TLAXELOL 7

Peua ijkuak okiyolitijkej Jesús uan tlami ijkuak okitsakej Pablo

Eyi tonal satepan okimiktijkej Jesús, toTajtsin Dios okiyoliti. Itech non tonal, Jesús makuilpan omonexti ixpan imachtijkauan. Uan ok omonexti itech 40 tonalmej. Ijkuakon, sekimej imachtijkauan okitakej ijkuak Jesús otlejkok iluikak. Majtlaktli tonal satepan, toTajtsin Dios okinmakak espíritu santo imachtijkauan Jesús akinmej omochixtokaj Jerusalén.

Satepan, akinmej okikokoliayaj toTajtsin Dios okintsakej tlatitlaniltin itech telpiloyan, maski ijkon, se ángel okinmakixti. Se imachtijka Jesús, tlen omotokayotiaya Esteban, okimiktijkej ika tetl. Uan noijki timomachtiskej, Jesús okipejpenki se itech ninmej tlakamej pampa kichiuaskia se tekitl tlen miak ipati, uan nin tlakatl omochi tlatitlanil Pablo. Ijkuakon, eyi xiuitl uan tlajko satepan omikik Jesús, toTajtsin Dios okititlanki tlatitlanil Pedro ma kitlapouiti Cornelio, akin amo okatka judío, uan ichanejkauan.

Kanaj 13 xiuitl satepan, Pablo achto oyajki uejka otetlapouito. Ijkuak ojpa oyajki uejka otetlapouito, Timoteo iuan oyajki. Pablo uan akinmej iuan oyajkej, okinpanok miak tlamantli kualtsin ijkuak okitekichiuiliayaj toTajtsin Dios. Satepan, Pablo okitsakej itech telpiloyan. Ome xiuitl satepan, okikajkajkej, maski ijkon, satepan oksepa okitsakej uan okimiktijkej. Itech nin Tlaxelol CHIKOME, tikitaskej tlen opanok itech kanaj 32 xiuitl.