TLAPOUALISTLI 102

Jesús yoltok

¿TIKMATI akin nin siuatl uan ninmej ome tlakamej? Siuatl itoka María Magdalena, iyolikni Jesús. Uan tlakamej tlen istak tlakentokej yejuan ángeles. María tlachixtok ijtik mikakoyoktli kanin okitlalijkej inakayo Jesús, ¡maski ijkon, ayakmo ompa kajki! ¿Akin okiuikak? Ma tikitakan.

Satepan okimiktijkej Jesús, teopixkamej okiluijkej Pilato: ‘Ijkuak Jesús oyoltoka, okijto moyolitiskia ipan eyi tonal. Ik non, xitlanauati ma kimaluikan mikakoyoktli. ¡Ijkon imachtijkauan amo uelis kichtekiskej inakayo Jesús uan amo uelis kijtoskej yomoyoliti!’. Pilato otlanauati ma kintitlanikan sekimej soldados.

Maski ijkon, satepan opanokej eyi tonalmej ijkuak okimiktijkej Jesús, ijkuak yikin otlaneski se iángel Jehová san niman omonexti. Okikachi ueyi tetl tlen okitsakuaya mikakoyoktli. Soldados sapanoa omomojtijkej uan amo ueli omolinijkej. ¡Saiktlami, ijkuak otlachixkej ijtik mikakoyoktli, inakayo Jesús ayakmo ompa okatka! Sekimej soldados oyajkej itech altepetl uan okintlapouijkej teopixkamej tlen opanok. ¿Tikmati tlen okichijkej ninmej amo yolkualmej teopixkamej? Okintlaxtlauijkej pampa ma tlakajkayauakan. Okinmiluijkej: ‘Xikijtokan imachtijkauan okiuikakej ijkuak namejuan onankochtokaj’.

Ijkuakon, sekimej siuamej tlen okatkaj iyolikniuan Jesús okitatoj imikakoyoktli. ¡Amo itlaj okipiaya! San niman ome ángeles tlen opetlaniayaj intlaken omonextijkej. Okintlajtlanijkej siuamej: ‘¿Tleka nikan nankitemoaj Jesús? Yokiyolitijkej. San niman xiakan uan xikinmiluikan imachtijkauan’. Yejuan omotlalojkej. Maski ijkon, ijkuak yejuan oyayaj itech ojtli se tlakatl okintsakuili. ¡Ye Jesús! Uan okinmilui: ‘Xiakan uan xikinmiluikan nomachtijkauan’.

Ijkuak siuamej oyajkej ixpan imachtijkauan Jesús uan okinmiluijkej Jesús oyoltoka uan okitakej, yejuan amo okinneltokilijkej. ¡Pedro uan Juan san niman oyajkej kanin okatka mikakoyoktli, maski ijkon, amo itlaj okipiaya! Ijkuak yejuan oyajkej, María Magdalena omoka tlakuitlapan. Ik non, otlachixki ijtik mikakoyoktli uan okinmitak ome ángeles.

¿Tikmati tlen okipanok inakayo Jesús? ToTajtsin Dios okipojpolo. ToTajtsin Dios amo okiyoliti ika inakayo tlen okipiaya. Okiyoliti ken se espíritu ijkon ken ángeles. Maski ijkon, ken Jesús okinekiaya imachtijkauan ma kitakan, ye omonexti ika inakayo tlen ueli moita.

Mateo 27:62-66; 28:1-15; Lucas 24:1-12; Juan 20:1-12.