TLAPOUALISTLI 45

Okipanauijkej aueyatl Jordán

¡XIKITA! Israelitas kipanauijtokej aueyatl Jordán. ¿Uan kanin kajki atl? Itech non tonalmej okiauiaya miak, uan achto panoskiaj, aueyatl omoskalti miak. ¡Maski ijkon, axkan ayakmo opanoaya atl! ¡Uan israelitas panotokej ipan tlali ijkon ken opanokej ipan ueyi atl Rojo! ¿Kanin omokaj nochi atl? Ma tikitakan.

Ijkuak oajsik tonal pampa israelitas kipanauiskiaj aueyatl Jordán, Jehová okinauati Josué ma kinmilui israelitas: ‘Teopixkamej moneki kimamaskej arca itech tlajtolsenkaualistli uan yaskej tlayekapan. Uan ijkuak tlaksaskej ipan aueyatl Jordán, atl ayakmo panos’.

Ik non, teopixkamej okajkokuijkej arca itech tlajtolsenkaualistli uan okiuikakej tlayekapan. Ijkuak oajsitoj aueyatl Jordán, teopixkamej okalakej ipan aueyatl. Aueyatl okiuikaya miak atl uan okatka uejkatlan. ¡Ijkuak teopixkamej omoketskej ijtik atl, aueyatl opejki moketsa! ¡Non se milagro! Jehová okichi ayakmo ma pano atl. ¡Aueyatl ouaki!

Teopixkamej tlen okiuikayaj arca itech tlajtolsenkaualistli opanokej itlajkotia aueyatl tlen ouaki. ¿Ueli tikinmita itech tlaixkopinal? ¡Ijkuak ompa okatkaj, nochtin israelitas opejkej panoaj itech aueyatl Jordán ipan tlali uaki!

Ijkuak nochtin yopanokej, Jehová okilui Josué ma kinnauati 12 tlakamej chijchikauakej: ‘Xikalakikan ijtik aueyatl Jordán kanin katej teopixkamej ika arca itech tlajtolsenkaualistli. Ompa, xikololokan 12 temej uan xiktlalikan kanin nanmokauaskej nin yoak. Ijkon, satepan ijkuak namokoneuan namechtlajtlaniskej tlen kijtosneki ninmej temej, moneki nankinmiluiskej atl omoketski ijkuak iarca Jehová itech tlajtolsenkaualistli opanok itech aueyatl Jordán. ¡Ninmej temej kinmilnamiktis nin milagro!’. Josué noijki okintlali 12 temej kanin okatkaj teopixkamej ijtik aueyatl.

Saiktlami, Josué okinmilui teopixkamej tlen okiuikayaj arca itech tlajtolsenkaualistli: ‘Xikisakan itech aueyatl Jordán’. Ijkuak okiskej, atl oksepa opejki panoa.

Josué 3:1-17; 4:1-18.