TLAPOUALISTLI 3

Achto tlakatl uan achto siuatl

¿TLEN tlatlamantli tikita itech nin tlaixkopinal? Kema, tlaltikpaktlakamej tlen tikinmita. Yejuan achto tlakatl uan achto siuatl. ¿Akin okinchijchi? ToTajtsin Dios. ¿Tikmati tlen itoka? Jehová. Uan tlakatl uan siuatl okintokayotijkej Adán uan Eva.

Jehová ijkin okichijchi Adán: ika tlalpinoli okichijchi tlakatl tlen amo okipiaya tlajtlakoli. Satepan, okijyopitski itech iyekatsol uan ijkon opejki iyolilis Adán.

Jehová okimakak se tekitl Adán. Okinauati ma kintokayoti nochtin yolkamej tlen okatkaj. Uelis miak kauitl Adán okinmitak nochtin yolkamej pampa kuali kintlaliliskia intoka. Ijkuak Adán okichijtoka nin tekitl, itlaj okitak. ¿Tikmati tlen okitak?

Nochtin yolkamej okatkaj ojome. Okatkaj elefantes uan elefantas, leones uan leonas. Uan Adán san iselti okatka. Ik non, toTajtsin Dios okichi melauak ma kochi, uan okikixtili se iomisekuil. Uan ika nin iomisekuil, Jehová okichijchiuili Adán se siuatl tlen omochi inamik.

¡Adán axan melauak oyolpaktoka! ¡Uan noijki Eva oyolpaktoka pampa okatka itech se kuajkualtsin xochitlali kanin chantiskia! Axkan uelis kinpiaskiaj inkoneuan uan san sekan chantiskiaj ika yolpakilistli.

Jehová kinekia nochipa ma yoltokan Adán uan Eva. Kinekia ma kichiuakan nochi Tlaltikpak kuajkualtsin ken xochitlali Edén. ¡Uelis Adán uan Eva oyolpakej miak ijkuak omokuayejyekojkej kikuepaskiaj Tlaltikpak se xochitlali! ¿Mitspaktiskia te noijki titlapaleuiskia ma mochiua nochi Tlaltikpak se kualtsin xochitlali? Maski ijkon, inyolpakilis Adán uan Eva amo ouejka. Ma tikitakan tleka.

Salmo 83:18; Génesis 1:26-31; 2:7-25.