TLAPOUALISTLI 49

Tonaltsin omoketski

XIKITA Josué. Ye kijtoa: ‘¡Tonaltsin, ximoketsa!’. Uan Tonaltsin moketsa. Ijkon mokaua nochi se tonal. ¡Jehová kichiua ijkon ma pano! Ma tikitakan tleka Josué okinekiaya Tonaltsin ma moketsa.

Ijkuak makuili ueyi tekiuajkej amo yolkualmej tlen otlanauatiayaj itech Canaán opejkej moteuiaj iuan Gabaón, gabaonitas okititlankej se tlakatl pampa ma kilui Josué ma kinpaleui. Ye okilui: ‘¡Xiuiki touan totoka! ¡Xitechmakixti! Ueyi tekiuajkej tlen uitsej itech tepemej kinteuijtokej namotekipanojkauan’.

San niman Josué uan nochtin isoldados oyajkej. Itech nochi se yoak onejnenkej. Ijkuak oajsitoj Gabaón, insoldados makuili ueyi tekiuajkej omomojtijkej uan opejkej choloaj. Ijkuakon, Jehová okichi ma uetsi tesiuitl uejueyi ken tetl, uan miakej soldados omikej ika tesiuitl uan amo miakej okinmiktijkej isoldados Josué.

Josué okitak Tonaltsin yikalakiskia. Yitlayoaskia uan miakej insoldados makuili tekiuajkej choloskiaj. Ik non, Josué omotlatlaujti inauak Jehová uan okijto: ‘¡Tonaltsin, ximoketsa!’. Uan ken Tonaltsin omoketski, israelitas otlatlankej.

Okatkaj miakej ueyi tekiuajkej tlen amo yolkualmej itech Canaán akinmej okikokoliayaj ialtepetl toTajtsin Dios. Opanok kanaj chikuase xiuitl pampa Josué uan isoldados okintlanilijkej 31 ueyi tekiuajkej tlen okatkaj itech ueyi altepetl. Satepan omochi nin, Josué okichi ueyi altepetl ma moxejxelo itech nechikolmej tlen okinpoloaya tlali.

Opanok miak xiuitl, uan ijkuak Josué okipiaya 110 xiuitl, omikik. Ijkuak ye uan iyolikniuan ok yoltokaj, israelitas okitlakamatkej Jehová. Uan ijkuak yejuan omikej, israelitas okichijkej tlen amo kuali uan otlajyouijkej miak. Axkan okinekiayaj ma kinpaleui toTajtsin Dios.

Josué 10:6-15; 12:7-24; 14:1-5; Jueces 2:8-13.