TLAPOUALISTLI 87

Jesús okatka itech teokali

XIKITA nin telpochtli tlen motlapouijtok iuan tlakamej tlen yiuejueyij. Yejuan akinmej tlamachtiaj itech iteokali toTajtsin Dios tlen kajki Jerusalén. Telpochtli ye Jesús. Yomoskalti miak. Axkan yikipia 12 xiuitl.

Ninmej tlamachtijkej omotlajtlachialtijkej miak pampa Jesús okimatiaya miak itech toTajtsin Dios uan tlen ijkuilitok itech Biblia. Maski ijkon, ¿tleka José uan María amo ompa okatkaj? ¿Kanin okatkaj? Ma tikitakan.

Sejse xiuitl José okinuikaya ichanejkauan itech Jerusalén pampa kilnamikiskiaj se iluitl tlen miak ipati tlen omotokayotiaya Pascua. Omonekiayaj nejnemiskej miak pampa ajsiskiaj Jerusalén pampa yejuan ochantiayaj Nazaret. Itech non tonalmej amo okatkaj carros nion aviones. Miakej tlaltikpaktlakamej san onejnemiayaj, uan yejuan ouejkajkej kanaj eyi tonal pampa oajsitoj Jerusalén.

Axkan José yokipiaya miakej ichanejkauan. Ik non, José okinmaluiaya oksekimej ikniuan uan iueltiuan Jesús tlen ayamo okipiayaj miak xiuitl. Uan axkan, José uan María omokuepayaj Nazaret iuan inkoneuan. Omokuayejyekoayaj Jesús okatka iuan oksekimej tlen noijki oyayaj itech ojtli. Maski ijkon, ijkuak omoseuijkej itech non tonal, amo okajsikej. Okitemojkej pampa uelis okatka iuan inchanejkauan uan inyolikniuan, maski ijkon, amo okajsikej. Ik non, omokuepkej Jerusalén pampa kitemoskiaj.

Saiktlami, ompa okajsikej iuan tlamachtijkej. Okinkakiaya uan noijki okintlajtlaniaya miak tlamantli. Uan nochtin omotlajtlachialtiayaj pampa melauak okimatiaya miak. Maski ijkon, María okilui: ‘Nokone, ¿tleka ijkon otechtokti? Motajtsin uan ne sapanoa otimotekipachojkej uan otimitstemojtinemiayaj’.

Jesús okinnankili: ‘¿Tleka onechtemojtinemiayaj? ¿Amo onankimatiayaj moneki niyetos ikalijtik noTajtsin?’.

Kema, Jesús okipaktiaya yetos kanin uelis okachi momachtiskia itech toTajtsin Dios. Tejuan noijki ijkon moneki tikchiuaskej, ¿amo melauak? Ompa itech Nazaret, Jesús omonechikoaya sejse semana kanin okiueyichiuayaj toTajtsin Dios. Pampa ye nochipa kuali otlakakiaya, omomachti miak tlamantli itech Biblia. Noijki ma tikchiuakan ijkon ken Jesús.

Lucas 2:41-52; Mateo 13:53-56.