Jesús otlamachti itech se tepetl
TLAPOUALISTLI 91
Jesús otlamachti itech se tepetl
XIKITA Jesús nikan yetok. Kinmachtijtok nochtin ninmej tlaltikpaktlakamej itech se tepetl itech Galilea. Imachtijkauan yejuan akinmej inauak yetokej. Ye okinpejpenki 12 itech yejuan pampa ma yetokan itlatitlaniluan. Tlatitlaniltin yejuan akinmej okachi kuali mouikaj iuan Jesús. ¿Tikmati ken intoka?
Achto, Simón Pedro uan ikni Andrés. Satepan, Santiago uan Juan, akinmej noijki okatka iknimej. Okse tlatitlanil noijki omotokayotiaya Santiago, uan okse noijki omotokayotiaya Simón. Ome tlatitlaniltin omotokayotiayaj Judas. Se omotokayotiaya Judas Iscariote, uan okse Judas, noijki omotokayotiaya Tadeo. Noijki okatkaj Felipe, Natanael, Mateo uan Tomás.
Satepan ijkuak okiski itech Samaria, Jesús opejki tetlapouia: ‘Itekiuajkayo toTajtsin Dios ualajsitok’. ¿Tikmati tlen non tekiuajkayotl? Nin melauak itekiuajkayo toTajtsin Dios. Jesús iueyi tekiua. Ye ualtlanauatis ne iluikak uan kichiuas ma yeto yolseuilistli itech nochi Tlaltikpak. Itekiuajkayo toTajtsin Dios kikuepas nochi Tlaltikpak itech se kualtsin xochitlali.
Itech tlaixkopinal moita ken Jesús okinmachti miakej tlaltikpaktlakamej itech tekiuajkayotl. Okinyekilui: ‘Ijkin moneki nanmotlatlaujtiskej: ToTajtsin Dios tlen tika iluikak, ma moueyichiua motoka. Ma uiki motekiuajkayo. Ma mochiua itech Tlaltikpak motlanekilis, ijkon ken mochiua ompa itech iluikak’. Miakej tlaltikpaktlakamej kitokayotia nin tlatlaujtilistli ken ‘Padrenuestro’. ¿Uelis tikijtos nochi tlen kijtoa nin tlatlaujtilistli?
Jesús noijki okinmachti tlaltikpaktlakamej ken moneki mouikaskej iuan oksekimej, okinmilui: ‘Xikinchiuili oksekimej tlen te tikneki ma mitschiuilikan’. ¿Mitspaktia ijkuak oksekimej mitschiuiliaj tlen kuali? Ik non, tejuan moneki nochtin tikinchiuiliskej tlen kuali. ¡Melauak kuali yetos ijkuak ipan Tlaltikpak nochtin kichiuaskej tlen kuali!
