Se mantajkali kanin okiueyichiuayaj toTajtsin Dios
TLAPOUALISTLI 37
Se mantajkali kanin okiueyichiuayaj toTajtsin Dios
¿TIKMATI tlen nin kali? Se mantajkali kanin kiueyichiuaskiaj Jehová. Itoka tabernáculo. Se xiuitl satepan israelitas okiskej itech Egipto, otlankej okichijchijkej tabernáculo. ¿Tikmati akin okijto ma mochijchiua?
Jehová ijkon okijto. Ijkuak Moisés okatka ipan tepetl Sinaí, Jehová okilui ken kichijchiuaskia. Okilui ma kichijchiua pampa amo oui yetoskia moxitiniskia. Ijkon, uelis kiuikaskiaj oksekan uan oksepa kichijchiuaskiaj. Ik non, ijkuak israelitas oksekan oyayaj kanin tlauaki, okiuikayaj mantajkali.
Tla tikita cuarto tsikitsin tlen kajki kanin tlami mantajkali, ompa uelis tikitas se caja. Nin caja itoka arca itech tlajtolsenkaualistli. Okipiaya ome ángeles noso querubines tlen okinchijchijkej ika oro, uan sejse okatka itempa arca. ToTajtsin Dios oksepa okinmijkuilo Majtlaktli Tlanauatilmej ipan ome temej patlauakej, pampa Moisés okintlapanki tlen achto okimakakej. Uan ninmej temej okintlalijkej itech arca itech tlajtolsenkaualistli. Noijki ompa okitlatijkej se xoktsin tlen okipiaya maná. ¿Tikilnamiki tlen maná?
Jehová okipejpenki Aarón ikni Moisés pampa yetoskia ueyi teopixki. Ye okinyekanaya israelitas pampa kiueyichiuaskiaj Jehová. Uan ipiluan noijki okintlalijkej ken teopixkamej.
Axkan xikita cuarto tlen okachi ueyi tlen kajki itech mantajkali. Ojpa okachi ueyi ken okse cuarto tsikitsin. ¿Tikita caja tsikitsin kanin kistok poktli? Ompa okatka altar kanin teopixkamej okitlatiayaj kopali, tlen kualtsin ajuiak. Noijki xikita candelabro tlen okipiaya chikome tlauilmej. Uan tlamantli eyi tlen kajki ijtik cuarto ye se mesa, ipan okitlaliayaj 12 panes.
Ixpan tabernáculo okatka se akaxitl, tlen otentoka ika atl. Teopixkamej ompa omomapajpakayaj uan omoikxipajpakayaj. Noijki ompa okatka ueyi altar. Ompa okintlatiayaj yolkamej tlen okinmiktiayaj pampa okitlamaniliayaj Jehová. Mantajkali okatka itlajkotia kanin ochantiayaj israelitas, yejuan okiyaualoayaj mantajkali.
Éxodo 25:8-40; 26:1-37; 27:1-8; 28:1; 30:1-10, 17-21; 34:1, 2; Hebreos 9:1-5.
