TLAPOUALISTLI 41

Koatl tlen okichijchijkej ika cobre

¿MOITA melauak yoltok koatl tlen kajki itech kuauitl? Amo. Okichijchijkej ika cobre. Jehová okilui Moisés ma kiajkokui ipan kuauitl pampa israelitas uelis kitaskiaj uan ok yoltoskiaj. Maski ijkon, oksekimej koamej tlen yetokej ipan tlali melauak yoltokej. Okinkuajkej tlaltikpaktlakamej uan omokokojkej. ¿Tikmati tleka?

Pampa israelitas okijtojkej tlen amo kuali itech toTajtsin Dios uan Moisés. Omokuejsojkej uan okijtojkej: ‘¿Tleka otechkixti itech Egipto pampa timikiskej nikan kanin tlauaki? Nikan amo onka tlakuali nion atl. Uan ayakmo tiknekij tikuaskej nin maná’.

Maski ijkon, maná se kuali tlakuali. Jehová okinmakak ika se milagro. Noijki ika se milagro okinmakak atl. Maski ijkon, israelitas amo okitlasojkamatilijkej toTajtsin Dios pampa ken okinmaluiaya. Ik non, Jehová okintitlanki ninmej koamej pampa kintlajyouiltiskiaj israelitas. Koamej okinkuajkej israelitas, uan miakej israelitas omikej.

Saiktlami, israelitas oyajkej ixpan Moisés uan okiluijkej: ‘Otitlajtlakojkej, pampa otikijtojkej tlen amo kuali itech Jehová uan te. Axkan te xiktlatlaujti Jehová pampa ma kinkixti ninmej koamej’.

Ik non, Moisés omotlatlaujti. Uan Jehová okilui Moisés ma kichijchiua nin koatl ika cobre. Okilui ma kitlali itech se kuauitl, uan nochtin akinmej okinkuaj se koatl, omonekiaya kitaskej koatl tlen okichijchijkej ika cobre. Moisés okichi ijkon ken okijto toTajtsin Dios. Uan nochtin akinmej okinkuaj koatl okitayaj koatl tlen okichijchijkej ika cobre uan oksepa kuali okatkaj.

Nin techmachtia itlaj tlen miak ipati. Nochtin tikatej ken israelitas tlen koamej okinkuajkej. Nochtin tejuan timiktokej. Xikita ken nochtin tlaltikpaktlakamej kokoxkatij noso ueuejtij, mokokoaj uan mikij. Ijkon panoa pampa achto tlakatl uan achto siuatl, Adán uan Eva, okikajkej Jehová, uan tinochtin tejuan tiikoneuan. Maski ijkon, Jehová yokichi itlaj pampa uelis tikpiaskej yolilistli tlen amo keman tlamis.

Jehová okititlanki iKone Jesucristo nikan Tlaltikpak. Jesús okiajkokuijkej ipan se kuauitl, pampa miakej omokuayejyekoayaj okatka amo yolkuali. Maski ijkon, Jehová okiualtitlanki Jesús pampa techmakixtis. Tla tikitaj uan tikchiuaj ken Jesús, uelis tikpiaskej yolilistli tlen amo keman tlamis. Maski ijkon, itech nin satepan timomachtiskej.

Números 21:4-9; Juan 3:14, 15.