TLAPOUALISTLI 36

Torojkonetl tlen okichijchijkej ika oro

¡TLEN panotok! ¿Tlen kichijtokej tlaltikpaktlakamej? ¡Motlajtlaujtijtokej ixpan se torojkonetl! ¿Tleka ijkon kichijtokej?

Ken Moisés ouejkauato ipan tepetl, israelitas okijtojkej: ‘Amo tikmatij tlen okipanok Moisés. Ma tikmochiuilikan se teotsin tlen uelis techkixtis itech nin tlali’.

Aarón ikni Moisés okijto: ‘Kuali kajki. Xikmokixtilikan nanmopipiloluan tlen chijchijtok ika oro uan xinechualikilikan’. Ijkuak israelitas ijkon okichijkej, Aarón okipatilti pipilolmej uan okichijchi se torojkonetl ika oro. Uan israelitas okijtojkej: ‘¡Nin teotsin akin otechkixti itech Egipto!’. Ijkuakon, israelitas okichijkej se ueyi iluitl uan okiueyichijkej torojkonetl tlen okichijchijkej ika oro.

Ijkuak Jehová okitak tlen opanotoka, okualanki miak. Uan okilui Moisés: ‘Totoka xitemo. Altepetl kichijtok tlen amo kuali. Yokilkajkej notlanauatiluan uan motlankuaketsaj ixpan se torojkonetl tlen okichijchijkej ika oro’.

Moisés san niman otemok itech tepetl. Uan ijkuak oualtemoaya; nin tlen okitak. ¡Israelitas okiyaualoayaj torojkonetl uan otlakuikayaj uan omijtotiayaj! Moisés sapanoa okualanki uan okitlamotlak ome temej patlauakej tlen okipiayaj tlanauatilmej, uan otlapankej. Ijkuakon, okikitski torojkonetl uan okipatilti. Uan omoka ken tlalpinoli.

Israelitas okichijkej itlaj tlen amo kuali. Ik non, Moisés okinmilui sekimej tlakamej ma kikitskikan inespadas. Uan okijto: ‘Akinmej amo yolkualmej uan okiueyichijkej torojkonetl moneki mikiskej’. ¡Ik non, tlakamej okinmiktijkej 3,000 tlaltikpaktlakamej! ¿Amo techititia nin moneki san Jehová tikueyichiuaskej uan amo teotsitsintin?

Éxodo 32:1-35.