TLAXELOL 6

Peua ijkuak oneski Jesús uan tlami ijkuak omikik

Ángel Gabriel okititlankej ixpan se ichpochtli yolkuali tlen omotokayotiaya María. Ángel okilui María kipiaskia se konetl tlen nochipa tlanauatiskia ken ueyi tekiua. Non konetsintli, Jesús, oneski kanin mokauaj yolkamej, uan ompa sekimej tlajpixkej okitlajpalotoj. Satepan, se sitlali okinyekanki sekimej tlakamej tlen ochantiayaj ik kanin kisa Tonaltsin pampa okitlajpalotoj konetsintli. Timomachtiskej akin okichi ma kitakan sitlali, uan ken omomakixti Jesús ijkuak okinekiayaj kimiktiskej.

Satepan, ijkuak Jesús okipiaya 12 xiuitl, tikitaskej ken omotlapouijtoka iuan akinmej otlamachtiayaj itech teokali. Uan 18 xiuitl satepan, Jesús omoapolakti, ijkuakon, opejki tetlapouia uan tlamachtia itech iTekiuajkayo toTajtsin Dios, pampa ik non toTajtsin Dios okiualtitlanki nikan Tlaltikpak. Pampa kipaleuiskiaj itech nin tekitl, Jesús okinpejpenki 12 tlakamej tlen omochijkej itlatitlaniluan.

Jesús noijki okichi miakej milagros. Okintlamakak miakej tlaltikpaktlakamej san ika sekimej michimej uan sekimej panes. Okinpajti akinmej omokokoayaj uan okinyoliti mikamej. Saiktlami, timomachtiskej itech nochi tlamantli tlen okipanok Jesús itech saiktlami tonal tlen oyoltoka, uan noijki ken okimiktijkej. Jesús otetlapoui kanaj eyi xiuitl uan tlajko, ik non itech nin Tlaxelol CHIKUASE timomachtiskej tlen opanok itech kanaj 34 xiuitl.