TLAPOUALISTLI 104

Jesús oyajki iluikak

PANOAJ tonalmej, uan Jesús miakpa kinmonextilia imachtijkauan. Se tonal, okitakej kanaj 500 imachtijkauan. Ijkuak okinmonextili, ¿tikmati tlen okintlapoui Jesús? Itech itekiuajkayo toTajtsin Dios. Jehová okiualtitlanki Jesús pampa ma techmachtiki itech Tekiuajkayotl. Uan noijki satepan okiyoliti Jehová, Jesús ok otetlapouiaya itech non.

¿Tikilnamiki tlen itekiuajkayo toTajtsin Dios? Nin melauak itekiuajkayo toTajtsin Dios tlen kajki iluikak, uan Jesús ye ueyi tekiua tlen toTajtsin Dios oKipejpenki. Ken otikitakej, ¡Jesús okiteititi ken melauak kuali tlamantli kichiuas ken ueyi tekiua, pampa okintlamakak akinmej oapismikiayaj, okinpajti akinmej omokokoayaj uan noijki okinyoliti akinmej omikej!

Ik non, ijkuak Jesús peuas tlanauatis itech iluikak itech mil xiuitl, ¿tlen tlapanos nikan itech Tlaltikpak? Kema, nochi Tlaltikpak mochiuas se kuajkualtsin xochitlali. Ayakmo yetos guerras, kokolistli, ouijkayotl nion mikilistli. Tejuan tikmatij ijkon panos pampa toTajtsin Dios okichijchi Tlaltikpak pampa yetoskia se xochitlali pampa tlaltikpaktlakamej. Ik non, okichijchi xochitlali Edén. Uan Jesús kichiuas ma mochiua tlen toTajtsin Dios kineki.

Oajsik tonal pampa Jesús oksepa yaskia iluikak. Itech 40 tonalmej Jesús okinmonextili imachtijkauan uan ijkon yejuan okimatkej Jesús oyoltoka. Maski ijkon, achto yaskia iluikak okinmilui imachtijkauan: ‘Ximokauakan itech Jerusalén pampa nankiseliskej espíritu santo’. Non kijtosneki ichikaualis toTajtsin Dios, ken se chikauak ejekatl, uan kinpaleuiskia imachtijkauan pampa kichiuaskiaj itlanekilis toTajtsin Dios. Saiktlami, Jesús okinmilui: ‘Namejuan nantetlapouiskej notech itech nochi Tlaltikpak’.

Ijkuak nin tlamantli okinmilui, opanok itlaj tlen okintlajtlachialti. Ken tikita itech tlaixkopinal, Jesús opejki tlejko iluikak. Satepan, se mixtli okitlati, uan imachtijkauan ayakmo okitakej. Jesús oyajki iluikak uan opejki kinnauatia imachtijkauan nikan Tlaltikpak.

1 Corintios 15:3-8; Apocalipsis 21:3, 4; Hechos 1:1-11.