová okilui Gedeón: ‘Tikinpia miakej tlakamej’. ¿Tleka ijkon okijto Jehová?

Pampa tla israelitas tlatlaniskiaj, uelis mokuayejyekoskiaj yejuan otlatlankej, uan amo omonekiaya ma kinpaleui Jehová. Ik non, Jehová okilui Gedeón: ‘Xikinmilui nochtin akinmej momojtiaj ma mokuepakan inkalijtik’. Ijkuak Gedeón ijkon okichi, 22,000 soldados omokuepkej. Axkan san omokajkej 10,000 tlakamej pampa moteuiskiaj iuan 135,000 soldados.

Uan, ¡xikaki! Jehová okijto: ‘Ok tikinpia miakej tlakamej’. Ik non, Gedeón okichi ma atlikan itech nin apan uan ma mokuepakan inkalijtik akinmej omotlankuaketskej pampa atliskej. Jehová okimakak itlajtol uan okilui: ‘Nikchiuas xitlatlani san ika 300 tlakamej tlen otlachixtokaj ijkuak oatliayaj’.

Oajsik tonal pampa moteuiskiaj. Gedeón okinxexelo 300 tlakamej itech eyi nechikolmej. Uan sejse tlakatl okinmakak se kuako, uan se xoktsin tlen ijtik okipiaya tlitl tlen tlauia. Ijkuak yiajsiskia tlajkoyoak, okinyaualojkej soldados akinmej iuan moteuiskiaj. Ijkuakon, nochtin san sekan okipitskej inkuakojuan uan okintlapankej inxoktsiuan, uan otsajtsikej: ‘¡Iespada Jehová uan Gedeón!’. Ijkuak oksekimej soldados oijsakej, omomojtijkej uan amo okimatiayaj tlen kichiuaskiaj. Nochtin ocholojkej uan israelitas otlatlankej.

Jueces 6 a 8.