TLAPOUALISTLI 94

Okintlasojtlaya konemej

XIKITA ken Jesús kinapalojtok nin chokotsin. Ueli tikita ken ye kintlasojtla konemej. Tlakamej tlen tlachixtokej, yejuan itlatitlaniluan. ¿Tikmati tlen kinmiluia Jesús?

Jesús uan itlatitlaniluan yikin omokuepkej itech se altepetl tlen uejka okatka. Ijkuak ok oualayaj itech ojtli, yejuan omotsajtsajtsilijkej. Ik non, ijkuak oajsitoj kanin oyayaj, Jesús okintlajtlani: ‘¿Tleka onanmotsajtsajtsiliayaj?’. Jesús okimatiaya tleka omotsatsajtsilijkej. Maski ijkon, ye okintlajtlani pampa kitaskia kox itlatitlaniluan kiluiskiaj.

Itlatitlaniluan amo okinankilijkej pampa itech ojtli yejuan omoluijtokaj akin okachi oueyititoka. Sekimej okinekiayaj okachi ueyititoskiaj. ¿Ken okinmilui Jesús amo kuali okatka tlen yejuan okinekiayaj?

Jesús okinotski chokotsin uan okitlali inmixpan nochtin. Ijkuakon, okinmilui imachtijkauan: ‘Nikneki kuali xikmatikan nin: Tla amo nankipatlaskej namoyelis uan nanmochiuaskej ken konemej, amo nankalakiskej itech itekiuajkayo toTajtsin Dios. Akin okachi ueyititos itech tekiuajkayotl ye akin kichiuas ken nin chokotsin’. ¿Tikmati tleka ijkon okijto?

Konemej amo kinekij ueyititoskej nion kinekij ma kinueyichiuakan oksekimej. Ik non, itlatitlaniluan Jesús omonekiayaj mochiuaskej ken konemej uan amo mokualaniskiaj nion kijtoskiaj akin okachi ueyititok.

Miakpa, Jesús noijki okiteititi ye sapanoa okintlasojtlaya konemej. Sekimej metstli satepan, sekimej tlaltikpaktlakamej okinuikakej ikoneuan ixpan Jesús. Itlatitlaniluan Jesús amo okinkauiliayaj konemej ma yakan inauak Jesús. Maski ijkon, Jesús okinmilui: ‘Xikinkauilikan konemej ma ualakan nonauak, uan amo xikintsakuilikan, pampa itekiuajkayo toTajtsin Dios kipiaskej akinmej kichiuaj ken ninmej konemej’. Ijkuakon, okinnapalo konemej uan okinteochi. ¡Melauak kuali tikmatiskej Jesús kintlasojtla konemej!

Mateo 18:1-4; 19:13-15; Marcos 9:33-37; 10:13-16.