TLAPOUALISTLI 85

Jesús oneski kanin mokauaj yolkamej

¿TIKMATI akin nin konetsintli? Kema, ye Jesús. Yikin oneski kanin mokauaj yolkamej. María kitekatok Jesús kanin kitlalia intlakual burros uan oksekimej yolkamej. Maski ijkon, ¿tleka María uan José katej nikan iuan yolkamej? Nikan amo kuali pampa nesis se konetl, ¿amo melauak?

Amo, amo kuali. Maski ijkon, yejuan okatkaj ompa pampa tlakatl akin otlanauatiaya itech Roma, César Augusto, otlanauati nochtin ma mokuepakan itech inaltepetl kanin oneskej uan ma moijkuilokan itech se amochtli. Uan José oneski itech Belén. Uan ijkuak José uan María oajsitoj, amo okajsikej kanin mokalotiskiaj. Ik non, oyajkej kanin mokauaj yolkamej. Uan itech non tonal oneski Jesús. Maski ijkon, ken tikita ye kuali kajki.

¿Ueli tikinmita tlajpixkej tlen oyajkej pampa okinekiayaj kixmatiskej Jesús? Yejuan okatka tlalan itech yoak uan san niman se tlauili omonexti uan okinyaualo. ¡Okatka se ángel! Tlajpixkej omomojtijkej miak. Maski ijkon, ángel okinmilui: ‘¡Amo ximomojtikan! Nimechmatiltis kuali tlajtolmej. Axan, itech Belén, oneski toTeko Cristo. ¡Ye kinmakixtis tlaltikpaktlakamej! Kemelitok ika tlakemitl uan kajki kanin kintlakualtiaj yolkamej’. San niman, miakej ángeles omonextijkej uan opejkej kiueyichiuaj toTajtsin Dios. San niman ninmej tlajpixkej omotlalojkej okitemotoj Jesús, uan okajsikej.

¿Tikmati tleka ueyititok Jesús? ¿Tikmati akin melauak ye? Xikilnamiki, itech achto tlapoualistli itech nin amochtli otimomachtijkej itech achto iKone toTajtsin Dios. Ye otekitik iuan Jehová pampa okichijchijkej iluikak uan Tlaltikpak uan nochi tlen onka. Kema, ye nin Jesús.

Kema, Jehová okitlali ikone Jesús akin okatka itech iluikak, ijtik María. San niman, ijtik María opejki moskaltia se konetsintli ijkon ken oksekimej konemej moskaltiaj ijtik innantsin. Maski ijkon, nin konetsintli okatka iKone toTajtsin Dios. Saiktlami, oneski kanin mokauaj yolkamej, ompa itech Belén. ¿Ueli tikita tleka ángeles oyolpakej miak ijkuak okinmiluijkej tlaltikpaktlakamej oneski Jesús?

Lucas 2:1-20.