TLAPOUALISTLI 9

Noé okichijchi se akali

NOÉ okipiaya isiua uan eyi ikoneuan. Ikoneuan omotokayotiayaj Sem, Cam uan Jafet. Uan ninmej eyi ikoneuan okinpiayaj insiua. Ik non, okatkaj chikueyi itech ichanejkauan Noé.

Axkan toTajtsin Dios okilui Noé ma kichijchiua se tlamantli tlen amo keman omoitaya. Okilui ma kichijchiua se ueyi akali. Akali okatka ueyi ken se barco, uan omoitaya ken se caja ueyi uan ueyak. ToTajtsin Dios okilui Noé: ‘Xikchijchiua ika eyi pisos, uan xiktlajkoxexelo’. Ijtik yetoskiaj Noé uan ichanejkauan, yolkamej uan kanin kitlaliskiaj tlakuali.

ToTajtsin Dios okilui Noé kuali ma kichijchiua akali pampa amo kalakiskia atl. Okilui: ‘Niktitlanis se ueyi apachiuilistli uan ijkon nikixpolos nochi tlen onka itech Tlaltikpak. Akin amo yetos ijtik akali, mikis’.

Noé uan ikoneuan okitlakamatkej toTajtsin Dios uan opejkej kichijchiuaj akali. Uan oksekimej tlaltikpaktlakamej san okinuetskiliayaj. Ok okichiuayaj tlen amo kuali. Amo akaj okineltokak ijkuak Noé okinmilui tlen toTajtsin Dios kichiuaskia.

Ken akali okatka ueyi, opanok miak kauitl pampa okichijchijkej. Opanok miak xiuitl, uan saiktlami otlankej okichijchijkej akali. Axkan Jehová okilui Noé ma kinkalaki yolkamej ijtik akali. Okilui sekimej yolkamej ma kinkalaki ojome, se okichtli uan se siuatl. Uan oksekimej yolkamej, Jehová okilui ma kinkalaki chikome. Noijki okilui ma kinkalaki nochtin tlatlamantli totomej. Noé okichi ijkon ken toTajtsin Dios okilui.

Satepan, Noé uan ichanejkauan okalakej ijtik akali. Ijkuakon, toTajtsin Dios okitsakuak ikaltlatsakuil akali. Noé uan ichanejkauan san omochixtokaj. Ximokuayejyeko ompa tika, uan tikchixtok ma kiaui. ¿Melauak ualaskia apachiuilistli ken toTajtsin Dios okijto?

Génesis 6:9-22; 7:1-9.