TLAPOUALISTLI 101

Okimiktijkej Jesús

¡XIKITA tlen tlamantli sapanoa temomojti panotok! Kimiktijtokej Jesús. Pilkatok itech se kuauitl. Itech imauan uan imetsuan okitsoponilijkej clavos. ¿Tleka ijkon okichiuilijkej?

Pampa sekimej tlaltikpaktlakamej okikokoliayaj. ¿Te tikmati akinmej okikokoliayaj? Se itech yejuan se ángel amo kuali tlen itoka Satanás noso Diablo. Ye akin okichi Adán uan Eva amo ma kitlakamatikan Jehová. Uan ye Satanás akin okichi akinmej okikokoliayaj Jesús temomojti ma kimiktikan.

Uan noijki, ijkuak ayamo okipiloayaj Jesús itech kuauitl, akinmej okikokoliayaj okichiuilijkej miak tlamantli tlen sapanoa amo kuali. ¿Tikilnamiki ken oyajkej itech xochitlali Getsemaní uan okiuikakej? ¿Akinmej okatkaj ninmej? Kema, tlayekankej teopixkamej. Ma tikitakan tlen opanok satepan.

Ijkuak tlayekankej teopixkamej okiuikakej Jesús, itlatitlaniluan ocholojkej. Omomojtijkej, uan okikajtejkej san iselti iuan akinmej okikokoliayaj. Maski ijkon, itlatitlaniluan Pedro uan Juan amo uejka oyajkej. Oyajkej inkuitlapan pampa okinekiayaj kitaskej tlen kipanoskia Jesús.

Teopixkamej okiuikakej Jesús ixpan se tlakatl ueuetsin tlen omotokayotiaya Anás, akin achto okatka ueyi teopixki. Tlaltikpaktlakamej amo miak kauitl ompa omokajkej. Satepan, okiuikakej Jesús ikalijtik Caifás, akin itech non tonalmej okatka ueyi teopixki. Ompa okatkaj miakej tlayekankej teopixkamej.

Ompa, itech ikalijtik Caifás okinekiayaj kitlajtlakoltiskej Jesús. Ik non, okinuikakej sekimej tlakamej pampa ma tlakajkayauakan itech Jesús. Nochtin tlayekankej teopixkamej okijtojkej: ‘Moneki tikmiktiskej Jesús’. Ijkuakon, okixchijchajkej uan okimakakej ika maitl.

Pedro okatka kiauak ijkuak opanotoka nochi nin. Non yoak oseuaya miak uan tlakamej otlatlatiayaj. Ijkuak omototoniayaj, se siuatl tlen ompa otekitiaya okitak Pedro uan okijto: ‘Nin tlakatl noijki okatka iuan Jesús’.

Pedro otlanankili: ‘¡Amo, ne amo onikatka iuan ye!’.

Eyijpa, tlaltikpaktlakamej okiluijkej Pedro ye kema okatka iuan Jesús. Maski ijkon, Pedro nochipa okijto amo. Ijkuak Pedro eyijpa okijto amo, Jesús okitak. Pedro melauak omoyolkoko miak pampa otlakajkaya, uan oyajki uan opejki choka.

Ijkuak otlaneski itech tonal viernes, teopixkamej okiuikakej Jesús itech se kali kanin omonechikoayaj, itech Sanedrín. Ompa okijtojkej tlen kichiuiliskiaj Jesús. Okiuikakej ixpan Poncio Pilato, tekiua itech Judea.

Okiluijkej Pilato: ‘Nin tlakatl amo yolkuali. Moneki ma tikmiktikan’. Satepan Pilato okichiuili sekimej tlajtlanilmej Jesús, okijto: ‘Ne amo nikita kox nin tlakatl okichi itlaj tlen amo kuali’. Ijkuakon, Pilato otlanauati ma kiuikakan Jesús ixpan Herodes Antipas, akin otlanauatiaya itech Galilea, uan akin okatka itech Jerusalén. Ye noijki amo okitak kox itlaj amo kuali okichi Jesús, uan oksepa okiuikakej ixpan Pilato.

Pilato okinekiaya kikajkauas Jesús. Maski ijkon, akinmej okikokoliayaj Jesús okinekiayaj Pilato ma kikajkaua okse akin noijki otsaktoka, se tlakatl tlen omotokayotiaya Barrabás, akin otlachtekiaya. Ijkuak yitlajkotonal Pilato okikixti Jesús. Pilato okinmilui tlaltikpaktlakamej: ‘¡Xikitakan! ¡Nikan kajki nanmoueyitekiua!’. Maski ijkon, teopixkej tlen okachi otlayekanayaj chikauak okijtojkej: ‘¡Xikmikti! ¡Xikmikti!’. Ijkon, Barrabás okikajkajkej, uan Jesús okiuikakej pampa kimiktiskej.

Viernes tiotlak okipilojkej Jesús itech se kuauitl. Noijki maski itech tlaixkopinal amo tikinmita, inajnakastlan Jesús okinpilojkej itech kuauitl ome tlakamej tlen okichijkej tlen amo kuali, pampa ma mikikan. Ijkuak ayamo omikiaya Jesús, se tlakatl tlen inakastlan opilkatoka okilui: ‘Xinechilnamiki ijkuak tikalakis itech motekiuajkayo’. Uan Jesús okinankili: ‘Nimitsmaka notlajtol, nouan tiyetos itech Xochitlali’.

¡Melauak kuajkualtsin tlen okilui! ¿Amo melauak? ¿Tikmati itech tlen xochitlali otlajto Jesús? ¿Kanin okatka xochitlali tlen toTajtsin Dios achto okichijchi? Kema, itech Tlaltikpak. Uan ijkuak Jesús tlanauatis itech iluikak, ye kiyolitis nin tlakatl pampa ma yolto itech yankuik Xochitlali ipan Tlaltikpak. ¿Amo melauak nin sapanoa kuali?

Mateo 26:57-75; 27:1-50; Lucas 22:54-71; 23:1-49, NM; Juan 18:12-40; 19:1-30.